Read West-Central Limba 2 BiThɛsalonaika 3 Bible Online

2 BiThɛsalonaika 3 - West-Central Limba bible

2 BiThɛsalonaika 3

¹Mbɛnda ntuŋ, saanuŋ yaŋ be kɔ see ka gbanthina, yaandi bena niyiyaŋ mina kuraminɛ, ba haliko huseri hu ka Mariki woŋ haŋ hu be gbanthande yako-yako awa e huŋ yeroko ka yiki, nɔŋ na yɛrɔkɔy nde beŋ huŋ na.

²Niyaŋ hɛlɛŋ kuraminɛ ba haliko Masaala be mina ni thanka ka banɛnɔy mɛnɛ ka biya binɛnɔy, baa biya fooma kutɛ niyɛ huseri haŋ lanɛya.

³Kɛrɛ Mariki woŋ ayɔhɔ niyo lanɛya, awa ndɛ kɔŋ ni ba beŋ kɔɔ wukahɛ e bena pama ka Wɔ Wonɛnɔy woŋ.

⁴Awa Mariki woŋ ni ba miŋ bena kahe thukuma, awa miŋ ani lanɛya ba wuŋ niyɔ na beŋ kɔŋ key ka kɔtɔkɔy ba niya ba tepe miŋ bena baŋ.

⁵Haliko Mariki woŋ sisa bena ka beŋ kothiye wumandiŋ ti peye Masaala bena thimo, mɛnɛ thunkuteke hu dunkuno beŋ iŋ Kraist haŋ.

⁶Mbɛnda ntuŋ beŋ, miŋ gbakite bena ka keŋ ku ka Mariki wokɛntuŋ woŋ Yisɔs Kraist, ba beŋ thana thankina sɔkɔ iŋ wɛnda yo wɛnda wo ka ba niya wali, awa mɛnɛ bi tha yeŋ mathanani ma thanani miŋ bena maŋ beŋ.

⁷Beŋ gbeeŋ ka yɛthɛ bakendeŋ, beŋ kɔthɛŋ wuyɔhɔy ba dɔma na beŋ kiŋ ba niya na ni miŋ na. Miŋ ka nde biya bimayɛini naa nde miŋ iŋ beŋ.

⁸Miŋ tha nde bohi muthɔma ka wɔ yo wɔ mahɛŋ ma miŋ tha muŋ thunkuniyɛ. Miŋ yole nde wukahɛ ka yɛthɛ bakɛntuŋ ba niya wali wukahɛ. Miŋ ni nde wali gbɛɛŋ iŋ piri-piri ba haliko doni bakɛntuŋ ba be tha bena dimbe.

⁹Wuŋ ka ba dɔma na miŋ ka nde iŋ mayoho ba beŋ mina thɛriyɛ, kɛrɛ miŋ ni nde wali ba haliko ba bena peye mathɔyande ma beŋ yemitɔ.

¹⁰Naa nde miŋ iŋ beŋ, miŋ bareŋ nde bena kɔ tepe ba dɔma, na “Wɔ o wɔ wo baŋinɛ ba niya wali, wɔ bɛina bɛiŋ thɔŋ.”

¹¹Babiyɛ miŋ tɛpa huŋ, miŋ yuye ba dɔma na biya bi kiŋ mateete makendeŋ bimayɛini, bi be ni bɛyi o bɛyi yɔkɔŋ ba hunahiki.

¹²Ka keŋ ku ka Mariki woŋ Yisɔs Kraist, miŋ gbakite biya beŋ beŋ iŋ kaŋ yela bindɛ ba bi be niyɔ nɔŋ na sisande bindɛ ba niiye ka siini bakɛnamɛŋ baŋ, awa bi niyɛŋ wali ba haliko bi be kutu mu bindɛ thɔŋ.

¹³Kɛrɛ beŋ, bendo mbɛnda ntuŋ beŋ, baŋ thamɔ ba niya bayɔhɔy.

¹⁴Thampo wɔ kɔŋ niyɔ ka beŋ wo sa yɛrɔkɔ huseri hu toŋite miŋ bena ka kuthagba koŋ koŋ haŋ. Mɛnɛ wuŋ niye nɛŋ, dɛŋaŋ wɔ bɛina thɛnkɛi, awa e beŋ thankina ba wundɛ, wuna ndɛ niyɔ kuyaahu.

¹⁵Kɛrɛ baŋ niŋ diŋe nɔŋ hadeŋ wokendeŋ, kɛrɛ yelaŋ niŋ nɔŋ wɛnda ndeŋ.

¹⁶Haliko Mariki woŋ ndɛ gbeeŋ, wo ka there mathɛbɛ woŋ, dunkune bena mathɛbɛ lɔkɔiŋ fooma, iŋ gboŋɛŋ fooma. Haliko Mariki woŋ niyɔ iŋ beŋ fooma.

¹⁷Yaŋ gbeeŋ yama gbaliyɔkɔ ŋamaaŋ ŋaŋ ŋaŋ iŋ yɔnkɔ hukiyaŋ haŋ. Kuthagba yo kuthagba ku yaŋ gbali, nɛna yaŋ kɔ thankine kuŋ nanaŋ ba haliko wu be kothiyo ba dɔma na kiyaŋ ŋaye na kuŋ, baa nɛna yaŋ kɔ gbale.

¹⁸Haliko mathimo ma ka Mariki wokɛntuŋ woŋ Yisɔs Kraist ma niyɔ iŋ beŋ fooma.