Read West-Central Limba 1 Yɔni 3 Bible Online

1 Yɔni 3 - West-Central Limba bible

1 Yɔni 3

¹Siyuwaŋ hɛ nɔŋ na thimo mina Fanda ntuŋ woŋ wumandiŋ na. Thimo nama humandiŋ haŋ ba miŋ ni ba miŋ domo mpati bikɛnama, awa nɛna miŋ yaathi. Biya bi ka fay woŋ beŋ kɔita Masaala na; wuna biyɛ bindɛ kɔita mina.

²Biya bi thimo yaŋ beŋ, miŋ kiŋ nda mpati bi ka Masaala, kɛrɛ wuŋ toŋineketa hɛ nagberekethe na miŋ si niiye. Kɛrɛ miŋ kɔthɛŋ ba dɔma, naa Kraist tɔŋinɔkɔy, miŋ kɔŋ niyɔ nɔŋ na wundɛ na, baa miŋ kɔŋ niŋ kutu nɔŋ na wundɛ na gbeeŋ.

³Wɔ yo wɔ wo iŋ kukahe thukuma koŋ koŋ ka Kraist, ndɛ kiŋ ba niyɔ wɔ mɛthɛ nɔŋ na Kraist wɔ mɛthɛ na.

⁴Wɔ yo wɔ wo ni hakɛ, ndɛ thinke Siraŋ ba ka Masaala baŋ; baa ba niya hakɛ huna thinka Siraŋ ba ka Masaala baŋ.

⁵Beŋ kɔthɛŋ ba dɔma na Kraist tɔŋinɔkɔy ba si sɛkitha hakɛŋ baŋ, awa beŋ kɔthɛŋ ba dɔma na wundɛ tha ni hakɛ hali.

⁶Huna wɔ yo wɔ wo bɔhande iŋ Kraist ndɛ sa nda key ka kɔtɔkɔy ka niya hakɛ; kɛrɛ wɔ yo wɔ wo key ka kɔtɔkɔy ka niya hakɛ, ndɛ kutiyeketa hɛ niŋ awa ndɛ kɔita niŋ.

⁷Mpatiŋ beŋ, baŋ mɛkɛŋ ba wɔ yo wɔ bena thɔkina. Wɔ yo wɔ wo ni bɛyi bathumbɛ wɔ thumbɛ na wundɛ, nɔŋ na Kraist wɔ thumbɛ na.

⁸Wɔ yo wɔ wo key ka kɔtɔkɔy ka niya hakɛ ndɛ kiŋ ka Wayi Womandiŋ woŋ ka, baa Wayi Womandiŋ woŋ ni nde hakɛ there ka masɛsi maŋ. Saabu ba toŋineke Hati ka Masaala woŋ baŋ bɛna ba teetuwa wali ba ka Wayi Womandiŋ woŋ baŋ.

⁹Mɛnɛ wɔ niyɔy hati ka Masaala, ndɛ sa nda key ka kɔtɔkɔy ka niya hakɛ, baa maniyɔ ma ka Masaala maŋ gbeeŋ ma kiŋ iŋ wundɛ. Awa wundɛ sa nda punku kaa ka kɔtɔkɔy ka niya hakɛ, baa Masaala mpuu nda niŋ.

¹⁰Wɔ yo wɔ wo tha ni bɛyiniŋ bayɔhɔy, maa ndɛ tha thimo wɛndama na, wɔ bɛina hati ka Masaala kutɛ. Mahakande maŋ mɛna maŋ maŋ nagberekethe mateete ma ka mpati bi ka Masaala beŋ mɛnɛ bi ka Wayi Womandiŋ woŋ beŋ.

¹¹Huseri hu yuye nde beŋ haŋ there ka masɛsi maŋ huna ba miŋ thimiyande.

¹²Miŋ bɛiŋ niyɔ nɔŋ Keni. Wundɛ kiŋ nde ka Wɔ Nɛnɔy woŋ ka, awa wundɛ kore nde wɛndama na Ebɛli. Mbɛ hu kore ndɛ niŋ? Ndɛ kore nde niŋ baa bɛyiniŋ ba ni nde wundɛ baŋ bɛŋ anɛnɔ, awa ba ni nde Ebɛli baŋ bɛŋ ayɔhɔ.

¹³Mbɛndaŋ beŋ, baŋ niyɔ thɛrɛnaŋ mɛnɛ biya bi ka faido beŋ thambo bena.

¹⁴Miŋ kɔthɛŋ ba dɔma na miŋ pɛyɛŋ tuka haŋ, awa miŋ saa ka sii baŋ. Miŋ kɔthɛ huŋ, baa miŋ thimo mbɛnda ntuŋ beŋ. Wɔ yo wɔ wo ka iŋ mathimo, haaŋ hɛ wundɛ kiŋ ka pothi ka sɛmbɛ ba ka tuka haŋ baŋ.

¹⁵Wɔ yo wɔ wo thambo wɛndama na, bakɔri na wundɛ; awa beŋ kɔthɛŋ ba dɔma na bakɔri woŋ ka iŋ sii ba kɔy yo kɔy kaake kɛnama.

¹⁶Kraist see dunkuŋ sii nama baŋ ba mina toŋine na mathimo. Awa miŋ hɛlɛŋ nɛŋ yɔkɔŋ miŋ be dunkuŋ siini bakɛntuŋ baŋ ba mbɛnda ntuŋ beŋ.

¹⁷Mɛnɛ bananhulu kute wɛndama na wo pankɛ si kaande wu ka iŋ ntha, awa ndɛ tha niŋ mase, nama wundɛ toŋine ba dɔma na wundɛ athimo Masaala na?

¹⁸Mpatiŋ beŋ, miŋ bɛiŋ hɔkɔŋ thimo biya beŋ ka magbonkoy, kɛrɛ miŋ thimoyŋ bindɛ thimo hugbeeŋ haŋ hu tɔŋinɔkɔ haŋ ka mani.

¹⁹Thimo haŋ haŋ ni ba miŋ kɔthɔ ba dɔma na miŋ kiŋ biya bi ka nɔndi baŋ, awa miŋ sa nɔŋ payɔ ba kutiyɔkɔ Masaala na.

²⁰Awa mɛnɛ thathukuma thakɛntuŋ thaŋ thonkine mina, miŋ kɔthɛŋ ba dɔma na Masaala yameŋ bukuya ba thathukuma thakɛntuŋ thaŋ, awa ndɛ kɔthɛŋ bɛyi yo bɛyi.

²¹Mbɛndaŋ bi thimo yaŋ, mɛnɛ thathukuma thakɛntuŋ thaŋ tha mina thonkine, miŋ kiŋ iŋ kaha thukuma ka kɔtɔkɔy ka Masaala.

²²Miŋ kɔŋ kutu ntha yo ntha ki miŋ thɔnthɔŋɔŋ Masaala na, baa miŋ yɛrɔkɔy sirani nama baŋ, e miŋ kɔ niya bɛyiniŋ ba niŋ yehe.

²³Sirani nama baŋ bɛna baŋ baŋ: ba miŋ niya lanɛya ka Hati nama woŋ Yisɔs Kraist, e miŋ thimiyande, nɔŋ na tepe nde wundɛ mina na.

²⁴Wɔ yo wɔ wo putiyɔ sirani nama baŋ, ndɛ bɔhande iŋ Masaala, awa Masaala bɔhande iŋ wundɛ. Awa Yina wo dunkune mina Masaala woŋ ni ba miŋ kɔthɔ ba dɔma na miŋ bɔhande iŋ Masaala.