Read West-Central Limba BiƐfɛsɔsi beŋ 4 Bible Online

BiƐfɛsɔsi beŋ 4 - West-Central Limba bible

BiƐfɛsɔsi beŋ 4

¹Huna, yaŋ Pɔli, wo thiyo ka yeeli ba na yaŋ niyiyɛ Mariki woŋ wali, yaŋ theteke bena ba beŋ niyɔ nɔŋ biya bi thiyi Masaala ba nɛŋ bindɛ niyiye.

²Niyɔŋ bendo thathinɔkɔy lɔkɔiŋ fooma awa baŋ niyɔ biya bi ŋatinɔkɔy. Tɔŋinaŋ thimiyande ndeŋ haŋ maŋaye ka niyande ndeŋ muyuŋ haŋ.

³Yɔlaŋ ti punke beŋ ba kaa ka kɔtɔkɔy bohinande hu bohinande bena Yina wo ka Masaala woŋ haŋ, maŋaye ka mathɛbɛ ma bohinande bena ka tha banthe maŋ.

⁴Kɔtɔ kunthe kuna miŋ fooma, awa Yina wo ka Masaala wunthe napethi ndɛ na kɛndɛ, nɔŋ na kahe nthɔŋ beŋ fooma ntha kinthe kibɛina thukuma na, ki ni nde Masaala lahiri ba bena dunkune kiŋ naa thiyi ndɛ bena.

⁵Mariki wunthe na iŋ miŋ, wɔ wunthe na niye miŋ lanɛya, awa biyo hunthe hu ka Masaala huna iŋ miŋ.

⁶Masaala wunthe na iŋ miŋ, awa ndɛ na Fanda ka biyamɛti fooma. Wundɛ na Mariki wo ka biyamɛti fooma, ndɛ kɔŋ mina niye wali fooma, awa ndɛ kiŋ mina kaake fooma.

⁷Kɛrɛ wɔ yo wɔ ka miŋ dunkuno munkii muthɔɔkɔ mu thubuto iŋ Kraist wo muŋ dunkuŋ woŋ.

⁸Nɔŋ na tepe magbali ma ka Masaala maŋ na, na “Naa ŋate ndɛ ka thinthi-ka thinthi ka, ndɛ diŋe ka kaa biya bi boho ka kuyombo bibɔyɛ; e ndɛ dunkune biyamɛti munkii.”

⁹Ka tete, mbɛ mu miŋ dɔŋ, “ndɛ ŋate ka thinthi-ka thinthi”? Wuŋ thɔyande ba dɔma ndɛ yenke saa ka pothi-ka pothi ka faido.

¹⁰Huna, ndɛ wo thuhɛ ka pothi-ka pothi woŋ, ndɛ wunthe wobɛina na ŋatɛ ka thinthi-ka thinthi e daŋande arianɛŋ beŋ e kaa ka Masaala ka, haliko ba kuntheeke kamo kama.

¹¹Wundɛ wunthe wobɛina na “dunkunɛ munkii ka biyamɛti.” Munkii mubɛina muna muŋ muŋ baŋ: biya binɔndi baseriŋ bithɔɔkɔ, binɔndi banabiŋ, binɔndi ba kaa kaŋ niya kɛwandi Huseri Huyɔhɔy haŋ, awa binɔndi ba dethiteke biya bi ka Masaala beŋ mɛnɛ ba bindɛ thaninuwa.

¹²Wundɛ ni wuŋ baŋ haliko ba kɔsinɔkɔ biya bi ka Masaala beŋ ba niya wali bakɛnama baŋ, mɛnɛ ba bukuyina kɔtɔ ku ka Kraist koŋ.

¹³Wuna miŋ fooma see ka tha banthe ka lanɛya ntuŋ banthe babɛina iŋ kɔthɔ ntuŋ Hati wo ka Masaala woŋ haŋ. Miŋ kɔŋ niyɔ kalani bi thiyɛ thathukuma e miŋ doŋe nanthe iŋ Kraist ka kusaŋa.

¹⁴Wuna sa nɔŋ nda miŋ niyɔ nɔŋ mpatiyɛŋ bi katitoko iŋ thamunkulu tha gbantando iŋ huru hu hɔŋ namo nama haŋ. Huru hubɛina huna mathanani ma ka biya bi thɔkɔŋ biya beŋ e bindɛ kɔ kata biya ka bindɛ niye hakɛ ka ŋakɔɔthani ŋa bindɛ ni ŋaŋ.

¹⁵Mɛnɛ miŋ gbonkoy nɔndi baŋ e miŋ thimiyande, miŋ kɔŋ niyɔ kalani bi thiyɛ thathukuma ba kɔthɔ bɛyniŋ fooma nɔŋ na Kraist na, wo bayaha woŋ ka kɔtɔ koŋ.

¹⁶Ka kɛriŋa nama haŋ, kɛna sɔkuwande ŋafɛŋ ŋahakuwande ŋa ka kɔtɔ koŋ ŋaŋ fooma ka tha banthe. Awa kɔtɔ kubunthu koŋ bohinando ka tha banthe maŋaye ka masɔkuwande yo masɔkuwande ma ka kɔtɔ koŋ maŋ. Huna, naa kufɛŋ ndo kufɛŋ ni wali nɔŋ na kuŋ ba niye wali, kɔtɔ kubunthu koŋ ku kɔŋ kutu kusaŋa e kuŋ bukuya maŋaye ka mathimo.

¹⁷Huna, ka keŋ ku ka Mariki woŋ koŋ, yaŋ tepe bena ba bena yela, baŋ nda niyɔ nɔŋ biya bi be kɔthɔ Masaala na beŋ, bi masiyi namɛŋ mamayɛini maŋ,

¹⁸bi haaŋ hɛ bi kiŋ ka huntuma haŋ ba thana hakiyando bɛy yo bɛy. Bindɛ ka iŋ kufɛŋ ka sii ba Masaala dunkuŋ baŋ, baa ŋanapi namɛŋ ŋaŋ ni ba bindɛ thana hakiyando bɛy yo bɛy.

¹⁹Bindɛ ka nda iŋ kuyaahu hali, awa bindɛ thanki dɛŋɔkɔ gbai. Lɔkɔiŋ fooma bi thimoŋ ba niya bɛyniŋ baŋayaahu.

²⁰Nɛŋ kutɛ thanuwe nde beŋ ba Kraist.

²¹Beŋ thanki nde yuyɛ ba wundɛ, awa beŋ, nɔŋ biya bi niŋ yeŋ, beŋ thanki nde thaninuwo nɔndi ba kuto ka Yisɔs baŋ.

²²Baŋinɔkɔŋ maniyɔ ndeŋ ma ka huwɔmɛtiya haŋ matiyɔ maŋ, ma niyɛ nde bena ba beŋ niyɔ nɔŋ na nde beŋ na, maniyɔ matiyɔ ma teetuwo iŋ ŋafiyoiŋ ŋathɔkɔŋ ŋaŋ.

²³Yɔkɔŋ thathukuma mɛnɛ masiyini ndeŋ maŋ niyo muŋama.

²⁴Niyɔŋ iŋ maniyɔ maŋama ma yehinuwo ka mathɔyande ma ka Masaala maŋ, ma tɔŋinɔkɔ maŋ ka sii baseŋa, bathumbɛ, iŋ bamɛthɛ baŋ.

²⁵Pɛyaŋ kɛriŋa hothi haŋ! Womo woma ka beŋ gbonkiyɛŋ nɔndi baŋ ka wɛndama wo bindɛ ka lanɛya baŋ, baa biya binthe bina miŋ fooma ka kɔtɔ ku ka Kraist koŋ.

²⁶Mɛnɛ wɔ wunthe ka beŋ thɔɔyɛ ka mathoŋ, ndɛ bɛiŋ ni ba mathoŋ mabɛina niŋ niya ba ndɛ niya hakɛ; awa ndɛ bɛiŋ yiŋ iŋ mathoŋ mabɛina.

²⁷Wɔ bɛina bɛiŋ dunkune Sithani na, Wayi Womandiŋ woŋ, hɛɛra ba niya wali nama baŋ.

²⁸Yindo barɛ ba tuwe woŋ, pɛya ba tuwe haŋ awa bɔha ba niya wali bayɔhɔy iŋ thɛnkɔ thakɛnda thaŋ, haliko yi be punku ba mase bamɔnɛŋ beŋ.

²⁹Baŋ gbonkoy thasɔkɔiŋ tha thoŋ wɔ. Kɛrɛ gbonkiyaŋ thasɔkɔiŋ tha ni wɔ kuthɔnthɔ ba niya bayɔhɔy, thasɔkɔiŋ tha sisande ka lɔkɔ baŋ baŋ, wuna thasɔkɔiŋ tha beŋ tɛpi thaŋ ni bayɔhɔy ka bi bena poniyɛ kuiha beŋ.

³⁰Baŋ ni ba Yina wo ka Masaala woŋ ŋura, baa Yina nama woŋ na thɛnkɛi ba tɔŋɔŋ ba Masaala bena biyɔ. Yina nama woŋ na kahitinɛ ba dɔma na lɔkɔ ba kɔŋ nɔŋ see, Masaala kɔŋ bena bakaŋ.

³¹Pɛyaŋ kɔsina mathoni maŋ ba bintɔni ndeŋ, baŋ tɔɔki thukuma, baŋ thɔɔ ka mathoŋ. Pɛyaŋ bɛnda ka gbonkiya haŋ maa mayakiŋ maŋ. Pɛyaŋ thambiyande haŋ.

³²Kɛrɛ niyɔŋ bendo niyande bayɔhɔy iŋ thathukuma tha ba niya bayɔhɔy. Pɛniyandeŋ banɛnɔy bakendeŋ baŋ nɔŋ na pɛniyɛ bena Masaala na saathɛ ba Kraist.