Read West-Central Limba 2 Timothi 2 Bible Online

2 Timothi 2 - West-Central Limba bible

2 Timothi 2

¹Hatiŋ woŋ, mɛkina makutiyɛ ma kute yi maŋ maŋaye ka Kraist Yisɔs ba haliko yi be kɔɔ wukahɛ.

²Sɛkitha mathanani ma yuye yi yaŋ si tɛpi maŋ ka kupɛnkintiyande ku ka maseriŋ ma ka biya bibɔyɛ, awa e yi mɛŋ thalintiyande biya bi yɔhɔy niyo lanɛya, bi mɛŋ punku thaninuwa biya bihɛna.

³Sɛkitha kufɛŋ kukɛnda ba niyɔ nambara nɔŋ kurugba wo ka Kraist Yisɔs.

⁴Kurugba wo ni wali nama baŋ, wɔ na wo thimo ba yehinuwa wo sɛkithɛ niŋ woŋ thukuma, awa ndɛ sa nda thɔɔtɔ ka wali ba ka biya bihɛna beŋ baŋ.

⁵Nɛna hɛlɛŋ wɔ thari kugbakande, wundɛ sa punku kugbakande koŋ yɔkɔŋ ndɛ putiyɔy sirani baŋ.

⁶Bamahi wo ni wali wukahɛ ndɛ na sisande ba tenke kuta ŋɔna humayoŋ haŋ.

⁷Simɔkɔ hu yaŋ yina tepe haŋ, baa Mariki woŋ kɔŋ ni ba yi huŋ metho fooma.

⁸Siyuwa Yisɔs Kraist na, wo ŋayino nde ka tuka haŋ woŋ, wo ŋaye ka bɔnsɔŋ ba ka Dauda baŋ, nɔŋ na thaninuwo wuŋ na ka Huseri Huyɔhɔy hu yaŋ ni kɛwandi haŋ.

⁹Yaŋ niyo nambara, haaŋ e yaŋ loŋo iŋ yɔlɔnkɔiŋ nɔŋ wɔ thinkɛ siraŋ ba na yaŋ ni Huseri Huyɔhɔy haŋ kɛwandi. Kɛrɛ thampa tha ka Masaala thaŋ lɔŋɔita iŋ yɔlɔnkɔiŋ.

¹⁰Huna thunkuteke yaŋ bɛyiniŋ fooma ba wuyɔhɔy wu ka biya bi thanki nde Masaala yɛtha beŋ. Haliko bi be kutu kisi ba ŋaye ka Kraist Yisɔs baŋ, awa iŋ yiki ba kɔy yo kɔy baŋ.

¹¹Hu tepo haŋ nɔndi bɛna, na “Mɛnɛ miŋ tuku iŋ wundɛ, miŋ kɔŋ kutu sii ka nanthe iŋ wundɛ.

¹²Mɛnɛ miŋ ni muyuŋ, miŋ kɔŋ kɛrɛŋ iŋ wundɛ. Mɛnɛ miŋ buuhu niŋ, ndɛ kɔŋ mina buuhu.

¹³Mɛnɛ miŋ tha niyɔ bi yɔhɔy niyo lanɛya, ndɛ kɔŋ yɔhɔ niyo lanɛya lɔkɔiŋ fooma, baa ndɛ sa thikipi maniyɔ nama maŋ.”

¹⁴Simina biya bikɛnda ba bɛyiniŋ baŋ baŋ, awa yela bindɛ wukahɛ-kahɛ ka kupɛnkintiyande ku ka Masaala. Yaŋ ka ba kuthanthiŋ bindɛ niyɔ mateete. Wuŋ sa sisi bɛy bayɔhɔy ka bi yuyɛ beŋ, kɛrɛ wu kɔŋ ni ba bindɛ teetuwɔ.

¹⁵Niya sɔbɛ bakɛnda ba kuta kusɔli ka Masaala nɔŋ bawali wo ka iŋ kuyaahu ka wali nama baŋ. Tɛpa huseri hunɔndi haŋ nɔŋ wɔ dɛŋ gboŋa bathumbɛ.

¹⁶Gbɔnɔkɔ mahɛŋ magbonkoy ma sa yeheŋ Masaala na thukuma. Maŋ maŋ mɛna pindi biya ba saa ka Masaala.

¹⁷Mathanani mabɛina maŋ maŋ ma kɔŋ teeti wɔmɛti nɔŋ ka dorooko wɔ mathimɔ ma sa nda pethɔ. Haimɛniyɔsi iŋ Failitɔsi bindɛ bina thaninuwɛ mathanani maŋ maŋ.

¹⁸Bindɛ pɛyɛŋ gboŋa banɔndi baŋ. Bindɛ thanki nda tɛpa na ŋayi ka tuka haŋ thanki nda daŋande, bɛna bindɛ teeti lanɛyani ba ka biya binɔndi.

¹⁹Kɛrɛ kudɛɛnkɛti ku thanki Masaala dɛŋa koŋ sa ŋɛnɔkɔ hali wuyete. Awa ka kuŋ kɛna gbalo thampɛŋ thaŋ thaŋ: na “Mariki woŋ kɔthɛŋ bikɛnama beŋ,” awa, na “Wɔ yo wɔ wo dɔma na kiŋ ka Mariki woŋ, yɔkɔŋ ndɛ be pɛy niya banɛnɔy.”

²⁰Ka yikiya bamandiŋ, muninkineke muhakuwande mu kiŋ kɛndɛ: Munɔndi mu kiŋ kɛndɛ mu yehinuwo iŋ siliba mɛnɛ boyi, munɔndi karoni, munɔndi thasokoro. Munɔndi mu niyo bɛy bathɔɔkɔ, awa munɔndi ba niyo bɛy timo tima.

²¹Mɛnɛ wɔ mɛthinɔkɔy fooma ka bɛyiniŋ banɛnɔy baŋ baŋ, ndɛ kɔŋ kiya ka makooye ma ba niya bɛy bathɔɔkɔ. Baa ndɛ yetho nda thɔɔkɔ ba niyɔ ba Mariki nama woŋ. Ndɛ kiŋ nda wo kɔsinɔkɔy ba niya bayɔhɔy lɔkɔiŋ fooma.

²²Pɛyɛnɔkɔ nda ŋafiyo ŋanɛnɔy ŋa ka huhatiniyɛ haŋ ŋaŋ. Awa dekiyɔkɔ ba kuta mathumbɛ, lanɛya, mathimo, mɛnɛ mathɛbɛ ka nanthe iŋ bi mɛthɛ thathukuma beŋ, bi thiyi Mariki woŋ ba masito.

²³Ŋayi mahɛŋ ŋagbakali ŋamathiyani ŋa ka thana kɔthɔ haŋ ŋaŋ. Yi kɔthɛŋ ba wuŋ niyɔ na ŋa kɔŋ thanke ŋayuŋande.

²⁴Bawali wo ka Mariki woŋ ka ba yuŋande, kɛrɛ ndɛ kiŋ ba niyɔ wɔ yɔhɔy iŋ wɔ yo wɔ. Ndɛ kiŋ ba niyɔ bathanani woyɔhɔy iŋ wo ni muyuŋ.

²⁵Ndɛ kiŋ ba niya kuthɛgbɛ ka thaninuwa biya bi thayɔkɔy niŋ beŋ, thampo Masaala kɔŋ dunkune bindɛ thikipa thathukuma e bindɛ sikiyɔkɔ ka bɛyiniŋ banɛnɔy ba bindɛ ni awa e bindɛ kɔthɔ nɔndi baŋ.

²⁶Awa bi kɔŋ niyɔ iŋ kele ba fuŋa ka mudikiŋ mu ka Wayi Womandiŋ woŋ muŋ Sithani, wo thankɛ nda bindɛ bɔha woŋ e bindɛ nda niŋ putiyɔ ba niya mathimo nama maŋ.