Read West-Central Limba 1 BiThɛsalonaika beŋ 4 Bible Online

1 BiThɛsalonaika beŋ 4 - West-Central Limba bible

1 BiThɛsalonaika beŋ 4

¹Huna mbɛnda ntuŋ, beŋ thanki nda thanuwa maŋaye kɛntuŋ nɔŋ na beŋ ba niiye haliko ba yehinuwa Masaala na thukuma. Wuŋ, wu kiŋ ba dɔma na nɔŋ na nthɔŋ beŋ na, nɛna beŋ ba niyɔ. Miŋ theteke bena awa e miŋ bena gbakita ka keŋ ku ka Mariki woŋ Yisɔs ba beŋ niya wuyamɛ ba wuŋ.

²Beŋ kɔthɛŋ nɔŋ na toŋine miŋ bena nɔŋ na beŋ ba niya maŋaye ka yamari wo ka Mariki woŋ Yisɔs.

³Masaala thimoŋ ba beŋ niyɔ bikɛnama, awa e beŋ thana niya ŋabɛy.

⁴Wɔ yo wɔ ka beŋ kiŋ ba kɔthɔ nɔŋ na ndɛ ba niiye iŋ wɔtɔ nama, haliko ba ndɛ be yeheni Masaala na thukuma, awa e ndɛ niyɔ wo thiyɔy yiki iŋ biya.

⁵Ndɛ ka ba niyɔ iŋ kufiyo kudankande tindɛ nɔŋ na biya bihɛna bi be kɔthɔ ba thimo Masaala ba bindɛ niya beŋ.

⁶Huna sa nda wɔ ni wɛndama wo bindɛ ka lanɛya baŋ wunɛnɔy maa kansuŋ. Miŋ tepe nde bena haŋ haŋ, awa e miŋ bena yela wukahɛ nagbaŋ ba wuŋ niyɔ na Mariki woŋ kɔŋ gbasaŋati bi wuŋ ni beŋ.

⁷Masaala tha mina thiyi ba niyɔ biya bi ni ŋabɛy, kɛrɛ ndɛ thiyi mina ba niyɔ biya bi niŋ yeheŋ thukuma.

⁸Huna, wɔ yo wɔ wo buuhuwɛ mathanani maŋ maŋ, ndɛ tha buuhu wɔmɛti, kɛrɛ Masaala buuhu ma, wo dunkunɛ Yina wokɛnama woŋ kendeŋ.

⁹Miŋ ka nde nda ba bena gbalita ba bena tepe ba beŋ thimiyande, bendo niyɛ lanɛya beŋ, baa Masaala thanki nda bena thaninuwa nɔŋ na beŋ ba thimiyande.

¹⁰Beŋ hintiŋ nthɔŋ nda gbeeŋ, beŋ thanki nda nɛŋ niyɔ ka mbɛnda ndeŋ ka lanɛya baŋ ka Masidoniya. Mbɛnda ntuŋ beŋ, miŋ theteke bena ba beŋ niya wuyamɛ ba wuŋ.

¹¹Yɔlaŋ wukahɛ ba niyɔ biya bithɛbɛ, e beŋ tute bɛy bakendeŋ thukuma, awa e beŋ niya wali iŋ thɛnkɔ thakendeŋ thaŋ nɔŋ na tepe nde miŋ bena na mayoŋ.

¹²Na beŋ ni nɛŋ, beŋ kɔŋ punku yɔsa bi ka ka lanɛya baŋ beŋ, awa beŋ sa doŋe ba saathɛ ba ka wɔ, kɛrɛ beŋ kɔŋ punku doŋe ba yɛthɛ bakendeŋ e beŋ punka kuta mu thimo beŋ.

¹³Mbɛnda ntuŋ beŋ, miŋ thimoŋ ba beŋ kɔthɔ nɔndi baŋ ba bi thankɛ tuka beŋ, wuna sa beŋ teetuwɔ thathukuma nɔŋ na bi ka iŋ ka bindɛ kahe thathukuma beŋ teetuwɔ thathukuma na.

¹⁴Miŋ niyeŋ lanɛya ba dɔma na Yisɔs tuku, awa e ndɛ hɛlɛŋ ŋayi ka tuka haŋ, huna miŋ niyeŋ lanɛya ba dɔma na Masaala kɔŋ sisi iŋ Yisɔs bi tukɛ nde beŋ, bi niyɛ niŋ lanɛya beŋ.

¹⁵Mathanani ma ka Mariki woŋ mɛna miŋ bena thanani ka tete maŋ, ba dɔma na mindo pɛnka bi be hɛ tuku beŋ ka malɔkɔ ma Mariki woŋ see, na miŋ sa kɔtiyɔkɔ bi yenke nde tuka beŋ.

¹⁶Ndɛ Mariki woŋ gbeeŋ, ndɛ na thuhu maŋaye ka ariana e yɛla thampa tha ka niya yamari thaŋ. Thampa tha ka maleka womandiŋ woŋ tha kɔŋ yuya, awa kuthuthu ku ka Masaala koŋ ku kɔŋ hɔŋa. Bi niyɛ nde Kraist na lanɛya beŋ e bindɛ kɔ saa ka tuka, bindɛ bina yenke ŋayi ka tuka haŋ.

¹⁷Naa wuŋ ŋaye kɛndɛ, mindo pɛnka bi ba hɛ tuku beŋ, miŋ kɔŋ ŋatita iŋ bindɛ ka nanthe ka thinthi ba niŋ pɛnka ka kuthahinɛ koŋ ka thawuruma thaŋ. Kɛna nda miŋ niyɔ iŋ Mariki woŋ lɔkɔiŋ fooma.

¹⁸Huna, niyandeŋ kuthɔnthɔ ka thampɛŋ thaŋ thaŋ.