Read West-Central Limba 2 BiThɛsalonaika 1 Bible Online

2 BiThɛsalonaika 1 - West-Central Limba bible

2 BiThɛsalonaika 1

¹Kuthagba koŋ koŋ ŋaye ka Pɔli, Sailasi, mɛnɛ Timothi, makey ka makɔmande ma ka balanɛyani beŋ maŋ ka mɛti ba ka Thɛsalonaika, bi nda biya bi ka Masaala beŋ, Fanda ntuŋ woŋ, mɛnɛ Mariki woŋ Yisɔs Kraist.

²Haliko Masaala, Fanda ntuŋ woŋ, mɛnɛ Mariki woŋ Yisɔs Kraist toŋine bena mathimo e bena dunkune mathɛbɛ.

³Mbɛnda ntuŋ, yɔkɔŋ nthɔŋ miŋ be thiyi Masaala na maamo timo tima ba beŋ. Wuŋ asisande miŋ ba wuŋ niya, baa lanɛya bakendeŋ baŋ abɔy, awa mathimo ma ka wɔ yo wɔ maŋ ba mbɛndama ma kɔŋ key ka kɔtɔkɔy.

⁴Huna nda miŋ bukuineke ba beŋ ka makɔmandeni ma ka bi niyɛ lanɛya beŋ ka Masaala. Miŋ kɔŋ nda niyɔkɔ kaba ba na key beŋ ka kɔtɔkɔy ba thunkuteke awa e beŋ niyɔ iŋ lanɛya hali na beŋ niya thɔrɔ na iŋ biya bihɛna.

⁵Wuŋ fooma tɔŋɔŋ nagberekethe ba dɔma na makɔnsɔŋɔŋ ma ka Masaala maŋ athumbu. Wuŋ tɔŋɔŋ hɛlɛŋ ba dɔma na beŋ kɔŋ niyɔ biya bi tɛŋɛ ba biyande ka Hugbakine nama haŋ, hu beŋ niyiyɔ thɔrɔ haŋ.

⁶Masaala kɔŋ ni wuthumbɛ: ndɛ kɔŋ gbasaŋati bi bena ni thɔrɔ beŋ,

⁷awa ndɛ kɔŋ bena dunkune kuhemuwe ka thɔrɔiŋ bakendeŋ iŋ miŋ ka nanthe fooma. Ndɛ kɔŋ ni wuŋ baŋ ti Mariki woŋ Yisɔs tɔŋinɔkɔ maŋaye ka ariana iŋ malekɛŋ nama bi iŋ sɛmbɛ beŋ.

⁸Ndɛ kɔŋ see iŋ buu bumaye ba si gbasiŋita bi buuhuwɛ Masaala na beŋ, mɛnɛ bi tha yɛrɔkɔ Huseri Huyɔhɔy haŋ ba Mariki wokɛntuŋ woŋ Yisɔs.

⁹Biya bibɛina beŋ beŋ bi kɔŋ gbasiŋita awa e bindɛ teetuwo kɔy o kɔy, awa bi kɔŋ kantha ka kupɛnkintiyande ku ka Mariki woŋ koŋ mɛnɛ sɛmbɛ nama bamandiŋ baŋ.

¹⁰Ndɛ kɔŋ see ka lɔkɔ babɛina ba si dunkuno yiki iŋ bikɛnama beŋ fooma, iŋ ba niyo yiki iŋ bi niyɛ lanɛya beŋ fooma. Beŋ hɛlɛŋ gbeeŋ, beŋ kɔŋ niyɔ iŋ bindɛ baa beŋ ni lanɛya huseri hu tepe miŋ bena haŋ.

¹¹Huna miŋ niye kuraminɛ ba beŋ lɔkɔiŋ fooma. Mindo hɛlɛŋ thɔnthɔŋɔŋ Masaala wokɛntuŋ woŋ ba haliko beŋ be niyɔ biya bi tɛŋɛ ka yɛtha hu yɛthi ndɛ bena haŋ. Haliko Masaala, maŋaye ka sɛmbɛ nama baŋ, thiŋina kufiyo kukendeŋ koŋ ba niya bayɔhɔy mɛnɛ ba thankina wali ba beŋ ni baŋ maŋaye ka lanɛya bakendeŋ baŋ.

¹²Ka gboŋa baŋ baŋ kɛna keŋ ku ka Mariki ntuŋ woŋ Yisɔs kute yiki maŋaye kendeŋ. Awa beŋ kɔŋ hɛlɛŋ nɛnɛ kutu yiki maŋaye kɛnama saathɛ ba ka makutiyɛ ma ka Masaala wokɛntuŋ woŋ iŋ ma ka Mariki woŋ Yisɔs Kraist.