Read West-Central Limba 1 Pita 2 Bible Online

1 Pita 2 - West-Central Limba bible

1 Pita 2

¹Pɛyaŋ niya banɛnɔy baŋ, pɛyaŋ kɛriŋa hothi haŋ, pɛyaŋ thɔkina biya haŋ, pɛyaŋ thahunaŋ thaŋ maa mayakiŋ maŋ.

²Mpati bi dɔy mpoo bi thimoŋ ba bɔpa mabiini mabɔyɛ. Nɛna beŋ ba thimo hɛlɛŋ Thampa tha ka Masaala thaŋ. Thɛna thɔyande iŋ mabiini mayɔhɔy. Tha kɔŋ ni ba beŋ kɔɔ wukahɛ e beŋ niyo kisi.

³Nɔŋ na tepe magbali ma ka Masaala maŋ na ba dɔma, na “Beŋ thanki nda mina bayɔhɔy ba ka Mariki woŋ baŋ.”

⁴Saaŋ ka Mariki woŋ, wo thɔyande iŋ raka hupethɔy hu baŋaŋ biyamɛti haŋ ba huŋ niyɔ humayɛini, kɛrɛ Masaala yɛthi huŋ ba huŋ niyɔ hukahɛ mɔlɔŋ.

⁵Saaŋ beŋ be niyɔ nɔŋ tharaka thapethɔy, awa e beŋ mɛkina ba thiyito ka thoya banka ba ka Masaala ba Yina nama woŋ thoyi baŋ, ka beŋ nɔŋ ni wali kɛ nɔŋ kiki ba ka bafodeni bi dunkuno ka Masaala ba fuŋuna saraka kɛnama, ba ndɛ yɛrɔkɔ saathɛ ba ka Yisɔs Kraist, awa e bɛŋ niyɔ ba gbakita iŋ Yina wo ka Masaala woŋ.

⁶Ba magbali ma ka Masaala maŋ tepe, na “Yaŋ yɛthi raka hukahɛ mɔlɔŋ, hu yaŋ dɛŋ ba huŋ yama nthɔŋ nda niyɔ waŋ haŋ ka mɛti ba ka Saiyɔŋ; awa wɔ yo wɔ wo ni niŋ lanɛya wundɛ sa thɔŋ kuyaahu.”

⁷Raka haŋ haŋ baŋ huŋ akahi mɔlɔŋ ka kufɛŋ ku ka bendo niyɛ lanɛya beŋ; kɛrɛ ka kufɛŋ ku ka bi tha ni lanɛya beŋ: na “Raka hu baŋino iŋ bathoyini beŋ haŋ ba huŋ niyɔ mayɛini, huna see niyɔ raka hu yamɛ nthɔŋ nda niyɔ waŋ ka thoya haŋ.”

⁸Awa magbali ma ka Masaala mahɛna tepe hɛlɛŋ, na “Raka hu ni ba biya thuŋɔ huna haŋ haŋ; huna kuthara ku ni ba bindɛ ŋɔta koŋ.” Bindɛ thuŋɔy baa bindɛ tha ni Thampa tha ka Masaala thaŋ lanɛya; awa nɛna thimo Masaala ba nɛŋ wuŋ niiye ba bindɛ.

⁹Kɛrɛ beŋ, siya bɛna beŋ ba yetho iŋ Masaala, beŋ kiŋ bafodeni bi ka Gbaku woŋ, siya ba dunkunɔkɔy ka Masaala, biya bi ka Masaala beŋ, bi yetho ba niya kɛwandi bɛyiniŋ bathakaba ba ni nde Masaala baŋ, wo thiyɛ bena woŋ maŋaye ka huntuma haŋ ba kaa ka waŋ nama bathakaba baŋ.

¹⁰Malɔkɔ thanki daŋande beŋ ka nde biya bi ka Masaala, kɛrɛ ka tete nda beŋ kiŋ nda biya nama; malɔkɔ thanki daŋande beŋ kɔita nde nkinikiniŋ ki ka Masaala kiŋ, kɛrɛ ka tete beŋ kute nkinikiniŋ nama kiŋ.

¹¹Yaŋ theteke bena, bendo thimo yaŋ beŋ, bendo see dɔŋɔ huthahinɛya kafaydo ba wuthurɔy: baŋ dunkuŋ ŋakɔtɔ ndeŋ ŋaŋ ka ŋafiyoiŋ ŋanɛnɔy, ŋa dekeyi yinɛŋ bikendeŋ beŋ timo tima.

¹²Maniyɔ makendeŋ maŋ ka mateete ma ka bi be ni Masaala na lanɛya beŋ ma niyɔiŋ mayɔhɔy-yɔhɔy, huna naa bindɛ tepiye bena ba beŋ niyɔ biya bi ni banɛnɔy, bi be ŋee maniyɔ makendeŋ mayɔhɔy maŋ awa wuna bindɛ gbuŋunu Masaala na ka lɔkɔ ba ndɛ see kɛnamɛŋ.

¹³Mɛnɛ beŋ kiŋ ba yehina Mariki woŋ thukuma, putiyɔŋ wɔmɛti yo wɔmɛti wo kɛrɛŋ; ka yenke, putiyɔŋ Gbaku womandiŋ wo yamɛ bindɛ woŋ fooma,

¹⁴awa mɛnɛ bakɛrɛni bi ŋindi ndɛ beŋ, bi tɔŋɔŋ ndɛ beŋ ba gbasiŋita bi ni wunɛnɔy beŋ, mɛnɛ ba gbuŋunuwa bi ni bathurɔy beŋ.

¹⁵Ba Masaala thimoŋ ba beŋ niya ba biya bimayɛini bi gbonkoy ba be bindɛ kɔthɔ beŋ daanɔkɔ maŋaye ka bɛyiniŋ bayɔhɔy ba beŋ ni baŋ.

¹⁶Niyɔŋ nɔŋ biya bi nda kɔɔrɔiŋ; kɛrɛ baŋ sɛkɛthi hukɔɔriya ndeŋ haŋ ba huŋ niye kabari ba niye hakɛ, kɛrɛ niyɔŋ nda nɔŋ bawaliŋ bi ka Masaala.

¹⁷Thiyaŋ womo woma yiki, thimoŋ mbɛnda ndeŋ bi beŋ ka lanɛya baŋ, payɔŋ Masaala na wuseŋa, awa e beŋ thiya Gbaku womandiŋ woŋ yiki.

¹⁸Bendo bawaliŋ beŋ, yɔkɔŋ beŋ be putiyɔ marikiŋ bikendeŋ beŋ awa beŋ bindɛ thiya yiki wumandiŋ, wuŋ ka hɔkɔŋ ka bi bɔhɛ bena bathurɔy beŋ e bindɛ bena kɔ niya bayɔhɔy, kɛrɛ hali ka bi thiyɛ dɛnkɛŋ beŋ.

¹⁹Masaala kɔŋ bena thiyiyɛ thaduba, mɛnɛ beŋ niyo thɔrɔ e beŋ gbasiŋito ba bɛy banɛnɔy ba tha beŋ ni, na kɔthɛŋ beŋ ba dɔma na mathimo nama na beŋ ni.

²⁰Mbɛ kugbuŋunu ku wɔ kutu mɛnɛ ndɛ gbuduŋo ba bɛy banɛnɔy ba thanki ndɛ niya? Kuna sisande ndɛ ba kuta. Kɛrɛ mɛnɛ beŋ gbuduŋo hali ba bɛy bayɔhɔy ba thanki beŋ niya, Masaala kɔŋ bena thiyiyɛ thaduba ba huŋ.

²¹Ba huŋ bɛna thiye bena Masaala, ba Kraist ka yɛthɛ nama gbeeŋ ndɛ niyo thɔrɔ ba beŋ e ndɛ bena peye mathɔyande. Huna yemaŋ manankɛŋ makɛnama maŋ.

²²Wundɛ tha ni hakɛ hali, awa wɔ yuyeta hɛ ndɛ si kɛrɛŋ hothi hali hanthe.

²³Naa yako ndɛ iŋ biya, wundɛ tha bindɛ tɛnkiniyɛ mayaki; naa niyo ndɛ thɔrɔ iŋ biya, ndɛ tha bindɛ yethe, kɛrɛ ndɛ piteke Masaala na, Bakɔnsɔŋɔŋ wothumbɛ woŋ.

²⁴Kraist ka yɛthɛ nama gbeeŋ ndɛ kate hakɛŋ bakɛntuŋ baŋ ka kɔtɔ nama koŋ ka kuyeŋ kubariŋande koŋ, huna nda miŋ tuku ka kufɛŋ ku ka niya hakɛ baŋ koŋ e miŋ nda niyɔ biya bi ni mathumbɛ. Maŋaye ka yominuwo nama haŋ, kɛna puyo miŋ.

²⁵Beŋ athɔyande nde nɔŋ takɛŋ bipiriŋɛ, kɛrɛ ka tete beŋ siso hɛlɛŋ ba si yema Batɔli wo bena ni kantha woŋ.