Read West-Central Limba Yemisi 1 Bible Online

Yemisi 1 - West-Central Limba bible

Yemisi 1

¹Kuthagba koŋ koŋ baŋ ŋaye ka Yemisi, bawali wo ka Masaala woŋ mɛnɛ Mariki woŋ Yisɔs Kraist. Yaŋ maaŋ bendo biya bi ka Masaala beŋ fooma bi pankande beŋ kafay woŋ fooma.

²Mbɛndaŋ beŋ, yehitɔkɔŋ wubɔyɛ-bɔyɛ naa ŋagbɛrɛŋɛni ŋahakuwande siiya bena pɛnki.

³Kɔthɔŋ ba dɔma na saabu ba ka ŋagbɛrɛŋɛni ŋa ka kulanɛya kukendeŋ koŋ ba kiŋ ba bena dunkune sɛmbɛ ba beŋ be tha thamɔ.

⁴Muyuŋ bakendeŋ baŋ ba kɔsinɛŋ bena ba niyɔ biya bi kɔɔyɛ wukahɛ haaŋ e beŋ thana thamɔ, haliko beŋ be punku ba niyɔ biya bithankinuwɛ, e beŋ kuta kusaŋa, awa beŋ sa panki ntha yo ntha ka lanɛya ndeŋ baŋ.

⁵Kɛrɛ mɛnɛ wɔ kiŋ ka mateete makendeŋ wo ka iŋ kele, ndɛ niyɛŋ kuraminɛ ka Masaala. Ndɛ kɔŋ niŋ huŋ dunkune, baa Masaala kɔŋ dunkune wɔ yo wɔ kele hubɔyɛ ti thimo ndɛ ba niŋ huŋ dunkune. Awa ndɛ kɔŋ wuŋ niye ka nkinikiniŋ.

⁶Kɛrɛ naa beŋ kɔ ni kuraminɛ, niyɔŋ iŋ kulanɛya, awa e beŋ thana niyɔ iŋ haamɛ hali. Wɔ yo wɔ wo niyɔ haamɛ, ndɛ athɔyande nɔŋ na munkulu hu ka mankɔ ka haŋ hu katitando na iŋ huru haŋ kamo kama.

⁷Wɔ bɛina woŋ baŋ siiya basikiyɔkɔ na, awa ndɛ sa punku ba yɛtha bɛy ba ndɛ ni. Awa ndɛ bɛiŋ siyi ba dɔma na ndɛ kɔŋ kutu ntha yo ntha ki ndɛ thɔnthɔŋɔŋ Mariki woŋ.

⁹Bendo mbɛndaŋ bibamɔnɛŋ beŋ, gbuŋunɔkɔŋ naa Masaala ŋataŋ bena ka thinthi ka kɔtɔkɔy kɛnama.

¹⁰Awa bendo mbɛndaŋ bidinhaŋiŋ beŋ, gbuŋunɔkɔŋ naa Masaala ni ba beŋ niyɔ bendo thathinɔkɔy, baa dinhaŋiŋ beŋ bi kɔŋ daŋande nɔŋ na nthɔŋ musɛnkɛŋ muyɔhɔy mu ka ŋayeŋ ŋaŋ muŋ yayi na.

¹¹Naa kaŋ wotɔɔkɛ woŋ bɛndi nthɔŋ, ŋayeŋ ŋabɛina mɛnɛ musɛnkɛŋ muŋ thokinɔkɔy, awa wuyɔhɔy wubɛina teetuwɔy. Awa nɛna hɛlɛŋ dinhaŋiŋ beŋ tuku naa hintiŋ bindɛ ni wali ba kuta kɔbiri woyamɛ.

¹²Mayehitɔkɔ ma kiŋ ka wɔ wo niyɔ wo yɔhɔy niyo lanɛya ka ŋagbɛrɛŋɛŋ ŋa niŋ pɛnki ŋaŋ. Mɛnɛ ndɛ punke daŋande ŋagbɛrɛŋɛŋ ŋabɛina, wundɛ kɔŋ kutu kuthunkuŋ ku ka sii ba ni Masaala lahiri ka bi thimo niŋ beŋ.

¹³Mɛnɛ wɔ thiiko ka ŋagbɛrɛŋɛŋ ŋaŋ ŋaŋ, wundɛ bɛiŋ tɛpi ba dɔma, na “Thiiko haŋ haŋ baŋ ŋaye yama ka Masaala.” Masaala sa punku thiiko ba niya banɛnɔy, awa wundɛ hɛlɛmaŋ nɛnɛ, wundɛ sa thiiki wɔ ba niya banɛnɔy.

¹⁴Kɛrɛ wɔ kɔŋ thiika nɔŋ na niŋ kufiyo nama kunɛnɔy koŋ kahe na, iŋ na niŋ kuŋ yose na.

¹⁵Awa kufiyo kunɛnɔy koŋ koŋ baŋ kuna niyɔ hɔɔyɛ haaŋ kuŋ mpaa hakɛ; awa naa hakɛ baŋ thanki kuntha, bɛna sisi tuka haŋ.

¹⁶Mbɛndaŋ bi thimo yaŋ, baŋ mɛy ba thokino.

¹⁷Munkii yo munkii muyɔhɔy muŋ see maŋaye ka ariana; muŋ thuhe maŋaye ka Masaala, wo yehinuwɛ wani ba ka kuthahinɛ koŋ baŋ. Ndɛ na Masaala wo sa thikipi woŋ, awa wundɛ sa sikiyɔkɔ e niya ba huntuma niyɔ.

¹⁸Wundɛ yɛthi ba mina mpaa. Thampa thakɛnama thanɔndi thaŋ niye ma wuŋ, haliko miŋ be sɛkɛthi makooye mamayoŋ maŋ ka ntha yo ntha ki yeheni ndɛ.

¹⁹Mbɛndaŋ bi thimo yaŋ beŋ, siyuwaŋ haŋ haŋ baŋ. Wɔ yo wɔ niyɔiŋ wɔ thimo ba pona kuiha, kɛrɛ ndɛ niyɛŋ kuthɛgbɛ ka gbonkiya. Ndɛ hɛlɛmaŋ niya kuthɛgbɛ ka thɔɔ ka mathoŋ.

²⁰Mathoŋ ma ka wɔmɛti maŋ sa punku niya mathumbɛ ma thimo Masaala maŋ.

²¹Pɛyaŋ niya bɛyiniŋ bahakɛ baŋ, awa e beŋ pɛya maniyɔ ndeŋ manɛnɔy maŋ fooma. Dunkunɔkɔŋ ka Masaala, e beŋ yɛrɔkɔ thampa nama tha thiye wundɛ ka thathukuma thakendeŋ thaŋ, tha punku ba bena niya kisi thaŋ.

²²Baŋ thɔkinɔkɔ ba hɔkɔŋ peye ka poniyɛ kuiha thampa nama thaŋ nagbɛti. Ponaŋ kuiha e beŋ thɛŋ thiya ka mani.

²³Wɔ yo wɔ wo hɔkɔmaŋ poniyɛ kuiha thampa thaŋ, kɛrɛ wundɛ tha thɛŋ thiyi ka mani, ndɛ athɔyande nɔŋ wɔ dethɔkɔ ka sɛnkɛ e ndɛ kutɔkɔ na wundɛ.

²⁴Naa ndɛ thanki nthɔŋ dethɔkɔ e ndɛ kɔ kaa, ka wuthurɔy wubɛina ndɛ piitɔy na wundɛ.

²⁵Kɛrɛ wɔ wo dethi wuyɔhɔy ka siraŋ bathankinuwɛ ba punku ba niya wɔmɛti kɔɔrɔ baŋ, iŋ wo key ka kɔtɔkɔy ka poniyɛ bɛŋ kuiha woŋ, awa iŋ wo sa hɔkɔŋ yuyɛ e ndɛ piitɔ, kɛrɛ ndɛ wuŋ thiya ka mani, wɔ bɛina kɔŋ thiyiya thaduba iŋ Masaala ba wu ni ndɛ wuŋ.

²⁶Mɛnɛ wɔ kiŋ ka mateete makendeŋ wo siyuwɛ ba dɔma na wɔ thumbɛ na wundɛ, mahɛŋ ma ndɛ sa bohi hothi nama haŋ, dina nama woŋ ka ntha yo ntha. Wɔ bɛina thɔkinɔkɔ ma thɔkinɔkɔ.

²⁷Wuŋ baŋ wuna siyuwe Masaala Fanda ntuŋ woŋ dina womɛthɛ wogbeeŋ woŋ: ba mase bayihani beŋ mɛnɛ bagbokorani beŋ ka thɔrɔiŋ bakɛnamɛŋ baŋ. Mɛnɛ ba kɔsina yɛthɛ nda baŋ ba thana niyo wɔ sikɔy iŋ kafay woŋ baŋ.