Read West-Central Limba BiƐfɛsɔsi beŋ 5 Bible Online

BiƐfɛsɔsi beŋ 5 - West-Central Limba bible

BiƐfɛsɔsi beŋ 5

¹Na nda beŋ mpati bi ka Masaala bi thimo wundɛ beŋ, yɔkɔŋ beŋ be niŋ yemitɔ.

²Yemitɔŋ Kraist na ba thimo biya bihɛna nɔŋ na thimo mina Kraist na e dunkuna yɛthɛ nama baŋ ba miŋ nɔŋ munkii mɛnɛ saraka ba yeheŋ Masaala na thukuma.

³Na nda beŋ biya bi ka Masaala, thasɔkɔiŋ tha ka banɛnɔy, mɛnɛ bɛyniŋ banɛnɔy nɔŋ baŋ baŋ, mɛnɛ milɛ, bɛyniŋ nɔŋ baŋ baŋ ba bɛiŋ kuto kendeŋ.

⁴Wuŋ sisandeta ba beŋ gbonkiya magbonkoy ma sa gbonkiya ka biya; baŋ gbonkoy mayɛini, awa baŋ gbonkoy thabɔrɔiŋ tha ka banɛnɔy tha ni ba biya hɛtha. Kɛrɛ niyeŋ thahothi ndeŋ thaŋ wali ba thiya Masaala na maamo.

⁵Kɔthɔŋ ba dɔma na babɛy, maa wɔ wo ni bɛyniŋ banɛnɔy nɔŋ baŋ baŋ, maa bamilɛ—baa ba niyɔ iŋ milɛ wuŋ thɔɔyande nɔŋ ba niya deka kubatho—wɔ nɔŋ woŋ baŋ ka iŋ kufɛŋ ka Hugbakine hu ka Kraist haŋ iŋ Masaala.

⁶Baŋ mɛkɛŋ ba wɔ yo wɔ bena thɔkina iŋ thampɛŋ thamayɛini, baa ba bɛyniŋ banɛnɔy baŋ baŋ bɛna dɔmɛ mathoŋ ma ka Masaala maŋ niyɔ ka bi sa niŋ putiyɔ beŋ.

⁷Wuna baŋ tikitande iŋ biya bibɛina bi ni bɛyniŋ baŋ baŋ beŋ.

⁸Mayoŋ nde bendo ka huntuma haŋ, kɛrɛ ka tete beŋ kiŋ nda ka waŋ baŋ baa beŋ kiŋ nda biya bi ka Mariki woŋ. Wuna niyɔŋ nɔŋ biya bi ka waŋ baŋ,

⁹baa waŋ baŋ bɛna sisi mutiŋ mu ni ba biya niya bɛyniŋ bayɔhɔy, bathumbɛ, mɛnɛ baseŋa.

¹⁰Awa yɔlaŋ ba thanuwa ba yehe Mariki woŋ.

¹¹Baŋ nda thɔɔtɔ ka bɛyniŋ bamayɛini ba ka huntuma haŋ, kɛrɛ sisaŋ bɛŋ ka waŋ baŋ.

¹²Ba wu kiŋ kuyaahu hali ba gbonkiya ba bɛyniŋ ba biya bi ka huntuma haŋ ni ka gbundu baŋ.

¹³Mɛnɛ bɛy yo bɛy siso ka waŋ baŋ ba kɔŋ kuta nagberekethe na bɛŋ.

¹⁴Ba ntha yo ntha ki kuta nagberekethe kiŋ niyɔy waŋ. Wuna biyɛ wuŋ domo, na “Thɔhɔ ka nine haŋ, e yi ŋayi ka tuka haŋ, awa waŋ ba ka Kraist baŋ ba kɔŋ yina bende.”

¹⁵Niyaŋ kuthɛgbɛ na beŋ niiye. Baŋ niyɔ nɔŋ biya bithɔkɔy, kɛrɛ nɔŋ biya bikele.

¹⁶Niyaŋ bɛy bayɔhɔy ka hɛɛra yo hɛɛra ba beŋ kutu, baa malɔkɔiŋ maŋ maŋ anɛnɔ.

¹⁷Wuna, baŋ niyɔ bendo thɔkɔy, kɛrɛ kɔthɔŋ ba thimo Mariki woŋ ba beŋ niya.

¹⁸Baŋ yilɔ iŋ mampa baa ma kɔŋ bena teeti, kɛrɛ Yina wo ka Masaala woŋ kɛriŋiyɛŋ bena.

¹⁹Gbonkiyandeŋ ka thampɛŋ tha ka ŋaiŋa ŋa ka magbali ma ka Masaala maŋ mɛnɛ ŋaiŋa ŋa ka Yina nama woŋ ŋaŋ, e beŋ sɔnkita Mariki woŋ iŋ thathukuma ndeŋ thaŋ fooma.

²⁰Thiyaŋ Masaala, wo Fanda ntuŋ woŋ, maamo lɔkɔiŋ fooma ba ntha yo ntha, ka keŋ ku ka Mariki ntuŋ woŋ Yisɔs Kraist.

²¹Mɛyiyandeŋ baa beŋ thiyeŋ Kraist na yiki.

²²Bendo yɛrɛmɛŋ biyɛntɔy mɛyiyaŋ biwanda ndeŋ yamari nɔŋ na beŋ mɛyi yamari ka Mariki woŋ.

²³Ba bayɛnti woŋ na bayaha woŋ ba wɔtɔ nama nɔŋ na Kraist bayaha na ka biya bi ka Masaala beŋ, bi nɔŋ kɔtɔ nama koŋ, e ndɛ niyɔ banikisi namɛŋ.

²⁴Nɔŋ na biya bi ka Masaala beŋ kɛriŋiya iŋ Kraist na, nɛna yɛrɛmɛŋ beŋ ba keriŋiyo iŋ biwandamɛŋ ka bɛy yo bɛy.

²⁵Yindo yɛntɛ thimo wɔtɔ nda nɔŋ na thimo Kraist biya bi ka Masaala beŋ na e dunkuna yɛthɛ nama baŋ ba bindɛ.

²⁶Wundɛ ni wuŋ baŋ haliko ba dɛŋa biya bi ka Masaala beŋ thɔɔkɔ ba wundɛ, maŋaye ka mɛthina bindɛ iŋ biye hu ka mandi maŋ haŋ mɛnɛ thampa tha ka Masaala thaŋ,

²⁷haliko ba dunkuna biya bi ka Masaala beŋ ka yɛthɛ nama, biyɔhɔy ka detha, bimɛthɛ mɛnɛ bi ka iŋ ka bindɛ boho thɛkɛ, bi ka iŋ tɛmpɛ maa yethi hu ka hukalaŋ, maa bɛy yo bɛy bahɛna banɛnɔy.

²⁸Nɛna hɛlɛŋ bayɛnti woŋ ba thimo wɔtɔ nama nɔŋ na thimo ndɛ kɔtɔ nama koŋ na. Bayɛnti wo thimo wɔtɔ nama, ndɛ athimo yɛthɛ nama baŋ.

²⁹Wɔ o ka wo thambo kɔtɔ nama koŋ. Kɛrɛ ndɛ kɔŋ kuŋ thɛriyɛ e kuŋ dethiteke wuyɔhɔy nɔŋ na ni Kraist biya bi ka Masaala beŋ na,

³⁰baa miŋ kiŋ kufɛŋ ka kɔtɔ nama koŋ.

³¹Ba magbali ma ka Masaala maŋ tepe, na “Ba saabu baŋ baŋ huna wɔ wathe peyene fandama na mɛnɛ nandama e bɔhande ka tha banthe iŋ wɔtɔ nama, awa biya bibiye beŋ beŋ see nda niyɔ nɔŋ wɔ wunthe.”

³²Nɔndi ba nɔŋ ka gbundu baŋ tɔŋinɔkɔy ka magbali ma ka Masaala maŋ maŋ ma yaŋ tɛpi maŋ naa yaŋ gbonkoy ba Kraist mɛnɛ ba biya bi ka Masaala beŋ.

³³Ma kiŋ hɛlɛŋ ba beŋ: bayɛnti o bayɛnti kiŋ ba thimo wɔtɔ nama na nɔŋ na thimo ndɛ yɛthɛ nama baŋ na. Awa yɛrɛmɛ yo yɛrɛmɛ woyɛntɔy thiyɛŋ wandama na yiki.