Read West-Central Limba 1 Timothi 6 Bible Online

1 Timothi 6 - West-Central Limba bible

1 Timothi 6

¹Bendo mbaayiŋ beŋ, thiyaŋ marikiŋ ndeŋ beŋ yiki, wuna sa biya gbonkoy wunɛnɔy ba Masaala iŋ mathanani ntuŋ maŋ.

²Mbaayiŋ bi ka pothi ka bi niyɛ lanɛya beŋ bi bɛiŋ bindɛ yethitɔ, baa mbɛndamɛŋ bina. Bi kiŋ ba bindɛ niyɛ adaŋande bɛy yo bɛy, baa bi kutu munahaŋ ka wali namɛŋ baŋ beŋ, bindɛ bina bi biyɛ lanɛya beŋ, e bindɛ thimiyo. Awa niya kɛwandi e yi thaninuwa bɛyiniŋ baŋ baŋ.

³Wɔ yo wɔ wo thanani mathanani mahakande, awa e mɛŋ thana bɔhande iŋ mathanani manɔndi ma ka Mariki ntuŋ woŋ Yisɔs Kraist maŋ, iŋ mathanani ma ka dina wokɛntuŋ woŋ maŋ,

⁴wɔ bɛina bakaba na wundɛ, awa ndɛ kɔita bɛy yo bɛy, awa basisi ŋagbakali iŋ ŋathanthiŋ na wundɛ, ŋa sisi hunaŋ, magbonkoy manɛnɔy, iŋ mayakiŋ, awa iŋ ba biya siyiyo nɔŋ na ka bindɛ.

⁵Awa yi kɔŋ niyɔ iŋ ŋagbakaliŋ ŋaye ka biya bi ka iŋ masimɔkɔiŋ makolo beŋ, awa bi ka iŋ nɔndi baŋ beŋ. Biya beŋ beŋ, bi kɔŋ siyi ba wuŋ niyɔ na hudinhaŋiya hu kiŋ ka dina woŋ.

⁶Hudinhaŋiya hu kiŋ ka dina woŋ yaathi, mɛnɛ wɔ teŋo wu iŋ wundɛ.

⁷Mbɛ mu diŋe miŋ ka saa kafaydo? Miŋ tha diŋ ntha yo ntha! Mbɛ mu miŋ diŋ ka kaa maŋaye kafaydo? Miŋ sa diŋ ntha yo ntha ka kaa.

⁸Wuna, mɛnɛ miŋ kute muthɔma iŋ muthɔɔ, mu tɛŋɛŋ mina.

⁹Kɛrɛ bi yɔli ba kuta hudinhaŋiya beŋ, bi kɔŋ ŋɔti ka mathiiko, awa e bindɛ pɛnkɔ ka mudikiŋ mu ni ba bindɛ niya bɛyiniŋ ba ka kolo, e bindɛ niyɔ iŋ masimɔkɔiŋ ma bindɛ teeti. Wuŋ, wu kɔŋ ni ba bindɛ ŋɔta e bindɛ thanke ka nambara.

¹⁰Ba thimo kɔbiri wumandiŋ wuna mathere ma ka banɛnɔy fooma. Binɔndi thimo nda kɔbiri wudankande haaŋ bindɛ thɔɔ wuruwanda maŋaye ka lanɛya baŋ, e bindɛ nda niyɔ iŋ nkinikiniŋ ka thathukuma namɛŋ thaŋ.

¹¹Kɛrɛ yi, yindo wɔ ka Masaala woŋ, gbɔnɔkɔ ka bɛyiniŋ baŋ baŋ. Dekiyɔkɔ ba niyɔ wɔ thumbɛ, wɔ ka Masaala, wɔ niyɛ lanɛya. Niyɔ iŋ mathimo, muyuŋ, iŋ mathɛbɛ.

¹²Kaa ka kɔtɔkɔy ka kugbakande ku ka lanɛya baŋ koŋ, awa e yi punka kuta sii ba kɔy yo kɔy ba yɛthɛ bakɛnda. Ba kuta sii baŋ baŋ huna thiye yina Masaala ka malɔkɔ ma gbonkiye yi ba lanɛya bakɛnda baŋ mateete ma ka biya bibɔyɛ.

¹³Ka kɔtɔkɔy ka Masaala wo dunkunɛ hɛma ka ntha yo ntha ki hɛmɛ woŋ, iŋ Kraist Yisɔs wo kɔɔyɛ nde ka kɔtɔkɔy ka Pɔntiyɔsi Pailɛti e ndɛ niya maseri manɔndi kɛnama, yaŋ ni yina yamari woŋ baŋ:

¹⁴Yaŋ gbakite yina ba mɛya yamariŋ bi thanki yaŋ yina dunkune beŋ. Kɔsina bindɛ wuyɔhɔy haaŋ malɔkɔ ma Mariki ntuŋ woŋ Yisɔs Kraist tɔŋina.

¹⁵Masaala kɔŋ niŋ tɔŋɔŋ ka malɔkɔ magbeeŋ maŋ. Masaala kiŋ iŋ yiki mɛnɛ mayehitɔkɔ fooma, awa ndɛ na Gbaku wunthe nape, Gbaku wo ka gbakuiŋ woŋ, iŋ Mariki wo ka marikiŋ woŋ.

¹⁶Ndɛ wuntheŋ nape ndɛ na sa tuku. Ndɛ kiŋ ka waŋ baŋ, ba sa wɔ yo wɔ punku thuriye baŋ, wɔ yo wɔ kuita hɛ niŋ hanthe. Wɔ ka wo niŋ punku kuta. Ndɛ na biyɛ yiki iŋ kɛriŋa hu kɔy yo kɔy kuhantheŋ! Amiina.

¹⁷Tepe bananhuluiŋ beŋ, bi iŋ munkiŋ mu kafaydo muŋ, bi be tha bukuinɔkɔ. Niya ba bindɛ thana kahe thukuma hudinhaŋiya hu kafaydo haŋ, hu sa dekintoko haŋ, kɛrɛ bi kaheŋ Masaala na thukuma wo dunkune mina ntha yo ntha ki hɛ miŋ yehiteke woŋ.

¹⁸Gbakita bindɛ ba niya wuyɔhɔy. Bi niyɔiŋ iŋ hudinhaŋiya ka maniyɔ mayɔhɔy. Awa bi kɔsinɔkɔiŋ ba hanande ntha yo ntha iŋ biya bihɛna.

¹⁹Wuŋ, wu kɔŋ ni ba bindɛ kɔsina kɛɛ ba yɛthɛ namɛŋ ka bindɛ therine nɔŋ ba kaa ka kɔtɔkɔy. Awa wu kɔŋ ni ba bindɛ punka kuta sii banɔndi baŋ.

²⁰Timothi, kɔsina bɛyiniŋ fooma ba thanki yi dunkuno baŋ. Gbɔnɔkɔ mahɛŋ magbonkoy ma be yeheŋ Masaala na thukuma iŋ ŋagbakali ŋamayɛini ŋaŋ. Biya binɔndi siyi, na “Kele huna,” kɛrɛ wuŋ ka nɛŋ.

²¹Baa bibɔyɛ yole ba huŋ kuta, awa huŋ ni ba bindɛ piriŋina gboŋa ba ka lanɛya baŋ. Haliko beŋ kutiyo iŋ Masaala.