Read West-Central Limba BiHiburu beŋ 13 Bible Online

BiHiburu beŋ 13 - West-Central Limba bible

BiHiburu beŋ 13

¹Kaaŋ ka kɔtɔkɔy thimiyande ndeŋ haŋ nɔŋ biya bihuwɛndiya ka Kraist.

²Baŋ piitɔ ba yɛrɔkɔ thahinɛŋ ka yikiyani ndeŋ baŋ. Biya binɔndi bi kiŋ nde bi yɛrɔkɔy thahinɛŋ ka yikiyani namɛŋ haaŋ bindɛ yɛrɔkɔ malekɛŋ ka thana kɔthɔ.

³Baŋ piitɔ bi thiyo ka yeeli woŋ beŋ, wu niyɔyŋ bena nɔŋ bena ka yeeli woŋ iŋ bindɛ. Baŋ piitɔ bi niyɔ thɔrɔ beŋ, wu niyɔyŋ bena nɔŋ bena niyɔ thɔrɔ ka nanthe iŋ bindɛ.

⁴Biya fooma bi thiyɛŋ kuyɛntande yiki, awa bayɛntiŋ beŋ mɛnɛ yɛrɛmɛŋ biyento beŋ bi bɛiŋ tikitande mutaye iŋ biya bihɛna. Baa Masaala kɔŋ thonkine biya fooma bi ni ŋabɛini ŋahakuwande beŋ.

⁵Baŋ tindɛ thimo kɔbiri wudankande, teŋoŋ wumo wuma wu iŋ beŋ. Ba Masaala tepe, na “Yaŋ sa yina pɛyɛŋ; awa yaŋ sa yina baŋinɔkɔ.”

⁶Miŋ kahɛŋ thathukuma e miŋ dɔma, na “Mariki woŋ na bamase wokiyaŋ, awa yaŋ sa payɔ. Mbɛ mu wɔmɛti yama punku niya?”

⁷Baŋ piitɔ biya bi yenke bena katitɔkɔ beŋ, bi yenke nde bena tepe thampa tha ka Masaala thaŋ beŋ. Siyuwaŋ na nde bindɛ iŋ na tukuwe bindɛ na, awa yemitɔŋ lanɛya bakɛnamɛŋ baŋ.

⁸Yisɔs Kraist wo na heŋ nthɔŋ ndɛ na, nɛna hɛ hɛlɛŋ ndɛ, awa nɛna ndɛ niyɔ kɔy yo kɔy.

⁹Baŋ mɛkɛŋ ba mathanani yo mathanani maŋama bena fuŋuta ka gboŋa baseŋa baŋ. Wu kɔŋ niyɔ wuyɔhɔy miŋ ba kahinuwo thathuma iŋ makutiyɛ ma ka Masaala maŋ, wuŋ ka ba kahinuwo thathukuma iŋ muthɔma muthɔɔkɔ, mu sa nde mase bi muŋ thɔŋ beŋ.

¹⁰Bafodeni bi nde ni wali ka banka bathika ba nde biYusu beŋ niye Masaala na kubatho baŋ beŋ ka nda iŋ mayoho ba thɔma ka bɛsɛ ntuŋ baŋ.

¹¹Bafode Womandiŋ wo ka biYusu beŋ woŋ kɔŋ sisi wasi ba ka maamiŋ ba bɛŋ si fuŋuna saraka ba hakɛŋ ka yamɛ nthɔŋ nda kuwa kɛ; kɛrɛ maamiŋ bi kɔra beŋ bi kɔŋ tɔɔnuwa hɛŋ ka niye bindɛ yikiya ka.

¹²Ba saabu baŋ baŋ huna tuke nde hɛlɛŋ nɛnɛ Yisɔs hɛŋ mɛti bamandiŋ baŋ haliko ba mɛthina biya beŋ ŋaye ka hakɛŋ iŋ wasi nama baŋ.

¹³Bɛna, miŋ kaayɛŋ kɛnama ka hɛŋ mɛti baŋ e miŋ ka hanande kuyaahu koŋ iŋ wundɛ.

¹⁴Ba miŋ ka iŋ mɛti bamandiŋ bagbeeŋ kafay dondo baŋ; kɛrɛ mindo yumbu mɛti bamandiŋ ba nɔŋ see baŋ.

¹⁵Huna, maŋaye ka yɔnkɔ hu ka Yisɔs, miŋ gbuŋunuwɛŋ Masaala na timo tima, wuna saraka ba miŋ fuŋune ka thahothi thakɛntuŋ thaŋ, naa miŋ ni keŋ nama koŋ yiki.

¹⁶Baŋ piitɔ ba niya bayɔhɔy iŋ ba masiyande, baa sarakɛŋ baŋ baŋ bɛna yeheŋ Masaala na thukuma.

¹⁷Putiyɔŋ bi bena katitɔkɔ beŋ awa e beŋ mɛya yamariŋ namɛŋ beŋ. Bindɛ bina dethiteke bena lɔkɔiŋ fooma baa bi boheŋ ba tɔŋa kuna wali namɛŋ baŋ ka Masaala. Mɛnɛ beŋ putiyɔy bindɛ, bi kɔŋ ni wali namɛŋ baŋ iŋ thathukuma thayɔhɔy, mɛnɛ huŋ kutɛ, bi kɔŋ bɛŋ ni biŋurɛ. Mɛnɛ wuŋ niyɔy nɛnɛ nɛŋ, wuŋ sa punku ba bena mase hali.

¹⁸Kaaŋ ka kɔtɔkɔy ba mina niyiyɛ kuraminɛ haŋ. Miŋ niyeŋ lanɛya ba dɔma na miŋ kiŋ iŋ thathukuma thayɔhɔy, baa miŋ thimoŋ ba niya bɛy bathumbɛ lɔkɔiŋ fooma.

¹⁹Yaŋ theteke bena fooma kaye-kaye ba beŋ niya kuraminɛ ba Masaala be yama duu hɛlɛŋ ka ŋinda kendeŋ ka ka wuthurɔy wuŋ baŋ.

²⁰Masaala thanki ŋayina Yisɔs Kraist wo Mariki ntuŋ woŋ ka tuka haŋ, wo niyo Batɔli takɛŋ beŋ woŋ saathɛ ba wasi nama ba toŋe ndɛ ka tuku nama haŋ ba kahitinɛ mayukunande ma kɔy yo kɔy maŋ.

²¹Haliko Masaala wo iŋ mathɛbɛ woŋ dunkune bena ntha yo ntha kiyɔhɔy ki panke beŋ wuna beŋ ni ba niŋ yeheŋ thukuma. Haliko Masaala niye Kraist na wali ba niya ba niŋ yehe ka siini bakɛntuŋ baŋ. Haliko Kraist niyo yiki kɔy o kɔy! Amiina.

²²Mbɛndaŋ bi miŋ ka lanɛya baŋ beŋ, yaŋ theteke bena ba beŋ pona kuiha iŋ muyuŋ huseri hukiyaŋ hu ni kuthɔnthɔ haŋ; baa kuthagba ku gbalite yaŋ bena koŋ koŋ baŋ athurɔ.

²³Yaŋ thimoŋ ba beŋ kɔthɔ ba dɔma na wɛnda ntuŋ Timothi fuŋuto ka yeeli woŋ iŋ bi thiyɛ niŋ kɛndɛ beŋ. Mɛnɛ ndɛ see dondo baŋ ka wuthurɔy wuŋ baŋ, yaŋ kɔŋ niŋ diŋ ka kaa kendeŋ ka.

²⁴Maaniyaŋ mina bi bena katitɔkɔ beŋ fooma mɛnɛ biya bi ka Masaala beŋ fooma. Mbɛnda ntuŋ bi miŋ ka lanɛya baŋ beŋ ka kuyɛkɛŋ ku ka Itali maaŋ bena fooma.

²⁵Haliko Masaala niyiyɛ bena fooma bayɔhɔy.