Read West-Central Limba Taitɔsi 1 Bible Online

Taitɔsi 1 - West-Central Limba bible

Taitɔsi 1

¹Yama Pɔli, bawali wo ka Masaala woŋ, iŋ baseri wothɔɔkɔ wo ŋindi Yisɔs Kraist woŋ. Yaŋ thanki nde yetho awa e yaŋ ŋindo ba mase lanɛya ba ka bi thanki nde Masaala yɛtha beŋ, awa iŋ ba bindɛ katitɔkɔ ka nɔndi ba dina wokɛntuŋ woŋ thanani baŋ,

²ka kahe miŋ thukuma kɛ ba kuta sii ba kɔy yo kɔy. Masaala wo sa tɛpi ŋasɔkɛ woŋ, wundɛ na niyɛ mina lahiri sii baŋ baŋ kabi wundɛ tha hintiŋ niye therine ka fai woŋ.

³Naa fuŋande malɔkɔ magbeeŋ, wundɛ tɔŋɔŋ wuŋ ka huseri nama haŋ. Huseri haŋ haŋ huna dunkuno yaŋ ba tɛpa iŋ Masaala, Banikisi wokɛntuŋ woŋ.

⁴Yama gbalite yina kuthagba koŋ koŋ, Taitɔsi, baa hatiŋ na nda yi saathɛ ba na yɛrɔkɔy yi mathanani ma ka Kraist maŋ, nɔŋ na yɛrɔkɔy yaŋ mɛŋ na. Haliko Masaala, Fanda ntuŋ woŋ, mɛnɛ Kraist Yisɔs, Banikisi ntuŋ woŋ, kutiyɛ yina nkinikiniŋ, e dunkune yina mathɛbɛ.

⁵Yaŋ pɛy nde yina ka Kiriti ba haliko yi be sisini wuyɔhɔy ba na bɛyiniŋ ba ba hɛ niyɔ baŋ niyo. Awa e yi hɛlɛŋ yɛtha bakalani bibayahɛŋ beŋ ba makɔmandeni maŋ ka mɛti yo mɛti. Simɔkɔ bɛyiniŋ fooma ba thanki yaŋ yina toŋinuwe baŋ.

⁶Bakalaŋ woŋ kiŋ ba niyɔ wo pankɔy bɛy; wundɛ kiŋ ba niyɔ iŋ yɛrɛmɛ wunthe nape. Awa mpati nama bi kiŋ ba niyɔ bi niyɛ lanɛya. Awa bindɛ ka ba niyɔ bakalabantheni iŋ bi baŋinɛ yamari.

⁷Ba na niyɔy wuŋ bakɔtɔkɔ woŋ na ba dethiteke wali ba Masaala baŋ, wundɛ kiŋ ba nɛnɛ niyɔ wo pankɔy bɛy. Wundɛ ka ba niyɔkɔ kaba. Wundɛ ka ba niyɔ wɔ thurɔy thukuma, wundɛ ka ba yilɔ iŋ mampa, wundɛ ka ba niyɔ badekey, wundɛ ka ba niyɔ wo thimo kɔbiri wudankande.

⁸Kɛrɛ wundɛ kiŋ ba niyɔ wɔ yɛrɔkɔy wɔ yo wɔ ka banka nama, awa wundɛ thimo ba niya bayɔhɔy. Wundɛ kiŋ ba niyɔ wɔ punkɛ kɛriŋiyɛ yɛthɛ nama. Wundɛ kiŋ ba niyɔ wɔ thumbɛ. Wundɛ kiŋ ba niyɔ wɔ dunkune Masaala na yiki. Wundɛ kiŋ ba niyɔ wɔ dinkɔy.

⁹Wundɛ niyɔiŋ wɔ bohitɔkɔy wukahɛ Huseri hu yɔhɔy niyo lanɛya haŋ, hu mɛyiyande iŋ mathanani maŋ haŋ. Ka gboŋa babɛina, kɛna wundɛ punku ba niye biya bihɛna kuthɔnthɔ iŋ mathanani manɔndi maŋ, awa e hɛlɛŋ punka ba toŋine biya bi ba sɔkinɔkɔ mathanani mayɔhɔy maŋ banɛnɔy namɛŋ baŋ.

¹⁰Bimandiŋ bi kiŋ kɛndɛ bi thimo ba baŋina yamari e bindɛ kɔ thɔkina biya iŋ thana namɛŋ kɔthɔ haŋ, yameŋ ntiŋ bɛy bi sikiyɔkɔ beŋ maŋaye ka dina wo ka biYusu beŋ woŋ.

¹¹Wu kɔŋ niyɔ wuyɔhɔy ba bindɛ pinda gbonkiya namɛŋ haŋ baa bi kɔŋ ni ba mpooni kimandiŋ yema mathanani namɛŋ ma be sisande ba bindɛ yema maŋ. Bɛy bakuyaahu bɛna ba thaninuwa mathanani maŋ maŋ ba haliko ba kuta kɔbiri.

¹²Wunthe ka banabiŋ namɛŋ beŋ, wundɛ na tɛpɛ ba dɔma, na “Biya bi ka Kiriti bi gbonkoy ŋasɔkɛ timo tima. Bindɛ athɔyande iŋ maamiŋ bibaŋɔy! Biya bimayɛini bina iŋ batikiŋ.”

¹³Hu tepe wundɛ haŋ nɔndi bɛna. Niya ba bindɛ kuta mathonko namɛŋ, wuna bindɛ niyɔ iŋ lanɛya banɔndi ka Masaala.

¹⁴Niya ba bindɛ thana pona kuiha ka thabɔrɔiŋ thahothi tha yeheni biYusu beŋ thaŋ, awa mɛnɛ thɔɔni ba ka biyamɛti bi buuhuwɛ nɔndi baŋ beŋ.

¹⁵Ntha yo ntha ki kiŋ kimɛthɛ ka bimɛthɛ beŋ, kɛrɛ ntha ka kimɛthɛ ka bipothuwɛ beŋ mɛnɛ bi ka iŋ lanɛya beŋ, baa masimɔkɔiŋ makɛnamɛŋ maŋ mɛnɛ maniyɔ ma ka thathukuma namɛŋ thaŋ maŋ thanki nde nda pothuwa.

¹⁶Bindɛ thoŋ yonka na bi kɔthɛŋ Masaala na, kɛrɛ maniyɔ makɛnamɛŋ maŋ buuhu huŋ. Biya bina bi sisande ba thambiyo, awa biya bina bi baŋinɛ yamari, awa bindɛ thɛmandeta nda ba niya bɛy yo bɛy bayɔhɔy.