Read West-Central Limba 2 Pita 1 Bible Online

2 Pita 1 - West-Central Limba bible

2 Pita 1

¹Yama Saimɔŋ Pita, bawali mɛnɛ baseri wothɔɔkɔ wo ka Yisɔs Kraist. Yaŋ gbalite bena, bendo dunkuno lanɛya ba kahɛ mɔlɔŋ nɔŋ bakɛntuŋ baŋ baŋ, ba dunkuno beŋ saathɛ ba mathumbɛ ma ka Masaala wokɛntuŋ woŋ, iŋ Banikisi ntuŋ woŋ Yisɔs Kraist.

²Haliko bɛyiniŋ bayɔhɔy iŋ mathɛbɛ mathiŋɛ nayerere mu niyɔ iŋ beŋ maŋaye ka makɔthɔ makendeŋ maŋ ba Masaala iŋ ba Yisɔs, Mariki wokɛntuŋ woŋ.

³Sɛmbɛ ba ka Masaala baŋ dunkune mina ntha yo ntha ki panke miŋ ba haliko na miŋ niye iŋ siini ba yeheŋ Masaala na thukuma ŋaye ka makɔthɔ ma ka wundɛ wo thiyɛ mina ba niyɔ iŋ kufɛŋ ku ka yiki iŋ mathumbɛ nama maŋ.

⁴Gboŋa baŋ baŋ bɛna dunkune wundɛ mina munkii mumandiŋ, awa mu kahɛ mɔlɔŋ mu thanki nde ndɛ mina niya lahiri muŋ, ba haliko ŋaye ka munkii muŋ muŋ, miŋ kɔŋ punku ba buthurande iŋ ŋafiyoiŋ ŋateeti ŋaŋ ka dunia baŋ baŋ, ba haliko miŋ be see ba niyɔ iŋ kufɛŋ ku ka maniyɔ ma ka Masaala maŋ.

⁵Ba kolo baŋ baŋ, dekiyɔkɔŋ ba ndinta bayɔhɔy ka lanɛya bakendeŋ baŋ; ka bayɔhɔy bakendeŋ baŋ, ndintaŋ makɔthɔ.

⁶Ka makɔthɔ makendeŋ maŋ, ndintaŋ bakɛriŋiyɛ yɛthɛ ndeŋ. Ka kɛriŋiyɛ yɛthɛ ndeŋ haŋ, ndintaŋ kuthithi; ka kuthithi ndeŋ koŋ, ndintaŋ kɛndɛ putiyɔ Masaala na.

⁷Ka putiyɔ Masaala na ndeŋ haŋ, ndintaŋ mathimiyande ma ka huwɛndiya; ka mathimiyande ma ka huwɛndiya ndeŋ, ndintaŋ mathimo.

⁸Makɔɔni maŋ maŋ mɛna ba niyɔ iŋ beŋ. Awa mɛnɛ beŋ niyɔ iŋ mɛŋ wuthiŋɛ, mɛ kɔŋ bena ni ba beŋ niyɔ bendo kahɛ e beŋ punka niye wali makɔthɔ ma ka Mariki wokɛntuŋ woŋ Yisɔs Kraist maŋ.

⁹Kɛrɛ wɔ yo wɔ wo ka iŋ makɔɔni maŋ maŋ, wɔ mankɔy thaaya na ka thukuma, awa ndɛ sa punku kuta bɛyiniŋ ba ka Masaala baŋ. Awa ndɛ piitɔy nda ba dɔma na ndɛ thanki methino ŋaye ka hakɛŋ bitiyɔ nama beŋ.

¹⁰Bɛna, mbɛndaŋ beŋ, dekiyɔkɔŋ wukahɛ ba niya mathiyi iŋ mayɛthi ma ka Masaala maŋ kɔɔ wukahɛ. Mɛnɛ beŋ ni nɛŋ, beŋ sa nɔŋ nda pɛyɛŋ lanɛya bakendeŋ baŋ.

¹¹Gboŋa baŋ baŋ, bɛna beŋ dunkuno mayoho mathiŋɛ ba biyande ka Hugbakinɛ hu kɔy yo kɔy hu ka Mariki woŋ haŋ iŋ Banikisi wokɛntuŋ woŋ Yisɔs Kraist.

¹²Bɛna yaŋ kɔŋ simiŋ bena timo tima ba bɛyiniŋ baŋ baŋ, hali na wuŋ na beŋ kɔthɛŋ nda bɛŋ e beŋ nda niyɔ bendo kɔɔyiyɔkɔy ka nɔndi ba thanki beŋ kuta baŋ.

¹³Yaŋ simekeŋ ba dɔma na wu kiŋ wuthumbɛ ba bena simina ba bɛyiniŋ baŋ baŋ naa doŋe hintiŋ yaŋ.

¹⁴Yaŋ kɔthɛŋ wuŋ sa nda nambi, yaŋ kɔŋ ŋutu kɔtɔ ku ka huwɔmɛtiya koŋ koŋ, nɔŋ na tepe nde yama Mariki wokɛntuŋ woŋ Yisɔs Kraist nagberekethe.

¹⁵Yaŋ kɔŋ ni ti punke yaŋ ba fuŋuniyɛ bena gboŋa ba beŋ kɔ simeke bɛyiniŋ baŋ baŋ naa yaŋ tuku nɔŋ.

¹⁶Ka tepe bena ba saa husɛmbɛ hu see nde Mariki wokɛntuŋ woŋ Yisɔs Kraist, miŋ tha dekinteke ka mbɔrɔiŋ ki yehinuwo iŋ biyamɛti. Kɛrɛ iŋ thaaya thakɛntuŋ thaŋ, miŋ kutiyɔkɔy nde yiki nama bamandiŋ baŋ.

¹⁷Miŋ kiŋ nde kɛndɛ naa dunkuno wundɛ yiki iŋ Fanda ntuŋ woŋ, naa see thampa thaŋ kɛnama ŋaye ka yiki ba ka Masaala bathanthɛ baŋ nthɔŋ nda fooma ba dɔma, na “Woŋ, hatiŋ wo thimo yaŋ woŋ na, wo yama yeheŋ thukuma woŋ!”

¹⁸Miŋ yuye thampa thaŋ thaŋ ka yɛthɛ bakɛntuŋ ŋaye ka ariana naa nde miŋ iŋ wundɛ ka kusɛri ku ka Masaala koŋ.

¹⁹Huna yame ntiŋ miŋ niye lanɛya maseri ma koyoŋ banabiŋ beŋ maŋ. Wu kɔŋ nde niyɔ wuyɔhɔy ba mɛŋ poniyɛ kuiha, baa ma kiŋ nɔŋ mumɔɔli muna mɔɔli ka huntuma haŋ haaŋ kaŋ woŋ puthɔ, awa haaŋ sosa wo kuputhɔ ku kaŋ woŋ mɔɔluwa kaake ka thathukuma thakendeŋ.

²⁰Ka gboŋa yo gboŋa, simɔkɔŋ ba dɔma na wɔ ka ka yɛthɛ bakɛnama wo punku ba mɛthina nagberekethe hunabi hu thankɛ niyo haŋ ka magbali ma ka Masaala maŋ.

²¹Baa hunabi ka hu sɛɛ hɔkɔŋ nthɔŋ ŋaye ka mamɛyi ma ka wɔmɛti, kɛrɛ biya bi kiŋ nde ka pothi ka makɛrɛŋ ma ka Yina wo ka Masaala woŋ naa bindɛ tɛpi huseri haŋ haŋ ŋaye ka Masaala.