Read West-Central Limba BiHiburu beŋ 8 Bible Online

BiHiburu beŋ 8 - West-Central Limba bible

BiHiburu beŋ 8

¹Yaha hu ka bɛyiniŋ ba miŋ gbonkoy baŋ fooma wu kiŋ ba dɔma na miŋ kiŋ iŋ Bafode Womandiŋ, wo dɔŋɔy ka yɔnkɔ huthome hu ka Masaala wo Gbaku Womandiŋ woŋ haŋ, kuwaŋ ka yensi nama haŋ ka ariana, ka madoŋe mayiki maŋ.

²Wundɛ kɔŋ ni wali ka tha ka yamɛ nthɔŋ nda kuwa kɛ nɔŋ Bafode Womandiŋ, ka banka bathika bagbeeŋ ba kiyo iŋ Mariki woŋ baŋ, wuŋ ka ka ba kiye wɔmɛti baŋ.

³Bafode yo Bafode Womandiŋ wali nama bɛna ba fuŋuna munkii mɛnɛ sarakɛŋ ba ka maamiŋ ka Masaala. Awa nɛna hɛlɛŋ Bafode wokɛntuŋ Womandiŋ woŋ, yɔkɔŋ ndɛ be hɛlɛŋ nɛŋ niyɔ iŋ ntha ba fuŋuna saraka.

⁴Mɛnɛ ndɛ kiŋ nde kafaydo, ndɛ sa nde niyɔ bafode hali, baa bafodeni bibɔyɛ bi kiŋ kafaydo bi fuŋuŋ saraka munkii mu thɔnthɔŋɔŋ Siraŋ ba ka Musa baŋ.

⁵Wali ba ka hufode ba bindɛ ni baŋ ba kiŋ hɔkɔŋ sumuiŋ ba tɔŋina wali ba ka Bafode ntuŋ Womandiŋ woŋ baŋ ka ariana. Huna yelo nde Musa haŋ naa bathɔy ndɛ ba kiya banka bathika baŋ ba kɛndɛ niye Masaala na kubatho. Masaala tepe niŋ ba dɔma, na “Ba piitɔ ba kiye banka bathika baŋ nɔŋ na toŋino yi ka kusɛri koŋ ka thinthi na ba bɛŋ kiye.”

⁶Kɛrɛ ka tete Yisɔs dunkuno wali ba ka hufode ba yamɛ niyɔ waŋ ayaŋ ba bakɛnamɛŋ baŋ. Nɔŋ na nthɔŋ mayukunande ma yukunande ndɛ mateete ma ka Masaala iŋ biya nama beŋ waŋ na, baa mɛŋ there ka niya lahiri ba niya bɛyiniŋ ba yamɛ niyɔ waŋ baŋ.

⁷Mɛnɛ bɛy banɛnɔy tha nde niyɔ ka mayukunande mamayoŋ maŋ, mayukunande mamaye sa nde nda hɛlɛŋ duu ka thimiyo.

⁸Kɛrɛ Masaala kutute biya bikɛnama beŋ bɛy banɛnɔy, wuna biyɛ ndɛ kɔŋ dɔŋ, na “Malɔkɔiŋ maŋ mɛ kɔŋ see ma yaŋ duu ka niye mayukunande iŋ biya bi ka Isirɛli beŋ mɛnɛ biya bi ka Yuda beŋ. Yaŋ Mariki woŋ na tɛpɛ nɛŋ.

⁹Mayukunande mabɛina mɛŋ sa niyɔ nɔŋ mayukunande ma yukunande nde yaŋ iŋ mbembɛŋ namɛŋ beŋ maŋ ka lɔkɔ ba bohe yaŋ bindɛ thɛnkɔ e yaŋ bindɛ fuŋuta ka kuyɛkɛŋ ku ka Iyipiti koŋ. Bindɛ tha nde kɔsɔŋ lahiri namɛŋ ba ni bindɛ ka mayukunande ma ni yaŋ iŋ bindɛ maŋ, bɛna yaŋ tha bindɛ poniyɛ kuiha hali.

¹⁰Ka tete, mayukunande maŋ maŋ mɛna nda yaŋ ni iŋ biya bi ka Isirɛli beŋ ka malɔkɔiŋ ma see maŋ. Yaŋ Mariki woŋ na tɛpɛ nɛŋ: Yaŋ kɔŋ thiyi sirani niŋ baŋ ka masiyini namɛŋ maŋ awa e yaŋ bɛŋ gbala ka thathukuma namɛŋ thaŋ. Yaŋ kɔŋ niyɔ Masaala wokɛnamɛŋ, awa bi kɔŋ niyɔ biya bikiyaŋ.

¹¹Wɔ sa nɔŋ nda niyɔ ka bindɛ wo thanani ntɔ nama na maa ba dɔma ka wo bindɛ kuyɛkɛŋ kunthe, na ‘Kɔthɔ Mariki woŋ.’ Baa bindɛ fooma bi kɔŋ yama kɔthɔ, there ka wothahuwɔy woŋ haaŋ kaŋ ka womandiŋ woŋ.

¹²Yaŋ kɔŋ bindɛ pɛniyɛ hakɛŋ bakɛnamɛŋ baŋ, awa yaŋ sa nɔŋ nda siyi banɛnɔy namɛŋ baŋ hali.”

¹³Naa ndɛ gbonkoy ba mayukunande maŋama maŋ e ndɛ mɛŋ dɔma maŋama, Masaala ni ba mayukunande mamayoŋ maŋ niyɔ matiyɔ; awa ntha yo ntha nɛnɛ ki tiyɔy e kiŋ dɔrima, kiŋ sa nambi ka piriŋa.