Read West-Central Limba 1 Yɔni 2 Bible Online

1 Yɔni 2 - West-Central Limba bible

1 Yɔni 2

¹Yama bena gbalati kuthagba koŋ koŋ, bendo nɔŋ mpatiŋ beŋ, haliko beŋ be tha ni hakɛ. Kɛrɛ, mɛnɛ wɔ ni hakɛ, miŋ kiŋ iŋ wɔ wo mina thetiyeke Masaala na, Yisɔs Kraist wɔ thumbɛ woŋ.

²Ba Yisɔs Kraist ndɛ na saraka baŋ ba mina pɛniyɛ hakɛŋ ba thanki miŋ niya baŋ. Wuŋ ka hɔkɔŋ ba miŋ bithɔ, kɛrɛ ba biya fooma.

³Mɛnɛ miŋ putiyɔy sirani ba ka Masaala baŋ, miŋ kɔŋ kɔthɔ ba dɔma na miŋ kɔthɛŋ niŋ.

⁴Wɔ yo wɔ wo tɛpi ba dɔma na ndɛ kɔthɛŋ Masaala na, kɛrɛ wundɛ tha putiyɔ sirani nama baŋ, wɔ bɛina bahothi na, awa wundɛ tepeta nɔndi baŋ hali.

⁵Kɛrɛ mɛnɛ wɔ putiyɔy thampɛŋ tha ka Masaala thaŋ, wɔ bɛina na iŋ mathimo mathankinuwɛ ba wundɛ. Wɔ yo wɔ wo tɛpɛ ba dɔma na wundɛ bɔhande iŋ Masaala, kiŋ ba niyɔ nɔŋ na nde Kraist na. Wuŋ baŋ wuna tɔŋɔŋ ba dɔma na miŋ bɔhande iŋ Masaala.

⁷Mbɛndaŋ bi thimo yaŋ beŋ, siraŋ ba yaŋ bena gbalite baŋ bɛŋ ka baŋama, kɛrɛ siraŋ batiyɔ bɛna, ba yuye nde beŋ there ka masɛsi maŋ. Awa siraŋ batiyɔ babɛina bɛna huseri hu thanki beŋ yuyɛ haŋ ŋaye kɛntuŋ.

⁸Halisa, siraŋ ba yaŋ gbalite bena baŋ ba kiŋ baŋama, baa nɔndi ba ka bɛŋ baŋ ba kɔŋ kuto ka Kraist, mɛnɛ hɛlɛŋ kendeŋ. Ba huntuma haŋ huna daŋande haŋ, awa waŋ bagbeeŋ baŋ bɛna bɛndi baŋ.

⁹Mɛnɛ wɔ tepe ba dɔma na wundɛ kiŋ ka waŋ baŋ, kɛrɛ wundɛ thambo wɛndama na, wɔ bɛina ndɛ kiŋ ka huntuma haŋ haaŋ hɛ.

¹⁰Wɔ yo wɔ wo thimo wɛndama na ndɛ niyɔy ka waŋ baŋ, awa wundɛ ka iŋ bɛyi ba ni ba wɔ ŋɔta.

¹¹Kɛrɛ wɔ yo wɔ wo thambo wɛndama na, wundɛ kiŋ ka huntuma haŋ. Ndɛ kɔŋ kaande ka huntuma haŋ awa ndɛ sa kɔthɔ ka wundɛ key, baa huntuma haŋ manke niŋ thaaya.

¹²Yama bena gbalati, bendo mpatiŋ, baa beŋ peniyo hakɛŋ bakendeŋ baŋ saathɛ ba Kraist.

¹³Yama bena gbalati, bendo bifandaŋ, baa beŋ kɔthɛŋ niŋ wo nde there ka masɛsi maŋ woŋ. Yama bena gbalati, bendo lamgbeŋ beŋ, baa beŋ thanki nde punka Sithani na, Wayi Womandiŋ wonɛnɔy woŋ.

¹⁴Yama bena gbalati, bendo mpatiŋ, ba na kɔthɛ beŋ Fanda ntuŋ woŋ. Yama bena gbalati, bendo bifandaŋ, baa beŋ kɔthɛŋ niŋ wo nde there ka masɛsi maŋ woŋ. Yama bena gbalati, bendo lamgbeŋ beŋ, baa beŋ kiŋ bendo kahɛ; thampa tha ka Masaala thaŋ niyɔy kaake kendeŋ, e beŋ punka Wɔ Nɛnɔy woŋ.

¹⁵Baŋ thimo ka fay woŋ iŋ munkiŋ mu ka fay woŋ muŋ. Mɛnɛ beŋ thimo ka fay woŋ, beŋ sa thimo Masaala na, wo Fanda ntuŋ woŋ.

¹⁶Ba munkiŋ fooma mu ka faido muŋ—ŋafiyo ŋanɛnɔy ŋa ka huwɔmɛtiya haŋ ŋaŋ, mɛnɛ milɛ wo ka thaaya thaŋ woŋ, mɛnɛ bukuinɔkɔ hu ka huwɔmɛtiya haŋ—muŋ muŋ fooma ŋayeta ka Fanda ntuŋ woŋ; kɛrɛ muŋ kiŋ hɔkɔŋ ba ka faido.

¹⁷Ka fay woŋ kɔŋ daŋande, awa bɛyi yo bɛyi ba thimo biyamɛti, bɛ kɔŋ hɛlɛŋ daŋande, kɛrɛ wɔ yo wɔ wo ni nɔŋ na thimo Masaala na, ndɛ kiŋ iŋ sii ba kɔy o kɔy.

¹⁸Mpatiŋ, malɔkɔ mamankɛ maŋ thuriye. Beŋ yuye ba Hadeŋ wo ka Kraist woŋ kɔ saa; awa ka tete, hadeni bibɔyɛ bi ka Kraist bindɛ thanki saa, wuna biyɛ miŋ kɔthɔ ba dɔma na malɔkɔ mamankɛ maŋ thuriye.

¹⁹Awa biya beŋ beŋ baŋ bindɛ ka nde ka kiki ntuŋ baŋ gbeeŋ, wuna biyɛ bindɛ mina pɛyɛna. Mɛnɛ bi kiŋ nde ka kiki ntuŋ baŋ, bindɛ sa nde mina pɛyɛŋ. Kɛrɛ wu ni bindɛ wuŋ, tɔŋɔŋ ba dɔma na bindɛ ka nde ka kiki ntuŋ baŋ gbeeŋ.

²⁰Kɛrɛ beŋ koŋo nde Yina wo ka Masaala woŋ iŋ Kraist, awa beŋ see hɛ kɔthɔ nɔndi baŋ.

²¹Yama bena gbalati, wuŋ ka ba dɔma na beŋ kɔita nɔndi baŋ; beŋ kɔthɛŋ nɔndi baŋ, awa beŋ kɔthɛŋ hɛlɛŋ ba dɔma na wɔ yo wɔ wo ka nɔndi baŋ, ndɛ ka ba kɛriŋa hothi.

²²Wɔ yo wɔ wo tɛpi ba dɔma na Yisɔs ndɛ kutɛ Banikisi wo niyo nde lahiri woŋ, bahothi na wundɛ. Hadeŋ wo ka Kraist na wundɛ. Wundɛ baŋaŋ Masaala na, wo Fanda ntuŋ woŋ, mɛnɛ Hati nama woŋ ka nanthe.

²³Ba wɔ yo wɔ wo baŋinɛ Hati ka Masaala woŋ, ndɛ baŋaŋ hɛlɛŋ Masaala na. Awa wɔ yo wɔ wo yɛrɔkɔ Hati woŋ, wundɛ kiŋ hɛlɛŋ iŋ Masaala, wo Fandama woŋ.

²⁴Awa kɔsinaŋ huseri haŋ ka thathukuma ndeŋ thaŋ, hu yuye nde beŋ there ka masɛsi maŋ haŋ. Mɛnɛ beŋ kɔsɔŋ huŋ, beŋ kɔŋ bɔhande timo tima iŋ Hati woŋ, mɛnɛ Fanda ntuŋ woŋ.

²⁵Hati ka Masaala woŋ ni nde mina lahiri ba dɔma na ndɛ kɔŋ mina dunkune sii ba kɔy yo kɔy.

²⁶Yama bena gbalati ba bi bena yɔli ba thɔkina beŋ.

²⁷Kraist koŋe bena Yina wokɛnama woŋ. Na hintiŋ beŋ iŋ Yina wokɛnama woŋ, beŋ panketa wɔ bena thanani. Ba Yina nama woŋ na bena thanani ba bɛyi yo bɛyi, awa bɛyi ba wundɛ bena thanani baŋ, nɔndi bɛna, bɛŋ ka hothi. Putiyɔŋ mathanani ma ka Yina woŋ maŋ, e beŋ kaa ka kɔtɔkɔy ka bɔhande ndeŋ ha ka Kraist.

²⁸Mpatiŋ beŋ, kaaŋ ka kɔtɔkɔy ka bɔhande ndeŋ haŋ iŋ Kraist, haliko miŋ be kahi thathukuma naa wundɛ tɔŋinɔkɔy e miŋ thana nunɔkɔ iŋ kuyaahu ka malɔkɔ ma wundɛ see.

²⁹Nɔŋ na kɔthɛ beŋ ba dɔma na Kraist kiŋ wɔ thumbɛ, bɛna beŋ kiŋ ba kɔthɔ ba dɔma na wɔ yo wɔ wo ni wuthumbɛ, Masaala na mpɛɛ niŋ.