Read West-Central Limba BiHiburu beŋ 5 Bible Online

BiHiburu beŋ 5 - West-Central Limba bible

BiHiburu beŋ 5

¹Bafode Womandiŋ yo Bafode Womandiŋ yetho ŋaye ka bintɔni nama beŋ e ndɛ toŋino ba niya wali ba ka Masaala baŋ saathɛ ba kɛnamɛŋ, ba fuŋuna munkii mɛnɛ saraka ba hakɛŋ.

²Bafode Womandiŋ nɔŋ woŋ baŋ wɔmɛti na hɔkɔŋ awa ndɛ ka wothankinuwɛ, huna wundɛ punkeŋ niyɔ iŋ thukuma huthɛbɛ iŋ bi be kɔthɔ beŋ e bindɛ kɔ piriŋinuwɔ.

³Awa ba na niyɔy wuŋ ndɛ ka wɔ thankinuwɛ, yɔkɔŋ ndɛ be fuŋuŋ saraka wuŋ ka hɔkɔŋ ba hakɛŋ ba ka biya beŋ baŋ bathɔ, kɛrɛ iŋ ba hakɛŋ nama baŋ hɛlɛŋ.

⁴Wɔ yo ka wo yɛthiyɔkɔ ba niyɔ iŋ yiki ba ka niyɔ Bafode Womandiŋ. Yɔkɔŋ thiya hu ka Masaala haŋ nagbɛti huna ni ba wɔ niyɔ Bafode Womandiŋ nɔŋ na nde Arɔŋ na.

⁵Wuna biyɛ Yisɔs tha nde sɛkɛthi yiki ba ka Bafode Womandiŋ. Kɛrɛ Masaala dome niŋ, na “Hatiŋ na yi; ka hɛ yaŋ niyɔy hɛ fanda.”

⁶Masaala tepe hɛlɛŋ ka magbali nama maŋ ka tha ka hɛna, na “Yi kɔŋ nɔŋ niyɔ bafode ba kɔy yo kɔy, wo si sɛkɛthi makooye ma ka Mɛlikisidɛki maŋ.”

⁷Ka niyɔ hu ka Yisɔs kafaydo haŋ, wundɛ ni ŋaraminɛ mɛnɛ ŋathɔnthɔŋɔŋ iŋ sampɛrɛŋ batɔɔkɛ mɛnɛ manɛɛni ka Masaala, wo punku ba niŋ niya kisi woŋ ŋaye ka tuka haŋ. Wɔ na nde wundɛ wothathinɔkɔy e wundɛ niyɔ wɔ dunkunɔkɔy, awa Masaala yuye nde nɛnɛ niŋ.

⁸Kɛrɛ hali na nde wundɛ Hati ka Masaala na, ndɛ thani ba mɛya yamari maŋaye ka nambarɛŋ nama baŋ.

⁹Naa thanki ndɛ niyo wɔ thankinuwɛ, ndɛ see nda niyɔ ka tha ka kisi baŋ ŋaye ba biya fooma bi mɛyiyɛ niŋ yamari beŋ.

¹⁰Awa Masaala dome nɛnɛ niŋ ba ndɛ niyɔ Bafode Womandiŋ wo si sɛkɛthi makooye ma ka Mɛlikisidɛki maŋ.

¹¹Miŋ kiŋ ba gbonkiya wubɔyɛ ba bɛyiniŋ baŋ baŋ, kɛrɛ akaahi ba bena bɛŋ hakiniyande, baa beŋ akaahi ka metho bɛy.

¹²Ka lɔkɔ baŋ baŋ beŋ kiŋ nde nda ba niyɔ karimɔkɔiŋ, kɛrɛ haaŋ hɛ beŋ kiŋ nthuŋ ba thaninuwo hɛlɛŋ mathananini mamayoŋ maŋ ŋaye ka thampa tha ka Masaala thaŋ. Beŋ kiŋ nde nda ba thɔma muthɔma mukahɛ, kɛrɛ haaŋ hɛ bendo bɔpi mabiini thuŋ.

¹³Wɔ yo wɔ nɛnɛ wo bɔpi mabiini hatiyɛ na hintiŋ wundɛ, awa wundɛ hakiyandota hɛ bɛybathumbɛ iŋ basikɔy.

¹⁴Muthɔma mukahɛ mu kiŋ ba biya bi thankɛ fuŋa beŋ, bi nda beŋ, maŋaye ka thanuwa, bi kɔŋ punku ba hakiyando bayɔhɔy iŋ banɛnɔy.