Read West-Central Limba Yemisi 3 Bible Online

Yemisi 3 - West-Central Limba bible

Yemisi 3

¹Mbɛndaŋ beŋ, niyaŋ ba biya biyetenaŋ hɔkɔŋ niyɔ karimɔkɔiŋ ka mateete makendeŋ, baa beŋ kɔthɛŋ ba dɔma na mindo karimɔkɔiŋ beŋ miŋ kɔŋ bohitoko wukahɛ ka konsiŋino daŋandeŋ ba biya bihɛna beŋ.

²Miŋ fooma mindo piriŋinuwɔ. Wɔ yo wɔ wo sa piriŋinɔ ka ba ndɛ gbonkoy, wɔ thankinuwɛ na, awa wɔ na hɛlɛŋ wo punkɛ kɛriŋiyɛ yɛthɛ bakɛnama baŋ fooma.

³Naa miŋ ŋathi karahu baŋ ka hothi hu ka soo woŋ haŋ haliko ndɛ be mina mɛyiyɛ yamari, miŋ kɔŋ punku niya ba wundɛ kaa kamo kama ka thimo miŋ.

⁴Maa siyuwaŋ hɛ gbe bamandiŋ baŋ. Bɛŋ abukuyi awa bɛŋ kɔ katitoko iŋ huru hukahɛ haŋ, kɛrɛ kora woyete punkeŋ ba bɛŋ dapinuwande e kɛɛbini woŋ bɛŋ punka katitɔkɔ kamo kama ka thimo ndɛ ba bɛŋ kaaye.

⁵Awa nɛna hɛlɛŋ hiliŋ haŋ. Dethaŋ hɛ ti peye huŋ ka mɛɛsa te, kɛrɛ hu kɔŋ gbuŋunɔkɔ ba bɛyiniŋ babukuyuwɛ. Siyuwaŋ hɛlɛŋ buu buthahuwɔy buŋ nɔŋ na buŋ tɔɔni kuyɔkɔsɔ kumandiŋ koŋ natharaŋ.

⁶Awa hiliŋ haŋ athɔyande iŋ buu buŋ. Huŋ kɔɔyɛ yɔkɔŋ ba banɛnɔy ba kafay woŋ, awa huŋ sekithe makooye nama ka kɔtɔ koŋ. Huŋ teeti wɔmɛti woŋ fooma. Huŋ thiye sii ba ka wɔmɛti baŋ fooma buu, awa hu kɔŋ nɛnɛ thiya buu iŋ yahanama.

⁷Wɔmɛti woŋ punkeŋ ba kɛriŋiyɛ awa wundɛ kɔŋ kɛriŋiyɛ maamiŋ siiyani fooma, maamiŋ bi ka hee, bɛtiŋ, bibɔlɔkɔy, mɛnɛ heni.

⁸Kɛrɛ wɔmɛti yo ka hɛ wo punkɛ ba kɛriŋiyɛ hiliŋ haŋ. Huŋ sa mɛyi ba kɛriŋiyo, awa huŋ athiŋa iŋ mayara manɛnɔy ma kɔri.

⁹Miŋ kɔŋ huŋ thiye Mariki wo Fanda ntuŋ woŋ maamo, awa e miŋ hɛlɛŋ huŋ kɔ yake biyamɛti bi yehinuwo beŋ ka mathɔyande ma ka Masaala maŋ.

¹⁰Thampɛŋ tha ka thiya maamo iŋ tha ka mayakiŋ thɛŋ kɔ fuŋa ka hothi hunthe hubɛina. Mbɛndaŋ beŋ, wuŋ ka nɛŋ ba niiye hali.

¹¹Nthondi kinthe ki ka mandi sa punku ba fuŋuna mandi mathimɔy mɛnɛ maŋalɔy ka nanthe.

¹²Mbɛndaŋ beŋ, kuyeŋ ku iŋ mutiŋ muthɔma ku dɔma koŋ na kugbemgbeŋ sa punku ba tima mutiŋ muhɛna; nɛna hɛlɛŋ magbemgbeŋ maŋ mɛŋ sa tiŋ ka kuyeŋ kuhɛna. Awa nɛna hɛlɛŋ, nthondi ki ka mandi mamɛɛti kiŋ sa punku ba fuŋuna mandi mathambɛ.

¹³E wɔ kiŋ ka mateete makendeŋ wo iŋ kele e ndɛ metho bɛy yo bɛy? Ndɛ kiŋ ba wuŋ tɔŋina ka maniyɔ makɛnama mayɔhɔy maŋ iŋ ka bɛyiniŋ bayɔhɔy ba wundɛ ni iŋ thathinɔkɔ mɛnɛ kele.

¹⁴Kɛrɛ mɛnɛ thathukuma ndeŋ thaŋ thiŋo iŋ kuhɔti kumandiŋ mɛnɛ kufiyo ba yama wɔ yo wɔ, baŋ niyɔkɔ kukabanɛ, awa baŋ gbonkoy hothi ma sɔkinɔkɔ nɔndi baŋ.

¹⁵Kele hu nɔŋ na haŋ haŋ na siiya tha ŋaye ka ariana. Hu kiŋ hɔkɔŋ ba kafaydo; huŋ ŋaye ka maniyɔ ma ka huwɔmɛtiya mɛnɛ mbayiŋ.

¹⁶Kamo kama ka kuhɔti kumandiŋ mɛnɛ kufiyo ba yama wɔ yo wɔ, kɛna kɔnthɔhili mɛnɛ banɛnɔy bahakuwande fooma.

¹⁷Kɛrɛ naa yi kute wɔ wo iŋ kele hu ŋaye ka ariana haŋ woŋ, wɔ bɛina kɔŋ niyɔ wɔ mɛthɛ; bɛy bayɔhɔy ba yi niŋ yenke kututa baŋ bɛna. Wundɛ kɔŋ hɛlɛŋ niyɔ wɔ thɛbinɛ thukuma; wundɛ kɔŋ niyiyɛ biya bihɛna bayɔhɔy, awa e wundɛ mɛya ba poniyɛ bindɛ kuiha. Wundɛ kiŋ iŋ nkinikiniŋ ba biya bihɛna, awa wundɛ kɔŋ sisi mutiŋ mu ka bɛyiniŋ bayɔhɔy ba wundɛ ni ba biya bihɛna. Wundɛ hakinandeta biyamɛti, awa wundɛ ka wɔ banitɔkɔ.

¹⁸Wɔ bɛina kɔŋ niyɔ bathiyi mathɛbɛ; bathuu mathɛbɛ na wundɛ, awa wundɛ na nɔŋ mutiŋ mu ka mathumbɛ.