Read West-Central Limba BiHiburu beŋ 9 Bible Online

BiHiburu beŋ 9 - West-Central Limba bible

BiHiburu beŋ 9

¹Mayukunande mamayoŋ maŋ ma kiŋ nde iŋ sirani ba niye kubatho mɛnɛ hɛlɛŋ ka tha ka yeheni wɔmɛti ba niye Masaala na kubatho.

²Bindɛ kiye nde banka bathika, awa makonko mamayoŋ ma ka banka babɛina ma kɔŋ nde dɔma na ka kuwɛ kɛ. Kɛndɛ ka bɛina kɛna kiyo nde ntha ki ka mumɔɔli muŋ tuta mɛnɛ thebulu wo ka ŋatoŋ nɔŋ munkii mu dunkuna ka Masaala tuta kɛ.

³Thika babimɛ babaye baŋ ba yanteŋ nde ka biyo hu ka makonko makaake maŋ, awa makonko mamaye mabɛina ma kɔŋ dɔma ka yamɛ nthɔŋ nda kuwa kɛ.

⁴Kɛndɛ kaake kɛna bɛsɛ baboyi ka gbomgbo baŋ toonuwo kɛ, mɛnɛ kuma ba pututo fooma iŋ boyi ba ka mayukunande maŋ baŋ, mɛnɛ hɛlɛŋ somba huboyi haŋ e ŋatoŋ ŋa ŋaye ka ariana ŋaŋ kɛndɛ niyɔ, kugbɔkɔdi ku ka Arɔŋ ku thahɛ koŋ ku kiŋ nde kɛndɛ, mɛnɛ ŋawalaka ŋaye ŋatharaka ka gbalo sirani baŋ kɛ.

⁵Ka kuma baŋ ka thinthi, kɛna kiyo mathɔyandeŋ maye ma yehinuwo nɔŋ malekɛŋ bi iŋ ŋapɛli ba tɔŋina kupɛnkintiyande ku ka Masaala koŋ, e bindɛ pɛmpiŋina ŋapɛli namɛŋ ŋaŋ e ŋɛŋ pututa ka biyamɛti peniyo hakɛŋ namɛŋ baŋ kɛ. Kɛrɛ miŋ sa hɛ punku methine bena bɛyiniŋ baŋ baŋ nagberekethe.

⁶Nanaŋ baŋ nɛna deenko nde bɛyiniŋ baŋ. Bafodeni beŋ bi kɔŋ nde kɔ key timo tima ka makonko mamayoŋ maŋ ba ka niya wali namɛŋ baŋ.

⁷Kɛrɛ yɔkɔŋ Bafode Womandiŋ woŋ na key kaake ka makonko mamaye maŋ, awa ndɛ kɔŋ wuŋ ni hanthe ka nina haŋ. Naa ndɛ kɔ key, ndɛ kɔŋ diŋ wasi ba ka maama ka kaa. Ndɛ kɔŋ bɛŋ ka fuŋuŋ saraka ka Masaala ba hakɛŋ nama baŋ mɛnɛ ba ka biya nama ba ni bindɛ ka thana kɔthɔ baŋ.

⁸Yina wo ka Masaala woŋ na thaninuwɛ nagberekethe fooma ŋaye ka madɛɛnki maŋ maŋ baŋ ba dɔma na gboŋa ba biiyande ka yamɛ nthɔŋ nda kuwa kɛ pɛthɔita hɛ hanimaa na hintiŋ makonko mamayoŋ maŋ na.

⁹Wuŋ baŋ mathɔyande mɛna nde ma tɔŋinɛ ka lɔkɔ ba doŋe hɛ miŋ baŋ. Wuŋ baŋ tɔŋɔŋ ba dɔma na munkii muŋ mɛnɛ maamiŋ bi pɛnkita ka Masaala beŋ sa punku niya thathukuma tha ka bi ni ŋabatho beŋ thaŋ thathumbɛ ka kuwaŋ ku ka Masaala koŋ.

¹⁰Baa bi kɔŋ niye kubatho koŋ koŋ baŋ iŋ muthɔma, muthiiyuwe, mɛnɛ yenke mɛthinɔkɔ huhakuwande haŋ ka naamu woŋ. Muŋ muŋ baŋ fooma mu kɔŋ kutiyoko nagberekethe mu si niya. Wuŋ baŋ wuna nde niya haaŋ yɔkɔŋ naa see Masaala kahataŋ madɛɛnki maŋama na.

¹¹Kɛrɛ Kraist thanki nde nda saa e si niyɔ Bafode Womandiŋ wo ka bɛyiniŋ bayɔhɔy ba sɛɛ nda kafaydo baŋ. Awa banka bathika ba ndɛ niye wali baŋ ba yameŋ niyɔ hita e bɛŋ yama niyɔ bathankinuwɛ; wɔmɛti kutɛ yehinuwɛ bɛŋ, wuŋ thɔyande ba dɔma bɛŋ tha yehinuwa nɔŋ na yehinuwo kafay woŋ na.

¹²Naa biyande Yisɔs banka bathika baŋ, ndɛ biyande toloŋ e kaa ka yamɛ nthɔŋ nda kuwa kɛ, awa hanthe napethi biyande na ndɛ kɛndɛ. Wundɛ si key kɛndɛ, ndɛ tha diŋ wasi ba ka baahuiŋ mɛnɛ manani bithurani ka kaa ba ka fuŋuna saraka. Kɛrɛ wasi nama baŋ deŋe na ndɛ ka kaa e mina ka boyiyɛ kisi ba kɔy yo kɔy.

¹³Mayoŋ nde, wasi ba ka baahuiŋ, manani bithurani, mɛnɛ hɔɔtɔ hu ka manaŋ wohatiyɛ wotɔɔnuwɔy muna nde Bafode woŋ konke biya bi be nde thanki mɛtha ka kɔtɔkɔy ka Masaala beŋ. Awa wuŋ baŋ wuna nde bindɛ mɛthɛŋ maŋaye ka thana mɛtha namɛŋ haŋ.

¹⁴Mɛnɛ wasi ba ka maamiŋ punke niya wuŋ baŋ, mbu ntiŋ nda wasi ba ka Yisɔs baŋ? Ŋaye ka yɔnkɔ hu ka Yina wo kɔy yo kɔy woŋ haŋ, Yisɔs dunkunɔkɔy ba fuŋunɔkɔ saraka bathankinuwɛ ka Masaala. Wasi bakɛnama baŋ ba kɔŋ mɛthɛŋ thathukuma ntuŋ thaŋ ŋaye ka thonko hu ka bɛyiniŋ ba kati wɔ ka tuka baŋ, wuna miŋ niyiyɛ Masaala wopethɔy woŋ wali.

¹⁵Ba saabu baŋ baŋ huna niiye Kraist wɔ sisinuwɛ mayukunande maŋama maŋ. Wuna bi thiyi Masaala beŋ kutu thaduba tha kɔy yo kɔy tha ni nde wundɛ lahiri thaŋ. Wuŋ baŋ wu kɔŋ punku niyɔ baa tuka niyɔy hu bakiŋɛ biya ka hakɛŋ ba ni nde bindɛ baŋ naa nde bindɛ ka pothi ka mayukunande mamayoŋ maŋ.

¹⁶Mɛnɛ wɔ ni mayukunande ba tɛpa na kɛɛ nama baŋ hanuwo naa ndɛ tuku, yɔkɔŋ wuŋ toŋino na ndɛ tuku saanuŋ biya kɔ niya ntiŋ ba ka mayukunande maŋ baŋ.

¹⁷Ba mayukunande nɔŋ maŋ maŋ ka ntha yo ntha naa doŋe hintiŋ wo niyɛ mɛŋ woŋ. Ma kɔŋ ni wali kɛrɛ yɔkɔŋ wo niyɛ mɛŋ woŋ tuku.

¹⁸Wuna biyɛ nde mayukunande mamayoŋ maŋ ma kɔŋ nde ni wali baa maamiŋ bi kɔŋ nde kɔra e wasi namɛŋ baŋ dunkuno ka Masaala.

¹⁹Ka yenke, Musa koyoŋ nde fooma yamariŋ ba ka Siraŋ baŋ ka biYusu beŋ. Kɛna sekithe ndɛ wasi ba ka manani bithurani beŋ baŋ mɛnɛ ba ka baahuiŋ e bɛŋ tikitinuwande iŋ mandi, e muŋ konke ka buku wo ka gbalo Siraŋ baŋ kɛ mɛnɛ ka biya beŋ fooma. Hande hu dɔma na hisɔpi mɛnɛ bɔɔyɛ butaka bupothinɔy muna ni ndɛ ba bɛŋ konke.

²⁰Kɛna dome ndɛ, na “Wasi baŋ baŋ bɛna thankaŋ mayukunande ma ni nde Masaala yamari ba beŋ putiyɔ maŋ.”

²¹Ka gboŋa babanthe babɛina bɛna konke hɛlɛŋ Musa wasi baŋ ka banka bathika baŋ mɛnɛ ka munki muŋ fooma mu nde sɛkitha ba niya Masaala na kubatho muŋ.

²²Yaathi, maŋaye ka Siraŋ baŋ, ntha yo ntha ki kiŋ ba methino ka wasi, awa biyamɛti sa pɛniya hakɛŋ namɛŋ baŋ yɔkɔŋ tuka niyɔy e wasi toŋo.

²³Munki muŋ muŋ mu nde hɔkɔŋ ba thɔrintɔkɔ munki mu ka ariana mugbeeŋ muŋ, mu kiŋ nde ba methino ka gboŋa babanthe babɛina. Kɛrɛ munki mu ka ariana muŋ gbeeŋ mu thimoŋ sarakɛŋ ba yamɛ ba baŋ baŋ.

²⁴Ba Yisɔs tha nde biyande ka tha ka kuwɛ ka yeheni wɔmɛti, ka nde hɔkɔŋ ba thɔrintɔkɔ ka kuwɛ ka gbeeŋ kɛ. Ka ariana toloŋ kɛna key ndɛ, ka key nda wundɛ kɔɔ ka kɔtɔkɔy ka Masaala saathɛ ba kɛntuŋ.

²⁵Bafode Womandiŋ wo ka biYusu beŋ woŋ kɔŋ nde key ka tha ka yamɛ nde kuwa ka nina yo nina iŋ wasi ba ka maamiŋ. Kɛrɛ Kraist tha nde doŋe fuŋunɔkɔ saraka ba malɔkɔiŋ mabɔyɛ,

²⁶baa ndɛ kɔŋ nde nɔŋ doŋe niyɔ thɔrɔ tima o tima there ka masɛsi ma kafay woŋ maŋ. Ka tete, naa bohe malɔkɔ ma ka mapeye ma kafay woŋ maŋ thuriye, ndɛ tɔŋinɔkɔy hanthe napethi, ba teetuwa sɛmbɛ ba ka hakɛ maŋaye ka fuŋunɔkɔ nama saraka haŋ.

²⁷Wɔ yo wɔ boheŋ ba tuka hanthe napethi, awa na wuŋ ŋaye kɛndɛ, wundɛ boheŋ ba konsiŋino iŋ Masaala.

²⁸Ka maniyɔ mamanthe mabɛina hɛlɛŋ mɛna dɔmɛ Kraist kɔŋ fuŋuna saraka hanthe ba si puuthuwa hakɛŋ ba ka biya bibɔyɛ. Wundɛ kɔŋ hɛlɛŋ tɔŋinɔkɔ kafaydo hukaye, kɛrɛ wuŋ ka nda saathɛ ba hakɛ, kɛrɛ ba si niya kisi bi bare niŋ yumba beŋ.