Read West-Central Limba 1 BiThɛsalonaika beŋ 1 Bible Online

1 BiThɛsalonaika beŋ 1 - West-Central Limba bible

1 BiThɛsalonaika beŋ 1

¹Kuthagba koŋ koŋ ŋaye ka Pɔli, Sailasi, mɛnɛ Timothi, makey ka makɔmande ma ka balanɛyani beŋ maŋ ka mɛti ba ka Thɛsalonaika, bi nda biya bi ka Masaala beŋ, Fanda ntuŋ woŋ, mɛnɛ Mariki woŋ, Yisɔs Kraist. Haliko Masaala toŋine bena mathimo e ndɛ bena dunkune thɛbina thukuma.

²Lɔkɔiŋ fooma mindo thiyi Masaala na maamo ba beŋ, awa e miŋ hɛlɛŋ bena kɔ niyiyɛ kuraminɛ.

³Mindo siyi ba beŋ timo tima naa miŋ kɔ ni kuraminɛ ka Masaala, Fanda ntuŋ woŋ, baa beŋ thiye lanɛya bakendeŋ baŋ ka mani, iŋ na ni mathimo makendeŋ maŋ ba beŋ niya wali wukahɛ, awa iŋ ba na kahe beŋ Mariki ntuŋ woŋ Yisɔs Kraist na thukuma haaŋ hɛ.

⁴Mbɛnda ntuŋ, miŋ kɔthɛŋ ba dɔma na Masaala athimo bena, awa e ndɛ bena yɛtha ba niyɔ bikɛnama.

⁵Baa miŋ sisi Huseri Huyɔhɔy haŋ kendeŋ, wuŋ ka hɔkɔŋ ka thampɛŋ thathɔ, kɛrɛ iŋ sɛmbɛ mɛnɛ iŋ Yina wo ka Masaala woŋ. Awa miŋ thanki bena toŋine nɔŋ na niye miŋ lanɛya nɔndi ba ka Huseri Huyɔhɔy haŋ baŋ. Beŋ kɔthɛŋ na nde miŋ ka mateete makendeŋ; wuŋ baŋ wu kiŋ ba wuyɔhɔy wukendeŋ.

⁶Beŋ yemitɔy mina mɛnɛ Mariki woŋ, awa hali na niyɔy beŋ thɔrɔ na wumandiŋ, kɛrɛ beŋ yɛrɔkɔy huseri haŋ iŋ mayehitɔkɔ maŋaye ka Yina wo ka Masaala woŋ.

⁷Wuna biyɛ beŋ see nda niyɔ mathɔyande mayɔhɔy ka bi niyɛ lanɛya beŋ ka kuyɛkɛŋ ku ka Masidoniya mɛnɛ kuyɛkɛŋ ku ka Akeya.

⁸Beŋ gbanthinande huseri haŋ ba Mariki woŋ ka Masidoniya mɛnɛ ka Akeya fooma. Ba ndinta ka thinthi ka bɛina, biya beŋ kamo kama yuye na piteke beŋ Masaala na. Miŋ ka nda iŋ humo huma hu miŋ tɛpi.

⁹Biya beŋ beŋ fooma gbonkoy nɔŋ na bohe nde beŋ mina naa key miŋ bena ka maana, awa iŋ na sikiyɔkɔy beŋ ka Masaala maŋaye ka dekɛŋ beŋ, ba yɛrɔkɔ nɔndi baŋ iŋ ba niyiyɛ Masaala wo sa tuku woŋ wali.

¹⁰Awa beŋ yumba saa hu ka Hati nama woŋ Yisɔs haŋ maŋaye ka ariana, Hati nama Yisɔs wo ŋayaŋ wundɛ ka tuka haŋ woŋ, awa wo niyɛ ba miŋ niyɔ kisi maŋaye ka mathoŋ ma ka Masaala ma see maŋ.