Read West-Central Limba BiHiburu beŋ 3 Bible Online

BiHiburu beŋ 3 - West-Central Limba bible

BiHiburu beŋ 3

¹Mbɛndaŋ bi miŋ ka lanɛya baŋ, awa beŋ hɛlɛŋ niyɔ bi thiyo iŋ Masaala, siyuwaŋ Yisɔs na wo ŋindi nde Masaala woŋ ba niyɔ Bafode Womandiŋ ba lanɛya ba miŋ gbonkiyiyɛ baŋ.

²Wundɛ niyɔy nde wɔ yɔhɔy niyo lanɛya ka Masaala, wo yɛthɛ niŋ woŋ ba niya wali baŋ baŋ woŋ, nɔŋ na niyɔy nde nthɔŋ Musa wɔ yɔhɔy niyo lanɛya na ka banka ba ka Masaala baŋ na.

³Wɔ wo thoyɛ banka baŋ woŋ kiŋ ba dunkuno yiki bamandiŋ-mandiŋ wuŋ yama ba banka baŋ. Nɛna sisande Yisɔs ba niyo yiki bamandiŋ-mandiŋ wuŋ yama ba Musa.

⁴Banka yo banka wɔmɛti na thoyɛ bɛŋ. Awa Masaala na thoyɛ ntha yo ntha.

⁵Musa wɔ na nde wɔ yɔhɔy niyo lanɛya ka banka ba ka Masaala baŋ nɔŋ bawali, awa ndɛ gbonkoy nde ba bɛyiniŋ ba nɔŋ Masaala gbonkoy baŋ.

⁶Kɛrɛ Kraist ayɔhɔ niyo lanɛya nɔŋ Hati wo kɛriŋiyɛ banka ba ka Masaala baŋ. Mina banka bakɛnama baŋ mɛnɛ miŋ kahe thathukuma e miŋ kaa ka kɔtɔkɔy niya lanɛya ba dɔma na miŋ kɔŋ nɔŋ kutu mu thanki ndɛ niya mina lahiri muŋ.

⁷Huna, nɔŋ na tepe nthɔŋ Masaala maŋaye ka Yina nama woŋ na, na “Mɛnɛ beŋ yuye hɛ thampa thakiyaŋ thaŋ,

⁸baŋ niyɔ bathanthini nɔŋ na nde mbembɛŋ ndeŋ beŋ na naa baŋanti nde bindɛ yama na, na ni nde bindɛ ka lɔkɔ babɛina ka wula baŋ naa gbɛrɛŋɛŋ bindɛ yama.

⁹Kɛnkɛɛ baŋ kɛna gberiŋinuwe bindɛ yama, hali na thanki nde nda bindɛ kuta bɛyiniŋ ba thanki yaŋ niya baŋ ba thaninɛŋ kɔnthɔ-kanaŋ.

¹⁰Huna, ka lɔkɔ babɛina yaŋ thɔɔyɛ ka mathoŋ ba biya beŋ beŋ baŋ e yaŋ dɔma, na ‘Masiyini ma ka biya beŋ beŋ maŋ niyɔy nawuruke awa bindɛ baŋaŋ ba putiyɔ yamari niŋ woŋ.’

¹¹Huna ka mathoŋ ka teete yaŋ gbiŋe ba dɔma, na ‘Haaŋ nɔŋ bindɛ sa biyande ba si hɛmuwa iŋ yaŋ.’”

¹²Bendo bintɔni niŋ bi miŋ ka lanɛya baŋ, niyaŋ kuthɛgbɛ wuna sa wɔ wunthe ka beŋ niyɔ iŋ thukuma hunɛnɔy-nɛnɔy e huŋ niya ba ndɛ thana niya lanɛya e ndɛ sikina Masaala wopethɔy woŋ sɔkɔrɔ.

¹³Kɛrɛ niyɔŋ na sa wɔ wunthe ka beŋ thokino iŋ hakɛ ba ndɛ niyɔ bathanthiŋ. Masiyandeŋ timo tima, na hintiŋ miŋ gbonkoy ba “hɛ,” nɔŋ na gbonkoy nde thampa tha ka Masaala thaŋ na.

¹⁴Ba miŋ fooma miŋ kiŋ iŋ kufɛŋ ka bɛyiniŋ ba ka Kraist baŋ mɛnɛ miŋ bohe wukahɛ iŋ kaha thukuma hu nde iŋ miŋ mayoŋ haŋ.

¹⁵Naŋ naŋ baŋ nɛna tepe magbali ma ka Masaala maŋ, na “Mɛnɛ beŋ yuye hɛ thampa tha ka Masaala thaŋ, baŋ niyɔ bathanthini, nɔŋ na nde mbembɛŋ ndeŋ beŋ na naa baŋanti nde bindɛ Masaala na na.”

¹⁶Mbɛ bindɛ bi yuyɛ nde thampa tha ka Masaala thaŋ e bindɛ niŋ baŋinta? Bindɛ bina fooma bi fuŋutu nde Musa maŋaye ka huwaayine haŋ ka kuyɛkɛŋ ku ka Iyipiti koŋ.

¹⁷Mbɛ bindɛ bi thooye nde Masaala ka mathoŋ ba thaninɛŋ kɔnthɔ-kanaŋ? Bindɛ bina nde bi niyɛ hakɛ beŋ, e bindɛ ŋɔɔtuwa bitukɛ ka wula baŋ.

¹⁸Naa gbiŋe nde Masaala ba dɔma, na “Haaŋ nɔŋ bindɛ sa biyande ba si hɛmuwa iŋ yaŋ,” mbɛ bi nde wundɛ dɔŋ? Wundɛ kɔŋ nde dɔŋ bi baŋintɛ niŋ beŋ.

¹⁹Miŋ kute na tha bindɛ punku biyande ka kuyɛkɛŋ koŋ, baa bindɛ tha ni lanɛya.