Read West-Central Limba 2 Pita 3 Bible Online

2 Pita 3 - West-Central Limba bible

2 Pita 3

¹Mbɛndaŋ bi thimo yaŋ, kuthagba koŋ koŋ kuna tɛŋinɛ kuŋaye ba bena gbalite. Ka kuthagba yo kuthagba, yaŋ gbɛrɛŋɛŋ ba bena thununa thathukuma ba haliko ba bena simina ba bɛyiniŋ baŋ baŋ.

²Yaŋ thimoŋ ba bena simina ba thampɛŋ tha gbonkiyo nde iŋ banabiŋ bi ka Masaala beŋ iŋ ba yamari ba ŋaye ka Mariki woŋ, wo Banikisi woŋ, ba dunkuno nde beŋ baŋ iŋ baseriŋ bithɔɔkɔ beŋ.

³Humayoŋ haŋ, beŋ kiŋ ba metho ba dɔma na ka malɔkɔiŋ mamankɛ maŋ maŋ, biya binɔndi bi kɔŋ tɔŋinɔkɔ, siini bakɛnamɛŋ baŋ ba kɛriŋiya iŋ ŋafiyo ŋakɛnamɛŋ. Bindɛ kɔŋ bena hɛthi.

⁴Bi kɔŋ thɔnthɔŋɔŋ, na “Wundɛ ni nde lahiri ba saa. E wundɛ sa te nda see? Kama wundɛ? Mbembɛŋ ntuŋ thanki tukuwa, kɛrɛ ntha yo ntha ki kiŋ thuŋ nɔŋ na nde wuŋ ka mathɛrɛŋ maŋ ka dunia baŋ!”

⁵Bindɛ pitinɔkɔy ka kusiasi ba kɔthɔ ba dɔma na ka malɔkɔ ma daŋande nde wuthɔɔkitɛ, Masaala ni yamari; kuthahinɛ koŋ iŋ dunia baŋ niyɔy. Dunia baŋ yehinuwo ŋaye ka mandi maŋ.

⁶Awa dunia bamayoŋ baŋ teetuwo nde hɛlɛŋ ŋaye ka mandi, mandi matɛnkɛ maŋ.

⁷Kɛrɛ kuthahinɛ kuhɛ koŋ, iŋ ntha yo ntha ki kɛndɛ, iŋ dunia bahɛ baŋ, ka yamari wunthe wobɛina Masaala kɔsɔŋ hɛlɛŋ muŋ ba nda teetuwe muŋ iŋ buu. Muŋ kosino ba malɔkɔ ma bohe biya bi be putiyɔ Masaala na beŋ ba konsiŋino iŋ ba teetuwo.

⁸Kɛrɛ baŋ piitɔ bɛy banthe, bendo mbɛndaŋ beŋ: Mahakande ka ka masiyi ma ka Mariki woŋ maŋ mateete ma ka gbɛɛŋ wunthe iŋ thanina wulu wunthe; ka masiyi nama, gbɛɛŋ woŋ iŋ thanina wulu wunthe nanthe nathesi.

⁹Mariki woŋ thamɔita ba thiŋina ba thanki wundɛ niya lahiri baŋ, nɔŋ na simeke biya binɔndi na. Kɛrɛ muyuŋ bɛna iŋ wundɛ ba beŋ, baa ndɛ thimota ba wɔ yo wɔ piriŋa. Kɛrɛ ndɛ thimoŋ ba wɔ yo wɔ sikiyɔkɔ ŋaye ka hakɛŋ bakɛnama baŋ.

¹⁰Kɛrɛ Malɔkɔ ma ka Mariki woŋ maŋ mɛ kɔŋ see nɔŋ batuwaŋ. Ka lɔkɔ babɛina kuthahinɛ koŋ iŋ ntha yo ntha ki kɛndɛ kɔŋ piriŋ iŋ kutɔŋa kumandiŋ. Munkiŋ mu ka dunia fooma mu kɔŋ tɔɔki, awa mu kɔŋ teetuwɔ, awa dunia baŋ iŋ ntha yo ntha ki kɛndɛ kɔŋ piriŋ.

¹¹Mɛnɛ munkiŋ muŋ muŋ teetuwɔy nanaŋ, mbɛ mathɔyande ma ka biya ma beŋ niyɔ? Siini bakendeŋ baŋ ba kiŋ ba niyɔ bakathiŋɔkɔy ka banɛnɔy awa ba dunkunɔkɔy ka kuwaŋ ku ka Masaala koŋ,

¹²naa beŋ yumbu Malɔkɔ ma ka Masaala maŋ. Niyaŋ ba punke beŋ ba ma be see yako, malɔkɔ ma bohe kuthahinɛ koŋ ba tooke e kuŋ teetuwɔ, munkiŋ mu kɛndɛ fooma mu kɔŋ kele.

¹³Kɛrɛ miŋ kiŋ ka yumba ba thanki Masaala niya lahiri baŋ nde: kuthahinɛ kuŋama iŋ dunia baŋama, ka mathumbɛ niye yikiya.

¹⁴Bɛna, mbɛndaŋ beŋ, naa beŋ yumbu ba lɔkɔ babɛina, dekiyɔkɔŋ ba niyɔ bendo mɛthɛ, bendo ka iŋ tɛmpɛ ka thaaya tha ka Masaala thaŋ, iŋ ba niyɔ ka mathɛbɛ iŋ wundɛ.

¹⁵Siyuwaŋ ba muyuŋ ba ka Mariki woŋ baŋ nɔŋ hɛɛra bɛna dunkuŋ ndɛ bena ba bena niya kisi, nɔŋ na gbalite nthɔŋ bena wɛnda ntuŋ woŋ na Pɔli, na wundɛ niye wali kele hu dunkuŋ niŋ Masaala haŋ.

¹⁶Haŋ haŋ huna wundɛ gbonkoy ka kuthagba yo kuthagba ku wundɛ gbali ba sɔkɔ haŋ haŋ. Bɛyiniŋ bakahɛ ba hakiyande biya ba kiŋ ka ŋathagba nama ŋaŋ. Bɛyiniŋ baŋ baŋ, ka biya bi be hakiyando beŋ iŋ bi kɔɔyuwɛ beŋ, bi kɔŋ bɛŋ hakinuwande wuhothi, nɔŋ na bindɛ ni ka magbali mahɛna ma ka Masaala maŋ na. Huna, bindɛ sisiyɔkɔy hupiriŋa.

¹⁷Kɛrɛ beŋ, bendo binyathikiŋ bikiyaŋ beŋ, bendo kɔthɛ nda huŋ beŋ. Pamɔkɔŋ, ba haliko beŋ be tha kata iŋ mathanani maŋasɔkɛ mɛnɛ biya bi sa putiyɔ siraŋ baŋ beŋ, e beŋ ŋɔta ŋaye ka kisi bakendeŋ baŋ.

¹⁸Kɛrɛ kahinaŋ bɔya ka makutiyɛ iŋ makɔthɔ ma ka Mariki woŋ, Banikisi wokɛntuŋ woŋ Yisɔs Kraist. Haliko yiki ba niyɔ iŋ wundɛ, there nda hɛ haaŋ ka wuŋ key! Amiina.