Read West-Central Limba BiKaletiya beŋ 5 Bible Online

BiKaletiya beŋ 5 - West-Central Limba bible

BiKaletiya beŋ 5

¹Kuyankaŋ kuna kute miŋ koŋ. Kraist kiye mina kuyankaŋ, bɛna kɔɔŋ ma biya bi kiyo kuyankaŋ. Awa baŋ nda mɛkɛŋ yɛthɛ bakendeŋ ba sikino mbaayiŋ hɛlɛŋ.

²Ponaŋ kuiha. Yaŋ Pɔli, yaŋ tepe bena, mɛnɛ beŋ mɛy ba yema gboŋa ba ka thiyo ka bintɔni ndeŋ beŋ ba haliko ba yeroko iŋ Masaala, ba ni Kraist ba beŋ baŋ tha bena mase hali.

³Yaŋ kɔŋ hɛlɛŋ yeli wɔ yo wɔ wo mɛy ba thiyo ka bintɔni nama beŋ ba haliko ba yeroko iŋ Masaala, ndɛ kiŋ ba putiyɔ Siraŋ babunthu baŋ fooma.

⁴Beŋ, bendo yɔli beŋ ba kuto iŋ Masaala nɔŋ biya bithumbɛ ŋaye ka putiyɔ Siraŋ baŋ haŋ, beŋ kathiŋɔkɔy ŋaye ka Kraist. Beŋ yeme gboŋa ba sa kumase ku ka Masaala koŋ bena punku penke.

⁵Miŋ, matute yima makɛntuŋ ma kiŋ ba dɔma na Masaala kɔŋ mina kutu nɔŋ biya bithumbɛ. Yina wo ka Masaala woŋ, wo niye wali lanɛya bakɛntuŋ baŋ woŋ, tepe mina nagberekethe ba dɔma na wu kɔŋ niyɔ.

⁶Baa, naa miŋ niyɔy ka mabohinande iŋ Kraist Yisɔs, sɔkɔ huwaŋ kutɛ ba thiyo ka bintɔni ndeŋ, kɛrɛ wu sisi mahakande maŋ wuna lanɛya bakɛntuŋ baŋ ka Kraist ba tɔŋinɔkɔ baŋ ŋaye ka mathimo ntuŋ maŋ biya.

⁷Beŋ key ka kɔtɔkɔy wuyɔhɔy ka mabohinande ndeŋ maŋ iŋ Kraist. Nkaana dɔmɛ bena ba pɛya ba putiyɔ huseri hu nɔndi baŋ haŋ?

⁸Masaala kutɛ pindɛ bena ba putiyɔ huseri hu nɔndi baŋ haŋ, baa Masaala na thiyɛ bena ba niyɔ biya bikɛnama beŋ.

⁹Beŋ yuye nde thayiŋ tha tepo nde thaŋ, na “Yisithi woyetenaŋ kɔŋ ni ba kutoŋ kubunthu koŋ ŋata.”

¹⁰Kɛrɛ haaŋ hɛ yando thɛbinɛ thukuma ba beŋ. Siini bakɛntuŋ baŋ ka bohinande ntuŋ haŋ iŋ Kraist ni yama ba yaŋ thɛbina thukuma ba dɔma na beŋ sa sɛkɛthi mathanani mahɛna, awa wɔ yo wɔ wo sisiyɛ bena mathanani mahɛna, namo nama na wundɛ, Masaala kɔŋ niŋ gbasaŋati.

¹¹Kɛrɛ ba yaŋ, mbɛndaŋ beŋ, mɛnɛ yaŋ key ka kɔtɔkɔy kaŋ kaa kaŋ niya kɛwandi ba dɔma na yɔkɔŋ wɔ thiyo ka bintɔni nama ba haliko ba yeroko iŋ Masaala, mbɛ ba yama biya niye thɔrɔ? Mɛnɛ huna yaŋ ni kɛwandi yaathi, kukɛwandi kukiyaŋ koŋ ba kuyeŋ kubariŋande koŋ sa nde pindi biYusu beŋ ba niya Kraist na lanɛya.

¹²Yaŋ kiŋ kufiyo ba biya bi bena ni thɔrɔ beŋ beŋ kaa ka kɔtɔkɔy kaŋ thiyɔkɔ ka bintɔni namɛŋ haaŋ bindɛ nda dankɔkɔ.

¹³Kɛrɛ beŋ, bendo mbɛndaŋ bi niyɛ lanɛya beŋ, beŋ thiyo haliko beŋ be niyɔ biya bikuyankaŋ, kɛrɛ baŋ mɛkɛŋ ba kuyankaŋ kubɛina niyɔ kabari wo peyene ŋafiyo ŋanɛnɔy ŋa ka thathukuma thakendeŋ thaŋ ba bena kɛriŋiyɛ. Kɛrɛ mathimo ma niyɛŋ haaŋ beŋ masiyande.

¹⁴Siraŋ babunthu baŋ fooma bɛŋ kɔminando ka yamari wunthe nape, na “Thimo ntɔ nda na nɔŋ na thimo yi yɛthɛ bakɛnda.”

¹⁵Kɛrɛ mɛnɛ beŋ ni nɔŋ maamiŋ bi ka hee ba ka niyande muthoonɛ, tuteŋ thukuma beŋ kɔŋ tete teetuwande.

¹⁶Haŋ haŋ huna tepe yaŋ haŋ: Yina wo ka Masaala woŋ katitɔkɔiŋ siini bakendeŋ baŋ, wuna sa beŋ thiŋiŋ ŋafiyo ŋanɛnɔy ŋa ka huwɔmɛtiya hukendeŋ haŋ.

¹⁷Ba thimo huwɔmɛtiya hukɛntuŋ haŋ baŋ ba kiŋ ka sokinoko iŋ ba thimo Yina wo ka Masaala woŋ baŋ, awa ba thimo nɛnɛ Yina woŋ baŋ ba kiŋ ka sokinoko iŋ huwɔmɛtiya hukɛntuŋ haŋ. Munkiŋ mumuye muŋ muŋ mu kiŋ ka dekiyande. Wuŋ, wuna dɔmɛ beŋ sa punku ba niya ba thimo beŋ ba niya baŋ.

¹⁸Mɛnɛ Yina wo ka Masaala woŋ katitɔkɔy bena, beŋ ka nda ka pothi ka makɛrɛŋ ma ka Siraŋ baŋ maŋ.

¹⁹Bɛyiniŋ banɛnɔy ba thimo huwɔmɛtiya haŋ ba niya baŋ ba kothiyo bɛna nagberekethe: ŋabɛi, ŋafiyo ŋanɛnɔy, ba niyɔkɔ nɔŋ maamiŋ bi ka hee,

²⁰ba niya dekɛŋ kubatho, iŋ ba yɔla haŋ maa ba kaa ka bayɔliŋ beŋ. Biya bi kɔŋ thayande e dekiya, e kutiyande hunaŋ, e thɔɔ ka mathoŋ, e niyɔ milɛ, e hakuwande masɔɔni masɔɔni e kɔ dekiyande.

²¹Bi kɔŋ kutiyande kuhɔti, e thiiye haaŋ e yilɔ, yameŋ ntiŋ bɛy ka yakaliŋ baŋ, e niya bɛyiniŋ banɛnɔy nthɔŋ nda fooma nɔŋ baŋ baŋ. Yaŋ yeli bena nɔŋ na yeli nde nthɔŋ yaŋ bena na: bindɛ fooma bi ni bɛyiniŋ baŋ baŋ beŋ, bindɛ sa kutu Hugbakine hu ka Masaala haŋ.

²²Kɛrɛ mutiŋ mu sisi Yina wo ka Masaala woŋ muŋ kaake ka thathukuma tha ka biyamɛti mu kiŋ mathimiyande, mayehitɔkɔ, mathɛbɛ, muyuŋ, amasiyande, ani bayɔhɔy, aniyande lanɛya,

²³mathathinɔkɔ, ba kɛriŋiyɛ yɛthɛ nda. Siraŋ ka nda ba sɔkinɔkɔ bɛyiniŋ baŋ baŋ.

²⁴Awa bindɛ bi biiyo iŋ Kraist Yisɔs beŋ thanki nda kɔra maniyɔ ma ka huwɔmɛtiya haŋ maŋ iŋ ŋafiyo ŋanɛnɔy ŋabɛina fooma ka kuyeŋ kubariŋande ku ka Kraist koŋ.

²⁵Yina wo ka Masaala woŋ dunkune mina siini bakɛntuŋ baŋ, awa wundɛ kiŋ nɛnɛ ba mina kɛriŋiyɛ.

²⁶Miŋ ka ba niyɔkɔ kabanɛ, maa ba thiyande ka mathoŋ, maa ba kutiyande kuhɔti.