Read West-Central Limba BiHiburu beŋ 10 Bible Online

BiHiburu beŋ 10 - West-Central Limba bible

BiHiburu beŋ 10

¹Siraŋ ba ka biYusu beŋ baŋ ba kiŋ nde hɔkɔŋ sumuiŋ ba bɛyiniŋ bayɔhɔy ba bɔhɛ ba saa baŋ, wuŋ, bɛyiniŋ bagbeeŋ baŋ; magbali mɛna nde hɔkɔŋ ba thɔrintɔkɔ munki muyɔhɔy mu bɔhɛ ba saa muŋ. Sarakɛŋ banthe babɛina ba kɔŋ niya kɔy yo kɔy, nina o nina. Mbu nama Siraŋ baŋ, maŋaye ka sarakɛŋ baŋ, punku niye biya bi thuriye ba niya Masaala na kubatho beŋ bithankinuwɛ?

²Mɛnɛ biya bi ni Masaala na kubatho beŋ nde hɔkɔŋ nthɔŋ niyɔ bimɛthinɔy maŋaye ka hakɛŋ namɛŋ baŋ, bindɛ sa nde nda kutɔkɔ mathonko ma ka hakɛ hali, awa sarakɛŋ baŋ fooma ba kɔŋ nde thanki.

³Kɛrɛ, sarakɛŋ baŋ ba kɔŋ niya nina yo nina ba simina biya ba hakɛŋ namɛŋ baŋ,

⁴baa wasi ba ka manani bithurani mɛnɛ ba ka baahuiŋ sa punku puuthuwa hakɛŋ ba ka biyamɛti.

⁵Ba saabu baŋ baŋ, naa bathɔy Kraist ba saa kafaydo, ndɛ dome ka Masaala: na “Yi thimota sarakɛŋ mɛnɛ munkii kɛrɛ yi thanki kɔsinɔkɔ kɔtɔ ba yaŋ.

⁶Wuŋ yeheta yina ba maamiŋ bitɔɔnuwa beŋ ka bɛsɛ baŋ, maa iŋ sarakɛŋ ba fuŋuna baŋ ba puuthuwa hakɛŋ ba ka biyamɛti.

⁷Huna dome yaŋ, na ‘O Masaala, ya yama, yaŋ be ni mathimo makɛnda maŋ, nɔŋ na gbalo nde wuŋ ba yaŋ na ka buku wo ka Siraŋ baŋ woŋ na.’”

⁸Bɛy bamayoŋ ba tepe wundɛ Masaala na bɛna baŋ baŋ, na “Yi thimota, awa wuŋ yeheta yina ba kuta sarakɛŋ, munkii, maa maamiŋ bi si tɔɔnuwa ka bɛsɛ baŋ ba puuthuwa hakɛŋ ba ka biyamɛti.” Wundɛ tepe nde haŋ haŋ baŋ hali na niyɔy nde wuŋ na sarakɛŋ baŋ baŋ fooma ba kɔŋ nde fuŋuna nɔŋ na tepe nde Siraŋ ba ka Masaala baŋ na.

⁹Kɛna dome ndɛ, na “O Masaala, ya yama, yaŋ be ni mathimo makɛnda maŋ.” Huna thankaŋ Masaala ba sarakɛŋ batiyɔ baŋ fooma e ndɛ kiya saraka ba ka Kraist baŋ ka makooye mabɛina.

¹⁰Naa ni Yisɔs Kraist ba thimo Masaala ba ndɛ niya baŋ, hakɛŋ ntuŋ baŋ methino fooma maŋaye ka kɔtɔ nama ku fuŋuno saraka koŋ hanthe napethi.

¹¹Bafode yo Bafode wo ka biYusu beŋ kɔŋ nde kɔ ni wali nama baŋ timo tima e kɔ fuŋuna sarakɛŋ banthe babɛina lɔkɔiŋ fooma; kɛrɛ sarakɛŋ baŋ baŋ sa punku puuthuwa hakɛŋ baŋ hali.

¹²Kraist, saraka banthe napethi bɛna fuŋuŋ ndɛ ba hakɛŋ baŋ, awa saraka bɛna ba niyɔ kɔy yo kɔy. Naa thanki ndɛ fuŋuna saraka baŋ baŋ, wundɛ dɔŋɔy kuwaŋ ka yɔnkɔ huthome hu ka Masaala haŋ ka madoŋe mayiki maŋ.

¹³Kɛna doŋe nda wundɛ ka yumba haaŋ nɔŋ yɔkɔŋ Masaala sisi hadeni bikɛnama beŋ ka ŋathaki nama ŋaŋ ka pothi.

¹⁴Ka saraka banthe baŋ baŋ kɛna niye ndɛ ba bi thankɛ methino ka hakɛŋ namɛŋ baŋ beŋ niyɔ bithankinuwɛ kɔy yo kɔy.

¹⁵Awa Yina wo ka Masaala woŋ toŋine hɛlɛŋ mina maseri makɛnama maŋ. Ka yenke, ndɛ tepe ba dɔma, na

¹⁶“Mayukunande maŋ maŋ baŋ mɛna yaŋ ni iŋ bindɛ ka malɔkɔiŋ ma see maŋ. Yaŋ Mariki woŋ na tɛpɛ nɛŋ: Yaŋ kɔŋ thiyi sirani niŋ baŋ ka thathukuma namɛŋ thaŋ awa e yaŋ bɛŋ gbala ka masiyini namɛŋ maŋ.”

¹⁷Awa ndɛ dome hɛlɛŋ, na “Yaŋ sa nɔŋ nda siyi hakɛŋ namɛŋ baŋ mɛnɛ banɛnɔy ba bindɛ ni baŋ.”

¹⁸Huna, naa thanki nda bindɛ peniyo muŋ muŋ baŋ fooma na, bindɛ ka nda hɛlɛŋ ba fuŋuna saraka ba puuthuwa hakɛŋ hali.

¹⁹Mbɛndaŋ beŋ, miŋ kiŋ nda iŋ mayoho mathankɛ nagburu ba biyande kaake ka yamɛ nthɔŋ nda kuwa kɛ saathɛ ba wasi ba toŋe Yisɔs ka tuka nama haŋ.

²⁰Wundɛ pɛthiyɛ mina gboŋa baŋama, bapethɔy, ba daŋande thika babimɛ ba yanto nde mateete ba biyande ka yamɛ nthɔŋ nda kuwa kɛ, gboŋa ba thɔyande nɔŋ kɔtɔ kukɛnama koŋ.

²¹Miŋ kiŋ nda iŋ bafode wo bohitɛ sɛmbɛ wo dethiteke banka ba ka Masaala baŋ.

²²Miŋ thuriyeŋ Masaala na iŋ thathukuma ntuŋ thaŋ fooma mɛnɛ lanɛya bakahɛ, mɛnɛ thathukuma tha thankɛ nda methino ŋaye ka mathonko ma ka hakɛ, mɛnɛ ŋakɔtɔ ŋa biyo iŋ mandi makele nagberere.

²³Miŋ bohitɔkɔiŋ wukahɛ-kahɛ kukahe ntuŋ thukuma ku miŋ gbonkiyiyɛ koŋ, baa miŋ punkeŋ ba piteke Masaala na ba ndɛ kɔ kɔsina lahiri nama baŋ.

²⁴Miŋ tutuyandeŋ thukuma, miŋ masiyandeŋ, miŋ thimiyandeŋ, miŋ niyandeŋ bayɔhɔy.

²⁵Miŋ bɛiŋ pɛy mabari ma ka thuŋande ka tha banthe maŋ, nɔŋ na pɛy biya binɔndi ba nɛŋ niya na. Miŋ thayuwandeŋ timo tima, nɔŋ na kute nda beŋ Malɔkɔ ma ka saa hu ka Mariki woŋ haŋ ma si yaŋ thuriye na.

²⁶Saraka ka nɔŋ nda ba fuŋuna ba puuthuwa hakɛŋ mɛnɛ miŋ key hɛlɛŋ ka kɔtɔkɔy thuŋ ka niya hakɛ ka sapa mahɛŋ ma na thanki miŋ toŋino nɔndi baŋ na.

²⁷Mu pɛyɛ nda miŋ ba niya, yɔkɔŋ ba nda yumba iŋ payɔ malɔkɔ ma ka kukɔnsɔŋɔŋ koŋ ma see maŋ mɛnɛ buu bugbɛki bu si tɔɔni bi sɔkinɔkɔy Masaala na beŋ.

²⁸Wɔ yo wɔ wo tha putiyɔ Siraŋ ba ka Musa baŋ, wɔ bɛina kɔŋ kɔra wu ka iŋ nkinikiniŋ naa ndɛ konsiŋino e ndɛ kututo mathonko maŋaye ka maseri ma ka biya biye maa bitaati.

²⁹Mbu nama ntiŋ nda wuŋ niyɔ ba wɔ yethitɔy Hati ka Masaala woŋ? Wɔ wo niyɛ wasi ba ka mayukunande ma ka Masaala maŋ iŋ biyamɛti ba mɛthɛŋ wɔ woŋ ka hakɛ nɔŋ ntha ki kɔyuwɛ mɔlɔŋ kina? Wɔ wo yakɛ Yina wo ka Masaala wo sisi makutiyɛ maŋ woŋ? Siyuwaŋ hɛ kugbasaŋati kunɛnɔy-nɛnɔy ku nɔŋ wɔ bɛina kutu koŋ!

³⁰Ba miŋ kɔthɛŋ wɔ tɛpɛ woŋ ba dɔma, na “Yaŋ kiŋ iŋ mayoho ba gbasiŋita, awa yaŋ kɔŋ tɛnkɛŋ.” Awa ndɛ na tɛpɛ ba dɔma, na “Mariki woŋ kɔŋ kɔnsɔŋɔŋ biya bikɛnama beŋ.”

³¹Bɛy bagbɛki bɛna wɔ ba thɔɔ ka yɔnkɔ hu ka Masaala wopethɔy woŋ haŋ!

³²Siyuwaŋ hɛ na nde wuŋ bena ka malɔkɔiŋ ma daŋande maŋ. Ka malɔkɔiŋ maŋ maŋ baŋ, naa thanki nda bena waŋ ba ka Masaala baŋ bende na, beŋ niyo nambara iŋ bɛyiniŋ babɔyɛ, kɛrɛ haaŋ hɛ beŋ punkɔita iŋ nambarɛŋ babɛina.

³³Lɔkɔiŋ banɔndi beŋ yako nde ka sɛthɛ e beŋ niyo bɛyiniŋ bathoonɛ. Awa malɔkɔiŋ manɔndi beŋ kɔsinɔkɔy nde ba thɔɔtɔ biya bi thankɛ niyo bɛyiniŋ baŋ baŋ beŋ.

³⁴Beŋ niyɔy nde nkinikiniŋ ba biya bi thiyo ka yeeli woŋ beŋ. Awa naa thanki beŋ bohito munki mukendeŋ muŋ fooma, beŋ ni muyuŋ e beŋ yehitɔkɔ wumandiŋ, baa beŋ kɔthɛŋ ba dɔma na beŋ kiŋ iŋ hintiŋ ntha ki yamɛ niyɔ waŋ ba muŋ, ntha ki niyɔ kiŋ ba kɔy yo kɔy.

³⁵Baŋ teetuwɔ thathukuma, baa wu kɔŋ bena sisiyɛ kuthunkuŋ kumandiŋ.

³⁶Beŋ kiŋ ba niya kuthithi, wuna beŋ punku niya mathimo ma ka Masaala maŋ awa wuna beŋ kutu mu thanki ndɛ bena niya lahiri muŋ.

³⁷Ba magbali ma ka Masaala maŋ tepe, na “Wuŋ pɛyɛ wuyetenaŋ, awa ndɛ wo ba saa woŋ kɔŋ see; awa ndɛ sa bɔɔli saa hubɛina.

³⁸Namo nama biyaŋ bithumbɛ beŋ bi kɔŋ ni lanɛya e bindɛ niyɔ iŋ sii. Kɛrɛ mɛnɛ wunthe ka bindɛ dapiyɔkɔy, wuŋ sa yama yehe ba wundɛ.”

³⁹Miŋ ka nda biya bi hɛlɛŋ dapiyɔkɔ e miŋ piriŋa. Kɛrɛ miŋ kiŋ nda ba niyɔ biya bi niyɛ lanɛya e miŋ niyɔ kisi.