Read West-Central Limba 1 BiThɛsalonaika beŋ 5 Bible Online

1 BiThɛsalonaika beŋ 5 - West-Central Limba bible

1 BiThɛsalonaika beŋ 5

¹Mbɛnda ntuŋ, miŋ ka nda hɛlɛŋ ba gbalita bena ba bena tepe malɔkɔ magbeeŋ ma bɛyiniŋ baŋ baŋ niiye.

²Baa beŋ gbeeŋ, beŋ kɔthɛŋ ba dɔma na malɔkɔ ma Mariki woŋ see maŋ ma kɔŋ niyɔ nɔŋ batuwaŋ wo see ka tuwe huyɛ.

³Ti nthɔŋ biya dɔŋ, na “Wuthɛbɛ napɛthɛ; mindo niyɔy kantha,” ka lɔkɔ babɛina, tɛna bindɛ teetuwa. Wu kɔŋ thɔyande nɔŋ yɛrɛmɛ wo dɔŋɔy ka kugbomgboki ku ka mpaa, awa makite yo sa niyɔ.

⁴Kɛrɛ beŋ, bendo mbɛnda ntuŋ beŋ, beŋ ka nda ka huntuma. Malɔkɔ maŋ maŋ sa nda hɛlɛŋ bena pɛnki kuthurunɔ nɔŋ batuwaŋ.

⁵Baa beŋ fooma nda biya bina beŋ bi ka waŋ baŋ; miŋ ka nda biya bi ka huntuma haŋ.

⁶Huna, miŋ bɛiŋ niyɔ biya bi nine nɔŋ na biya binɔndi na. Miŋ kiŋ ba niyɔ biya bi thɔhɔy malɔkɔiŋ maŋ maŋ, awa e miŋ niyɔ biya bi siyɔkɔy.

⁷Huyɛ na biya nine, awa huyɛ na biya yilɔ.

⁸Na nda miŋ ka waŋ baŋ, miŋ kiŋ ba niyɔ biya bi siyɔkɔy. Miŋ kiŋ ba niyɔ iŋ lanɛya mɛnɛ mathimo. Naa miŋ niyɔ iŋ muŋ, wuŋ thɔyande nɔŋ ka thɔɔyɛ miŋ yaba bathawɛ ba pama kankɛŋ bakɛntuŋ baŋ. Awa kukahe ntuŋ thukuma ba kisi bakɛntuŋ baŋ, kuna kuhaka kuthawɛ ku miŋ tutɔkɔ ba pama thankaha thakɛntuŋ thaŋ.

⁹Masaala tha mina yɛthi ba miŋ niyɔ thɔrɔ ka mathoŋ nama maŋ, kɛrɛ ndɛ yɛthi mina ba miŋ niyɔ kisi maŋaye ka Mariki wokɛntuŋ woŋ Yisɔs Kraist,

¹⁰wo tukɛ ba miŋ woŋ ba haliko miŋ be niyɔ ka tha banthe iŋ wundɛ ti wundɛ tɛŋ, miŋ thanaŋ niye tuke, maa miŋ niyeŋ tuke.

¹¹Huna niyandeŋ kuthɔnthɔ, awa e beŋ masiyande nɔŋ na nthɔŋ beŋ ni na.

¹²Mbɛnda ntuŋ, miŋ theteke bena ba beŋ dunkuna yiki bamandiŋ ka bi ni wali wukahɛ mateete makendeŋ, bayahɛŋ ndeŋ beŋ ka makɔmande ma ka Mariki woŋ maŋ, awa e bindɛ bena kɔ thaninuwa nɔŋ na beŋ ba niiye.

¹³Dunkuneŋ bindɛ yiki bamandiŋ, awa e beŋ bindɛ thimo, ba saathɛ ba wali ba bindɛ ni baŋ. Niyaŋ ba mathɛbɛŋ niyɔ mateete makendeŋ.

¹⁴Mbɛnda ntuŋ, miŋ gbakite bena ba beŋ yela bi dɔŋɔy kɛndɛ bi ka ba niya wali beŋ, kahinaŋ bi payɔy beŋ thathukuma, maseŋ bi ba punku yɛthɛ namɛŋ beŋ, niyandeŋ muyuŋ.

¹⁵Wɔ bɛiŋ tɛnkɛŋ banɛnɔy ka banɛnɔy, kɛrɛ lɔkɔiŋ fooma yɔlaŋ ba niyande bayɔhɔy mateete makendeŋ mɛnɛ ka biya fooma.

¹⁶Niyɔŋ iŋ mayehitɔkɔ timo tima.

¹⁷Niyaŋ kuraminɛ timo tima.

¹⁸Niyɔŋ biya bi thiyi maamo ka bɛy yo bɛy ba bena pɛnki, baa wuŋ, wuna thimo Masaala ba beŋ be ni baa beŋ kiŋ nda biya bi ka Kraist Yisɔs.

¹⁹Baŋ pindi Yina wo ka Masaala woŋ;

²⁰baŋ yethitɔ maseriŋ ma ka biya bi dɔmɛ beŋ na maseriŋ namɛŋ maŋ ŋaye ka Masaala,

²¹kɛrɛ yenkeŋ gbɛriŋina maseri yo maseri ma bena pɛnki mɛnɛ manɔndi mɛna. Kɔsinaŋ wu kute beŋ wuyɔhɔy wuŋ.

²²Gbɔnɔkɔŋ mahɛŋ bɛy yo bɛy ba kɔthɛ beŋ banɛnɔy.

²³Haliko Masaala wo dunkune mina thɛbina thukuma woŋ niya ba beŋ niyɔ bithumbɛ nagbaraŋ. Awa haliko ndɛ kɔsina yɛthɛŋ bakendeŋ, yinɛŋ bikendeŋ, siini bakendeŋ, mɛnɛ ŋakɔtɔ ŋakendeŋ ŋaŋ wu pankɔy bɛy maŋaye ka ntha yo ntha kinɛnɔy haaŋ saa hu ka Mariki woŋ Yisɔs Kraist haŋ.

²⁴Ndɛ wo thiyɛ bena woŋ ndɛ kɔŋ wuŋ ni, baa ndɛ ayɔhɔ niyo lanɛya.

²⁵Mbɛnda ntuŋ, niyiyaŋ mina kuraminɛ.

²⁶Maaniyaŋ mina mbɛnda ntuŋ beŋ nɔŋ biya bihuwɛndiya ka Kraist.

²⁷Yaŋ gbakite bena maŋaye ka yamari wo ka Mariki woŋ ba beŋ niya karaŋ kuthagba koŋ koŋ ka bi niyɛ lanɛya beŋ fooma.

²⁸Haliko mathimo ma ka Mariki wokɛntuŋ woŋ Yisɔs Kraist ma niyɔ iŋ beŋ.