Read West-Central Limba 2 Timothi 4 Bible Online

2 Timothi 4 - West-Central Limba bible

2 Timothi 4

¹Ka kupɛnkintiyande ku ka Masaala iŋ Kraist Yisɔs, wo si kɔnsɔŋɔŋ bipethɔy beŋ mɛnɛ bitukɛ beŋ, saathɛ ba ka tɔŋinɔkɔ hukɛnama haŋ iŋ Hugbakine nama haŋ, yaŋ gbakite yina

²ba yi be ni huseri haŋ kɛwandi lɔkɔiŋ fooma. Wu niyɔiŋ nthɔŋ ka lɔkɔ bayɔhɔy maa ka lɔkɔ banɛnɔy, niya kɛwandi. Tepe bindɛ banɛnɔy namɛŋ baŋ e yi bindɛ pinda, awa e yi bindɛ niya kuthɔnthɔ nɔŋ na yi thanani bindɛ iŋ muyuŋ.

³Malɔkɔ maŋ mɛ kɔŋ see ma sa nda biyamɛti poniye kuiha mathanani mayɔhɔy maŋ. Kɛrɛ bi kɔŋ yeŋ ŋafiyoiŋ ŋakɛnamɛŋ ŋaŋ. Awa bi kɔŋ key kaŋ sɛkitha karimɔkɔiŋ bi bindɛ tepe ba thimo bindɛ ba yuyɛ.

⁴Bi kɔŋ sikiŋ sɔkɔrɔ mathanani manɔndi maŋ, awa e bindɛ poniyɛ kuiha thabɔrɔiŋ tha yeheni wɔmɛti thahothi.

⁵Kɛrɛ yi, yɔkɔŋ yi be punku ba kɛriŋiyɛ yɛthɛ bakɛnda baŋ ka gboŋɛŋ fooma. Thunkuteke nambarɛŋ baŋ. Niya wali ba ka kukɛwandi ku ka Huseri Huyɔhɔy haŋ. Niya fooma waliŋ ba dunkuno yi baŋ nɔŋ bawali wo ka Masaala.

⁶Mɛnɛ ba yaŋ, malɔkɔ maŋ tɛŋ ma sii niŋ baŋ dunkuno nɔŋ munkii ka Masaala. Malɔkɔ maŋ tɛŋ ma yaŋ pene maŋ.

⁷Yaŋ dekiyɔkɔy wukahɛ; yaŋ thankaŋ kugbakande koŋ; yaŋ bohitɔkɔy lanɛya baŋ.

⁸Ka tete nda, yando dɛŋiyɔy nda nɛmu wo ka mathumbɛ wo yama Mariki, wo bakɔnsɔŋɔŋ wothumbɛ woŋ, ba dunkune ka malɔkɔ mabɛina, ba punka hupunke yaŋ kugbankande koŋ haŋ. Wuŋ ka hɔkɔŋ yaŋ wuntheŋ nde, kɛrɛ ka bindɛ fooma bi niŋ yumbu iŋ mathimo ba tɔŋinɔkɔ hukɛnama haŋ.

⁹Yɔla ba saa kiyaŋ do yako.

¹⁰Demasi yeme ka faywoŋ. Ndɛ fuŋ ka yɔnkɔ niŋ. Ndɛ key ka Thɛsalonaika. Kɛrɛsɛnsi key ka Kaletiya. Awa Taitɔsi key ka Dalamɛsa.

¹¹Yɔkɔŋ Luku nagbɛti, wundɛ na iŋ yaŋ dondo. Naa yi kɔ see, diŋa Maki na ka saa, baa wundɛ kɔŋ yama punku mase ka wali baŋ.

¹²Yaŋ ŋindi Taikikɔsi na ka Ɛfɛsɔsi.

¹³Naa yi kɔ see, diŋiyɛ yama yaba niŋ ba ka haka haŋ baŋ ba peye yaŋ Kapɔsi na baŋ ka Torowasi. Diŋiyɛ hɛlɛŋ yama bukuiŋ niŋ beŋ, yameŋ ntiŋ bɛy bi kahɛ mɔlɔŋ beŋ bi yehinuwo ka ŋathagba ŋatakɛŋ ŋaŋ beŋ.

¹⁴Alɛsanda wo bakurɛ woŋ yole yama niya thɔrɔ, kɛrɛ Mariki woŋ kɔŋ niŋ thunkuŋ ba ba thanki ndɛ niya baŋ.

¹⁵Tute thukuma yo, ba niŋ pitɔkɔ baa wɔ na wo thambo huseri ntuŋ haŋ.

¹⁶Wɔ yo ka wo kooye yama mahɛŋ ka lɔkɔ bamayoŋ ba kɔɔyɛ yaŋ ka kɔtɔkɔy ka bakɔnsɔŋɔni beŋ ba gbonkiya ba yɛthɛ bakiyaŋ. Bindɛ fooma baŋinɔkɔy yama. Haliko Masaala pɛniyɛ bindɛ wuŋ.

¹⁷Kɛrɛ ka bɛyiniŋ baŋ baŋ fooma, Mariki woŋ niyɔy iŋ yaŋ, awa wundɛ dunkune yama sɛmbɛ ba yaŋ punku koyiŋe Huseri Huyɔhɔy haŋ fooma, ba haliko biya beŋ beŋ bi ka siyani bahɛna baŋ beŋ bi be yuyɛ. Awa e wundɛ hɛlɛŋ yama niya kisi e yaŋ thana thonkino ba koro.

¹⁸Awa Mariki woŋ kɔŋ yama ni kisi ka bɛyiniŋ banɛnɔy fooma haaŋ e yaŋ nɔŋ tɛŋa ka Hugbakine hukɛnama haŋ ka ariana. Miŋ dunkuneŋ niŋ yiki ba kɔy yo kɔy! Amiina.

¹⁹Yaŋ maaŋ Pirisila na mɛnɛ Akuwila, mɛnɛ mpoo ki ka Onisifɔrɔsi kiŋ.

²⁰Irasatɔsi pɛyɛ ka Kɔrinthi, awa yaŋ pɛy Torofimɔsi na ka Mailitɔsi baa wundɛ pethɔita kɔtɔ.

²¹Yɔla ba yama pɛnka saanuŋ thamɔ baŋ ba thɔɔ. Yubiyulɔsi, Pudɛnsi, Lainɔsi, mɛnɛ Kulɔdiya maaŋ yina iŋ mbɛnda ntuŋ beŋ fooma ka Mariki woŋ.

²²Haliko Mariki woŋ niyɔiŋ iŋ yina nda woŋ. Haliko makutiyɛ ma ka Masaala maŋ ma niyɔiŋ iŋ beŋ fooma.