Read West-Central Limba BiKalasi beŋ 3 Bible Online

BiKalasi beŋ 3 - West-Central Limba bible

BiKalasi beŋ 3

¹Naa ŋayino Kraist ka tuka haŋ, beŋ ŋayino iŋ wundɛ. Wuna niyɔŋ kufiyo ba bɛyiniŋ ba ka ariana baŋ, ka doŋe Kraist ka yɔnkɔ huthome hu ka Masaala haŋ, ka tha ka yiki ka.

²Thiyaŋ masiyi ndeŋ ka bɛyiniŋ ba ka ariana baŋ, wuŋ ka ka bɛyiniŋ ba ka faydo baŋ.

³Wuŋ thɔyande nɔŋ beŋ tuku awa siini ndeŋ bagbeeŋ baŋ kosino wuthɛbinɛ thukuma iŋ Kraist baa beŋ bɔhande nda iŋ Masaala.

⁴Saabu ba ka siini bakendeŋ bagbeeŋ baŋ wu kiŋ ba niyɔ nɔŋ Kraist. Ti wundɛ tɔŋinɔkɔ hɛlɛŋ ka faydo, beŋ hɛlɛŋ nɛŋ beŋ kɔŋ niyɔ iŋ wundɛ e beŋ hanande hudinhaŋiya nama haŋ.

⁵Pɛyaŋ ba thɛbina ŋafiyoiŋ ŋanɛnɔy ŋa ka faydo ŋa bena ŋaŋ, thiyitaŋ kufiyo ku ba ŋɔɔ iŋ yɛrɛmɛ wohɛna, ŋafiyoiŋ ŋanɛnɔy, kufiyo ku ba niya hakɛ, mɛnɛ ba niyɔ milɛ, wu thɔyande wuŋ nɔŋ ba niya deka kubatho.

⁶Saathɛ ba bɛyiniŋ banɛnɔy baŋ baŋ, mathoŋ ma ka Masaala maŋ ma kɔŋ see ka bi tha niŋ mɛyiyɛ yamari beŋ.

⁷Malɔkɔ thanki daŋande, beŋ bareŋ nde niya ba bena ŋafiyoiŋ ŋanɛnɔy ŋaŋ ŋaŋ tepe ba beŋ niya baŋ, naa nde siini ndeŋ baŋ kɛriŋiya iŋ ŋɛŋ.

⁸Kɛrɛ ka tete, beŋ kiŋ ba peneke bɛyiniŋ banɛnɔy baŋ baŋ: mathoŋ, thoona thukuma haŋ, mɛnɛ ba niyɔ iŋ mathambo. Mayakiŋ mɛnɛ magbonkoy manɛnɔy ma bɛŋ niyɔ ka thahothi ndeŋ thaŋ.

⁹Pɛyaŋ tɛpiyande thahothi thaŋ, baa beŋ ka nda iŋ thathukuma ndeŋ thatiyɔ thaŋ iŋ maniyɔ manɛnɔy namɛŋ maŋ.

¹⁰Beŋ kiŋ nda iŋ thathukuma thaŋama. Wɔ bɛina woŋama woŋ baŋ siiya Masaala na yehinuwɛ niŋ. Masaala kɔŋ key ka kɔtɔkɔy ba niŋ thikipa wuna wundɛ niyɔ nɔŋ wundɛ, haliko beŋ be kɔthɔ fooma ba wundɛ.

¹¹Saathɛ ba ba thanki Masaala niya baŋ, mahakande yo ka nda mateete ma ka biYusu beŋ mɛnɛ biya bi ka siyani bahɛna baŋ beŋ, mateete ma ka biya bi thiyɔy ka bintɔni namɛŋ beŋ nɔŋ na biYusu beŋ thiya na mɛnɛ biya bi sa thiya ka bintɔni namɛŋ beŋ ka gboŋa baŋ baŋ. Bɛy bawaŋ kutɛ mɛnɛ wɔ gbonkoy huyuŋ huhɛna, maa e wundɛ ŋaye ka siya ba ka biya bi pɛyɛ kahɛŋ beŋ, maa wundɛ niyɔ waayi maa kɔɔrɔ. Kraist napethi wundɛ na ntha kiwaŋ kiŋ, awa wundɛ ni yikiya kaake kendeŋ fooma.

¹²Beŋ kiŋ nda biya bi ka Masaala; wundɛ thimoŋ bena e yɛtha bena ba niyɔ bikɛnama. Bɛna yɔkɔŋ beŋ be kutiyɛ biya bihɛna nkinikiniŋ, yɔkɔŋ beŋ be bindɛ niyiyɛ bɛyiniŋ bayɔhɔy, yɔkɔŋ beŋ be niyɔ biya bithathinɔkɔy; baŋ niyɔ biya bi thiyɛ dɛnkɛŋ iŋ biya bihɛna, awa yɔkɔŋ beŋ be niyɔ bamuyuni.

¹³Niyandeŋ muyuŋ, e beŋ pɛniyande. Pɛniyandeŋ mɛnɛ beŋ kiŋ thɛkɛŋ iŋ bintɔni ndeŋ. Beŋ kiŋ ba nɛŋ niya, nɔŋ na pɛniyɛ bena Mariki woŋ na.

¹⁴Ba ndinta ka bɛyiniŋ baŋ baŋ fooma, yɔkɔŋ beŋ be thimiyande. Naa beŋ thimiyande, wuŋ niyɔy beŋ bɔhande ka tha banthe nɔŋ wɔ wunthe na beŋ, awa nɛna beŋ ba niiye.

¹⁵Kraist dunkune bena thɛbina thukuma, awa thɛbina thukuma haŋ haŋ baŋ mase bena ba yɛtha ba beŋ ni. Masaala kɔminande bena ka tha banthe fooma ba niyɔ nɔŋ kɔtɔ kunthe kuna beŋ haliko beŋ be niyɔ iŋ thɛbina thukuma haŋ haŋ baŋ. Yɔkɔŋ beŋ be thiyi Masaala na maamo ba huŋ.

¹⁶Maseri mayɔhɔy-yɔhɔy ma tepo beŋ ba Kraist maŋ ma kiŋ ba niyɔ ka thathukuma ndeŋ thaŋ. Thaninuwandeŋ e beŋ yelande ka gboŋa bakele baŋ. Sɔŋaŋ ŋaiŋa ŋa ka magbali ma ka Masaala maŋ ŋaŋ, ŋaiŋa ŋa ba Yisɔs ŋaŋ, mɛnɛ ŋaiŋa ŋa dunkuŋ Yina wo ka Masaala woŋ ŋaŋ. Sɔnkitaŋ Masaala na iŋ kuthiyi maamo ka thathukuma ndeŋ thaŋ.

¹⁷Bɛy yo bɛy ba beŋ ni maa ba beŋ gbonkoy, beŋ kiŋ ba bɛŋ niya nɔŋ biya bi niyɛ lanɛya ka Mariki woŋ Yisɔs. Awa lɔkɔiŋ fooma beŋ kiŋ ba thiya Masaala wo Fanda ntuŋ woŋ maamo, saathɛ ba Yisɔs.

¹⁸Bendo yɛrɛmɛŋ biyɛntɔy beŋ mɛyaŋ yamari ka biwanda ndeŋ, baa nɛna beŋ ba niya nɔŋ biya bi yemɛ Mariki woŋ Yisɔs na.

¹⁹Bendo biyɛthɛŋ biyɛntɛ beŋ thimoŋ yɛrɛmɛŋ ndeŋ beŋ; baŋ niyɔ bi thiyɛ dɛnkɛŋ iŋ bindɛ.

²⁰Mpati, beŋ kiŋ ba mɛya yamari ka bi mpɛɛ bena beŋ timo tima, baa wu kɔŋ yehe Mariki woŋ.

²¹Bendo komisɛŋ bibiyɛthɛŋ beŋ, baŋ thiyi mpati ndeŋ beŋ ka mathoŋ ka sisinuwa bindɛ timo tima, mɛnɛ huŋ kutɛ bi kɔŋ teetuwɔ thathukuma.

²²Bendo mbaayiŋ beŋ, mɛyaŋ yamari ka marikiŋ ndeŋ bi ka faydo beŋ ka bɛy yo bɛy, wuŋ ka ba dɔma na yɔkɔŋ ka thaaya namɛŋ na beŋ niye wali haliko ba yɔhɔ keŋ; kɛrɛ niyaŋ wali iŋ thathukuma ndeŋ fooma baa beŋ kiŋ iŋ payɔ ba Mariki woŋ Yisɔs wo ka ariana woŋ.

²³Bɛyi o bɛyi ba beŋ ni, niyaŋ bɛŋ iŋ thathukuma ndeŋ fooma, nɔŋ ka beŋ ni wali ba Mariki woŋ, wu be tha niyɔ ba dɔma na ba wɔmɛti na beŋ wuŋ niye.

²⁴Siyuwaŋ ba dɔma na Mariki woŋ kɔŋ bena thunkuŋ mu kɔsɔŋ wundɛ ba biya nama beŋ muŋ, baa Mariki woŋ Kraist na beŋ niyiyɛ wali.

²⁵Awa wɔ yo wɔ wo ni bɛyi banɛnɔy, wundɛ kɔŋ thunkuna ba bɛyiniŋ banɛnɔy ba ni wundɛ baŋ, baa Masaala kɔŋ kɔnsɔŋɔŋ wɔ yo wɔ nanthe.