Read West-Central Limba 2 BiThɛsalonaika 2 Bible Online

2 BiThɛsalonaika 2 - West-Central Limba bible

2 BiThɛsalonaika 2

¹Ka tete, yaŋ kɔŋ bena gbalati ba saa hu ka Mariki wokɛntuŋ woŋ Yisɔs Kraist haŋ iŋ kɔmande ntuŋ haŋ ka tha banthe ba niyɔ iŋ wundɛ. Yaŋ theteke bena, mbɛndaŋ beŋ,

²ba haliko wɔ be tha bena thiyi kɔnthɔhili yaka ka masiyi, maa ba bena niya yaagba ba dɔma na malɔkɔ ma ka Mariki woŋ maŋ tɛŋ. Thampo wɔ tepe bena ba dɔma na miŋ tepe huŋ na nde miŋ ni hunabi, maa miŋ si nde ni kɛwandi, maa miŋ gbalite nde bena kuthagba ba huŋ.

³Baŋ mɛy ba wɔ yo wɔ bena thɔkina ka gboŋa yo gboŋa, baa malɔkɔ ma saa hu ka Mariki woŋ haŋ sa hintiŋ niye teŋe yɔkɔŋ buuhuwa Masaala na humankɛ haŋ yenke niyɔ, awa e wɔ wo thinki siraŋ baŋ woŋ tɔŋinɔkɔ, wo si teetuwa woŋ.

⁴Wundɛ kɔŋ sɔkinɔkɔ ntha yo ntha ki dɔma na Masaala maa ki niya kubatho. Awa ndɛ kɔŋ niyɔ muŋ ka thinthi fooma. Hali hintiŋ ka banka bamandiŋ ba ka Masaala baŋ gbeeŋ, ndɛ kɔŋ biyande e dɔŋɔ kɛndɛ, e ndɛ tepe biya ba dɔma na Masaala na wundɛ.

⁵E beŋ siyuweta ba dɔma na yaŋ tepe nde bena bɛyiniŋ baŋ baŋ fooma naa nde hintiŋ yaŋ iŋ beŋ?

⁶Bɛy ba kiŋ ba dɔmɛ wuŋ baŋ niyɔita hɛ ka tete. Awa beŋ kɔthɛŋ ntha kibɛina. Naa lɔkɔ bagbeeŋ baŋ tɛŋ, bathinki siraŋ baŋ woŋ kɔŋ tɔŋinɔkɔ.

⁷Gbundu ba ka thinka siraŋ baŋ ba kiŋ nda ka niya wali. Awa ba kɔŋ niyɔ haaŋ yɔkɔŋ wo bohitɛ bɛŋ woŋ gbonino ka gboŋa baŋ e bɛŋ kɔ pɛya niyɔ.

⁸Naa wuŋ daŋande kɛndɛ, kɛna ntiŋ nda bathinki siraŋ baŋ woŋ nɔŋ tɔŋina. Kɛrɛ naa Mariki woŋ Yisɔs see, ndɛ kɔŋ niŋ kɔri ka heme hu ndɛ niŋ heme haŋ, awa ndɛ kɔŋ niŋ teeti iŋ maleke hukɛnama haŋ ti ndɛ see.

⁹Bathinki siraŋ baŋ woŋ kɔŋ see iŋ sɛmbɛ ba ka Sithani baŋ, awa ndɛ kɔŋ ni lamanthoni bihakuwande bi ka iŋ nɔndi mɛnɛ bɛyiniŋ bagbɛki.

¹⁰Ndɛ kɔŋ ni gboŋa yo gboŋa banɛnɔy ba thɔkina bi si teetuwa beŋ. Bi kɔŋ teetuwa baa bindɛ tha yɛrɔkɔ e bindɛ thimo nɔndi ba bindɛ ni kisi baŋ.

¹¹Ba saabu babɛina, huna niye Masaala thathukuma thakɛnamɛŋ yaayi haaŋ nda bindɛ niya lanɛya bɛyiniŋ baŋasɔkɛ baŋ.

¹²Magbanthaŋ namɛŋ maŋ mɛna maŋ maŋ: wɔ yo wɔ wo tha ni nɔndi baŋ lanɛya, e ndɛ yehitɔkɔ ba niya hakɛ, wɔ bɛina kɔŋ thonkino.

¹³Mbɛnda ntuŋ, yɔkɔŋ nthɔŋ miŋ be kɔ thiyi Masaala na maamo timo tima ba bendo thimiyo iŋ Mariki woŋ beŋ. Masaala yɛthi nde bena biya bimayoŋ ba niyo kisi maŋaye ka wali ba ka Yina nama woŋ wo niyɛ ba bena niya biya bikɛnama awa saathɛ ba na ni beŋ nɔndi baŋ lanɛya.

¹⁴Masaala thiyi nde bena maŋaye ka Huseri Huyɔhɔy hu ni miŋ kɛwandi kendeŋ haŋ. Ndɛ thiyi nde bena ba beŋ niyɔ iŋ kufɛŋ ka yiki ba ka Mariki wokɛntuŋ woŋ Yisɔs Kraist.

¹⁵Huna, mbɛnda ntuŋ, kɔɔŋ wukahɛ, awa e beŋ bohitɔkɔ mathananini ma thanki miŋ bena thaninuwa, ka kukɛwandi kukɛntuŋ koŋ, maa ka kuthagba ku gbale miŋ koŋ.

¹⁶Haliko Mariki wokɛntuŋ woŋ Yisɔs Kraist ndɛ gbeeŋ, mɛnɛ Masaala Fanda ntuŋ woŋ, wo thimo mina e mina kɔ niya kuthɔnthɔ timo tima e mina dunkune kukahe thukuma kuyɔhɔy maŋaye ka makutiyɛ nama maŋ,

¹⁷haliko ndɛ niya bena kuthɔnthɔ, awa e ndɛ bena dunkune sɛmbɛ ba gbonkiya mɛnɛ ba niya bayɔhɔy timo tima.