Read West-Central Limba 1 Yɔni 5 Bible Online

1 Yɔni 5 - West-Central Limba bible

1 Yɔni 5

¹Wɔ yo wɔ wo niyɛ lanɛya ba dɔma na Yisɔs na Banikisi wo ni nde Masaala lahiri woŋ, ndɛ na hati ka Masaala woŋ. Awa wɔ yo wɔ wo thimo komisa woŋ, wɔ na wundɛ wo thimo hɛlɛŋ hati woŋ.

²Miŋ kɔthɛŋ ba dɔma na miŋ athimo mpati bi ka Masaala beŋ maŋaye ka thimo Masaala na iŋ kaŋ putiyɔ sirani nama baŋ.

³Thimo ntuŋ Masaala na haŋ hu kiŋ ba putiyɔ sirani nama baŋ. Awa sirani nama baŋ kahuweta ba miŋ,

⁴baa wɔ yo wɔ wo hati ka Masaala ndɛ kɔŋ punku ka fay woŋ. Lanɛya bakɛntuŋ baŋ ni ba miŋ punka ka fay woŋ.

⁵Nkaana punku ka fay woŋ? Yɔkɔŋ wo niyɛ lanɛya woŋ ba dɔma na Yisɔs na Hati ka Masaala woŋ.

⁶Yisɔs Kraist see nde iŋ mandi ma biyo nde wundɛ maŋ, e ndɛ tɔŋa wasi e tuka. Awa ndɛ tha hɔkɔŋ see iŋ mandi mathɔ, kɛrɛ ndɛ see iŋ mandi mɛnɛ wasi. Awa Yina wo ka Masaala woŋ tepe ba wuŋ niyɔ wunɔndi, nɔŋ na ndɛ Yina woŋ wonɔndi na.

⁷Maseriŋ mataati mɛna maŋ maŋ:

⁸Yina woŋ, mandi maŋ, mɛnɛ wasi baŋ; awa fooma mutaati muŋ muŋ baŋ ni maseri ba bɛyi babanthe babɛina.

⁹Hali miŋ niyaŋ maseri ma ka wɔmɛti lanɛya. Kɛrɛ maseri ma ka Masaala maŋ mɛna yamɛ kahita ba ma ka wɔmɛti maŋ. Awa maseri maŋ maŋ mɛna dunkuŋ Masaala ba Hati nama woŋ.

¹⁰Wɔ yo wɔ wo niyɛ lanɛya ka Hati ka Masaala woŋ, ndɛ niyɔy iŋ maseri maŋ maŋ ka thukuma hukɛnama haŋ; kɛrɛ wɔ wo tha ni Masaala na lanɛya, ndɛ dome Masaala na ba wundɛ niyɔ bahothi, baa wundɛ tha ni lanɛya ka maseri ma tepe Masaala ba Hati nama woŋ maŋ.

¹¹Maseri maŋ mɛna ba dɔma na Masaala dunkune mina sii ba kɔy yo kɔy, awa sii baŋ baŋ bɛŋ ŋaye ka Hati nama woŋ.

¹²Wɔ yo wɔ wo iŋ Hati woŋ, ndɛ kiŋ iŋ sii; wɔ o wɔ wo ka iŋ Hati ka Masaala woŋ, ndɛ ka iŋ sii.

¹³Yama bena gbalati kuthagba koŋ koŋ baŋ haliko beŋ be kɔthɔ ba dɔma na beŋ kiŋ iŋ sii ba kɔy yo kɔy, bendo niyɛ lanɛya ka Hati ka Masaala woŋ.

¹⁴Miŋ kiŋ iŋ kaha thukuma ka kupɛnkintiyande ku ka Masaala koŋ, baa miŋ kɔthɛŋ ba wundɛ mina kɔ yuyɛ mɛnɛ miŋ thɔnthɔŋɔŋ niŋ ba bɛyi yo bɛyi ŋaye ka madɛɛnki nama maŋ.

¹⁵Miŋ kɔthɛŋ ba dɔma na ndɛ yuyeŋ mina naa miŋ thɔnthɔŋɔŋ ba bɛyi yo bɛyi. Wuna biyɛ nɛnɛ, miŋ kɔthɛŋ ba wundɛ mina kɔ dunkune mu miŋ niŋ thɔnthɔŋɔŋ muŋ.

¹⁶Mɛnɛ yi kute wɛnda na si ni hakɛ ba sa ni ba wundɛ tuka, niya kuraminɛ ba Masaala be niŋ dunkune sii. Haŋ haŋ hu kiŋ ba biya bi ni hakɛ ba sa ni ba bindɛ tuka baŋ, kɛrɛ hakɛ ba kiŋ ba ni ba wɔ tuka, awa yaŋ tha dɔŋ ba beŋ niya kuraminɛ ka Masaala ba bɛŋ.

¹⁷Bɛyi yo bɛyi basikɔy, hakɛ bɛna; kɛrɛ hakɛ ba kiŋ ba sa ni ba wɔmɛti tuka.

¹⁸Miŋ kɔthɛŋ ba dɔma na hati o hati wo ka Masaala ndɛ ka ba doŋe niya hakɛŋ, baa Hati ka Masaala woŋ kɔŋ paŋ wɔ bɛina wuthɛbinɛ thukuma, awa ndɛ sa niya muthoonɛ iŋ Wɔ Nɛnɔy woŋ.

¹⁹Miŋ kɔthɛŋ ba dɔma na miŋ kiŋ biya bi ka Masaala, hali na niyɔy wuŋ na ka faido fooma ka kiŋ ka yɔnkɔ hu ka Wɔ Nɛnɔy woŋ haŋ.

²⁰Miŋ kɔthɛŋ ba dɔma na Hati ka Masaala woŋ see nde ba mina si dunkune kele hu ni ba miŋ kɔthɔ Masaala wogbeeŋ woŋ. Miŋ bɔhande iŋ Masaala wogbeeŋ woŋ, wuna ba bɔhande iŋ Hati nama woŋ Yisɔs Kraist. Ndɛ na Masaala wogbeeŋ woŋ, awa wuŋ baŋ wuna sii ba kɔy yo kɔy baŋ.

²¹Mpatiŋ beŋ, baŋ ni dekɛŋ kubatho hali.