Read West-Central Limba BiFilipay beŋ 2 Bible Online

BiFilipay beŋ 2 - West-Central Limba bible

BiFilipay beŋ 2

¹Kraist kiŋ ka niya bena kuthɔnthɔ. Mathimo nama maŋ thaayi bena. Beŋ bohinande iŋ Yina wo ka Kraist woŋ. Beŋ niyɔy nda biya bi niyande bayɔhɔy mɛnɛ bi kutiyande nkinikiniŋ.

²Yaŋ gbakite bena wusɔbɛ-sɔbɛ, ba beŋ niyɔ iŋ masiyi manthe, mathimo manthe, mɛnɛ thathukuma tha ba niyande barɛy, wuna yaŋ niyɔ iŋ mayehitɔkɔ mamandiŋ.

³Baŋ ni bɛy yo bɛyba yɛthɛ bakendeŋ hɔkɔŋ maa ba gbuŋunɔkɔ, kɛrɛ niyɔŋ biya bi thathinɔkɔy ka wunthe iŋ ntɔ nama. Siyuwaŋ timo tima ba wuŋ niyɔ na biya bihɛna bi yameŋ niyɔ waŋ ayaŋ ba beŋ.

⁴Wɔ bɛiŋ niyɔ ka beŋ ba dɔma na yɛthɛ nama tute ma thukuma hɔkɔŋ, kɛrɛ ndɛ tuteŋ bɛy ba ka ntɔ nama thukuma.

⁵Maniyɔ ma beŋ ba niyɔ maŋ mɛna nde iŋ Kraist. Maniyɔ mabɛina mɛna maŋ maŋ:

⁶Wo nde Masaala woŋ, kɛrɛ ndɛ tha lenthiyɔkɔ ba doŋe nanthe iŋ Masaala.

⁷Huna, ka mathimo makɛnama maŋ, ndɛ deŋe maniyɔ ma ba niyɔ Masaala, awa e ndɛ sɛkitha maniyɔ ma ka bawali, e ndɛ si mpoo nɔŋ na biyamɛti mpoo na, awa e ndɛ si niyɔ wɔmɛti.

⁸Ndɛ thathinɔkɔy e ndɛ niyɔ wɔmɛti, e ndɛ mɛya ba putiyɔ Masaala na ba tuka, awa hali ba tuke ka kuyeŋ kubariŋande koŋ.

⁹Ba saabu baŋ baŋ, huna ŋatine niŋ Masaala ka thinthi-ka thinthi, e ndɛ niŋ dunkune keŋ ku ŋatɛ ka thinthi e wuŋ daŋande keŋ ndo keŋ kuhɛna.

¹⁰Huna naa keŋ ku ka Yisɔs koŋ koyiŋo, wɔ yo wɔ ka ariana, ka faido, mɛnɛ ka kuyɛkɛŋ koŋ ka pothi, ndɛ kɔŋ kunthuŋuyɛ Yisɔs na.

¹¹Awa wɔ yo wɔ kɔŋ koyoŋ ba dɔma na Yisɔs Kraist Mariki na ndɛ. Naa wuŋ niye nɛnɛ nɛŋ, Masaala wo Fanda ntuŋ woŋ kɔŋ kutu yiki bamandiŋ.

¹²Huna binyathikiŋ niŋ bi thimo yaŋ, mɛyaŋ yamari nɔŋ na bare nɔŋ nthɔŋ beŋ mɛya yamari na. Baŋ hɔkɔŋ mɛy yamari ba na kute beŋ yama, kɛrɛ hali mahɛŋ makiyaŋ, mɛyaŋ yamari. Kaaŋ ka kɔtɔkɔy yɔlɔkɔ ba thankinuwa kisi ndeŋ baŋ iŋ payɔ mɛnɛ kaŋ thunkunuwa Masaala na,

¹³baa timo tima Masaala kiŋ ka niyɔ wali ka siini bakendeŋ ba bena niya biya bi thimo ba niya bɛyi yo bɛyi, awa iŋ biya bi mɛyɛ ba niya mathimo nama maŋ.

¹⁴Niyaŋ bɛy yo bɛy ka thana gbonkiyɔkɔ maa ka thana niya ŋagbakali,

¹⁵wuna beŋ niyɔ mpati bi ka Masaala bi pankɔy bɛy mɛnɛ bimɛthɛ, bi ka iŋ hakɛ ka mateete ma ka fay wo iŋ biya binɛnɔy mɛnɛ bahakɛŋ. Kɛna beŋ toŋine waŋ bakendeŋ baŋ ka faido nɔŋ sosɛŋ beŋ,

¹⁶naa beŋ bindɛ dunkune huseri hu sisi sii baŋ haŋ. Mɛnɛ beŋ ni wuŋ, yaŋ kɔŋ niyɔ iŋ saabu ba yaŋ bukuineke ba beŋ ka malɔkɔ ma Kraist see, baa wu kɔŋ tɔŋɔŋ ba wuŋ niyɔ na yɔlɔkɔ niŋ haŋ mɛnɛ wali niŋ baŋ tha niyɔ ba gboŋ.

¹⁷Thampo yaŋ kɔŋ tuku awa wasi niŋ baŋ ba kɔŋ niyɔ nɔŋ munkiy mu ndinta ka saraka ba beŋ fuŋuŋ ka Masaala baŋ, awa saraka ba beŋ fuŋuŋ ka Masaala baŋ ba kɔŋ niyɔ piteke hu piteke beŋ niŋ haŋ. Naa wuŋ niyɔy nɛŋ, yaŋ kɔŋ yehitɔkɔ iŋ beŋ,

¹⁸awa yɔkɔŋ beŋ be nɛnɛ yehitɔkɔ ka nanthe iŋ yaŋ.

¹⁹Yaŋ ani lanɛya ba Mariki woŋ Yisɔs kɔ mɛkina ba yaŋ ŋinda Timothi na kendeŋ ka ka wuthurɔy wuŋ, huna yaŋ thɛbɛŋ thukuma ba beŋ ka huseri hu ndɛ yama diŋiyɛ haŋ.

²⁰Wundɛ wuntheŋ napethi ndɛ na yaŋ masiyi manthe, awa ndɛ kɔŋ ni wali ba wuyɔhɔy wukendeŋ.

²¹Wɔ yo wɔ bɛybakɛnama tute ma thukuma, wuŋ ka ba niya wali ba ka Yisɔs Kraist baŋ.

²²Awa beŋ yaathi, beŋ kɔthɛŋ ba wuŋ niyɔ na Timothi wɔ na wo tɛŋɛ ba niya wali ba ka Huseri Huyɔhɔy haŋ baŋ iŋ yaŋ ka nanthe, nɔŋ na hati ni wali ka nanthe iŋ fandama.

²³Yaŋ kɔŋ tute thukuma ba yaŋ niŋ kɔ ŋinda kendeŋ ka naa yaŋ kute na wuŋ yama niye.

²⁴Awa yaŋ ani Mariki woŋ lanɛya ba wuŋ niyɔ na yaŋ gbeeŋ yaŋ kɔŋ punku kɛndɛ kaa ka wuthurɔy wuŋ.

²⁵Yaŋ siyi nde ba wuŋ kɔ niyɔ wuyɔhɔy ba kɛndɛ ŋinda Ɛpafurodaitɔsi na, wo ni yaŋ wali ka tha banthe woŋ, awa e miŋ niya hukurugba ka nanthe ba dekiya kuyombo ku ka Kraist koŋ, awa e ndɛ niyɔ baseri ba beŋ ba yama mase.

²⁶Ndɛ thɔkɔti niyɔ kufiyo ba bena kuta fooma, awa ndɛ see teetuwɔ thukuma wumandiŋ ba na yuye beŋ ba wuŋ niyɔ na ndɛ thoono.

²⁷Wundɛ thoono haaŋ e ndɛ niye tuke, kɛrɛ Masaala kutiye niŋ nkinikiniŋ, awa wuŋ ka hɔkɔŋ ndɛ wuthɔ kɛrɛ iŋ yaŋ hɛlɛŋ gbeeŋ, haliko wu be tha nde yama niyɔ nkinikiniŋ wumandiŋ.

²⁸Haaŋ hɛ yaŋ kiŋ iŋ kufiyo ba niŋ ŋinda kendeŋ ka, ba haliko beŋ ba niyɔ iŋ mayehitɔkɔ naa beŋ kute hɛlɛŋ niŋ, awa yaŋ be tha nda hɛlɛŋ niyɔkɔ yaagba ka yɛthɛ bakiyaŋ.

²⁹Huna yɛritɔŋ niŋ iŋ mayehitɔkɔ nɔŋ wɛnda ndeŋ ka Mariki woŋ. Dunkuneŋ niŋ yikiŋ fooma ba sisande beŋ ba niŋ dunkune iŋ biya bihɛna nɔŋ wundɛ,

³⁰baa ndɛ niye tuke ba saathɛ ba wali ba ka Kraist baŋ, haliko ba dunkuna kumase ku sa nde beŋ punku dunkuna koŋ.