Read West-Central Limba BiKaletiya beŋ 6 Bible Online

BiKaletiya beŋ 6 - West-Central Limba bible

BiKaletiya beŋ 6

¹Mbɛndaŋ bi niyɛ lanɛya, mɛnɛ wɔ wunthe ka beŋ boho ka niya banɛnɔy, beŋ, bendo kɛriŋiya iŋ Yina wo ka Masaala woŋ beŋ, kiŋ ba niŋ pinda. Kɛrɛ beŋ kiŋ ba wuŋ niye ka gboŋa bathɛbɛ, e beŋ niya kuthɛgbɛ haliko beŋ hɛlɛŋ beŋ be tha ŋɔti ka kuthiiki kunthe kubɛina.

²Masiyandeŋ makahoni makendeŋ. Ka gboŋa babɛina beŋ putiyɔy siraŋ ba dunkuŋ Kraist baŋ.

³Mɛnɛ wɔ simɔkɔy ba wundɛ niyɔ ntha kiwaŋ mahɛŋ mabɛina wundɛ ka ntha yo ntha, yɛthɛ nama ma hɔkɔŋ thɔkɔŋ.

⁴Wɔ yo wɔ wundɛ kɔnsiŋiniyɔkɔyŋ maniyɔ makɛnama. Mɛnɛ wundɛ kute mɛŋ ba mɛŋ yɔhɔ, ndɛ niyɔkɔyŋ kukabanɛ ba ba thanki wundɛ niya baŋ, hali wundɛ tha dɔinɔkɔ ba bɛŋ thubutunande iŋ ba ni ntɔ nama baŋ.

⁵Wɔ yo wɔ kiŋ ba tutɔkɔ gbɛthɛŋ ba ka maniyɔ makɛnama.

⁶Wɔ yo wɔ wo thankɛ thaninuwo Huseri Huyɔhɔy hu ka Kraist haŋ, wundɛ kiŋ ba hanande fooma bɛyiniŋ bayɔhɔy ba wundɛ kutu baŋ iŋ karimɔkɔ wokɛnama woŋ.

⁷Baŋ thɔkinɔkɔ. Masaala ntha thɔkina kutɛ. Wɔ yo wɔ kɔŋ ŋɔŋ wu paye wundɛ.

⁸Mɛnɛ yi paye ka ŋafiyo ŋa ka huwɔmɛtiya haŋ ŋaŋ, yi kɔŋ ŋɔŋ tuka. Mɛnɛ yi paye ka Yina wo ka Masaala woŋ, yi kɔŋ ŋɔŋ sii ba kɔy yo kɔy.

⁹Bɛna miŋ bɛiŋ thamɔ ba niya bayɔhɔy, baa mɛnɛ miŋ tha thamɔ, malɔkɔ mɛ kɔŋ nɔŋ see ma miŋ ŋone.

¹⁰Huna timo tima ti yi niiye iŋ hɛɛra baŋ, niya bayɔhɔy ka wɔ yo wɔ, yameŋ ntiŋ bɛy bi miŋ mpoo kinthe beŋ ka lanɛya baŋ beŋ.

¹¹Yaŋ gbale wubukuyuwɛ na nda yaŋ bena gbalite iŋ yɔnkɔ niŋ haŋ gbeeŋ.

¹²Biya bi yɔli ba bena pithita ba thiyo ka bintɔni ndeŋ beŋ ba haliko ba yeroko iŋ Masaala, bindɛ bina biya bi thimo ba tɔŋinɔkɔ beŋ iŋ ba niyɔkɔ kukabanɛ ba bɛyiniŋ ba ka gbada hɔkɔŋ. Bindɛ ni wuŋ haliko ba kuta na sa bindɛ niyo thɔrɔ ba Kraist.

¹³Hali hintiŋ bindɛ bi thiyɔy ka bintɔni namɛŋ beŋ haliko ba yeroko iŋ Masaala bindɛ putiyeta Siraŋ ba ka Musa baŋ. Bindɛ thimoŋ hɔkɔŋ bena ba beŋ thiyo ka bintɔni ndeŋ haliko ba bi be kutu na bindɛ niyeke kukabanɛ ba dɔma na beŋ thiyo ka bintɔni ndeŋ.

¹⁴Kɛrɛ ba yaŋ, yaŋ kɔŋ niyeke kukabanɛ kuyeŋ kubariŋande ku ka Mariki ntuŋ woŋ Yisɔs Kraist hɔkɔŋ nagbɛti. Ba saathɛ ba ka kuyeŋ kubariŋande koŋ, bɛyiniŋ ba ka dunia baŋ baŋ ba kiŋ nda ba tukɛ ka kuwaŋ kukiyaŋ koŋ, awa yaŋ hɛlɛŋ yando tukɛ ka bɛŋ.

¹⁵Thiyo ka bintɔni nda maa ba thana thiyo ka bintɔni nda sɔkɔ hukolo kutɛ. Kolo baŋ bɛna ba niyɔ wɔ ŋama.

¹⁶Bindɛ bi yeŋ madɛɛnki maŋ maŋ beŋ ka siini bakɛnamɛŋ baŋ, haliko mathɛbɛ iŋ makutiyɛ ma niyɔ iŋ bindɛ iŋ biya bi ka Masaala beŋ fooma!

¹⁷Ba nda gbanthina, wɔ yo wɔ bɛiŋ nda yama ni thɔrɔ, baa thabinthɛŋ tha ka kɔtɔ kukiyaŋ koŋ thaŋ tɔŋɔŋ ba dɔma na yaŋ kiŋ waayi wo ka Yisɔs.

¹⁸Haliko Mariki ntuŋ woŋ Yisɔs Kraist toŋine bena fooma mathimo, mbɛndaŋ beŋ. Amiina.