Read West-Central Limba Matɔŋinɔkɔ mȧŋ 10 Bible Online

Matɔŋinɔkɔ mȧŋ 10 - West-Central Limba bible

Matɔŋinɔkɔ mȧŋ 10

¹Kɛna kute yaŋ maleka wohɛna womandiŋ si thuhu ka pothi kafay woŋ ŋaye ka ariana. Maleka wobɛina wo gbekito wuruma e hiyo harama niŋ pɛnkande ka yaha; yethi nama haŋ niyɔ nɔŋ kaŋ woŋ, awa ŋathaki nama ŋaŋ ŋabukuyuwɛ nɔŋ ŋathulu ŋa ka buu.

²Wundɛ boheŋ nde kuthagba kuyete ku iŋ magbali ku pɛmpiŋinɔy ka yɔnkɔ. Wundɛ thiye nde kuthaki nama kuthome koŋ ka mankɔ mamɛɛti ka e kupɔkɔdɔ koŋ niyɔ ka thithɛ ka.

³Awa kɛna thiyi ndɛ iŋ thampa tha ŋatɛ ka thinthi tha nɔŋ ka yaadi kunkuru. Naa thiyi wundɛ, nthankɛŋ kisɔŋ-kiye kiŋ kina mɛyɛ kaŋ kunkura.

⁴Naa thanki nthɔŋ kiŋ gbonkiya nafeu, yaŋ bathɔy ba gbala. Kɛrɛ yaŋ yuye thampa tha be fuŋ ka ariana tha tɛpɛ ba dɔma, na “Kɔsina ka gbundu ba thanki nthankɛŋ kisɔŋ-kiye kiŋ gbonkiya baŋ; ba bɛŋ gbali!”

⁵Awa maleka wo kute yaŋ kooye ka mankɔ maŋ woŋ mɛnɛ ka thithɛ ka yentheŋeŋ yɔnkɔ nama huthome haŋ ka ariana

⁶e wundɛ gbiŋa ka keŋ ku ka Masaala wo kɔy yo kɔy woŋ, wo yehinuwɛ ka ariana woŋ, kafay woŋ, mankɔiŋ maŋ, mɛnɛ ntha yo ntha ki ka muŋ. Maleka woŋ dome, na “Wuŋ sa nda nambi!

⁷Kɛrɛ ti nthɔŋ maleka wosɔŋ-biye woŋ hɔŋ kuthuthu nama koŋ, tɛna Masaala ni bɛyiniŋ ba ka madɛɛnki nama magbundu maŋ, nɔŋ na tepe nde wundɛ na ka bawaliŋ nama beŋ, bi banabiŋ beŋ.”

⁸Awa thampa tha yuye yaŋ tha si gbonkoy thaŋ ŋaye ka ariana gbonkitiyande yama hɛlɛŋ e thɛŋ yama tepe, na “Kaa e yi ka bɔha kuthagba ku iŋ magbali ku pɛmpiŋinɔy koŋ ka yɔnkɔ hu ka maleka wo kɔɔyɛ ka mankɔ maŋ woŋ iŋ ka thithɛ ka.”

⁹Huna kaaye yaŋ ka maleka woŋ e yaŋ niŋ ka thɔnthiŋina ba ndɛ yama dunkune kuthagba kuyete koŋ. Kɛna dome ndɛ yama, na “Sɛkitha kuŋ e yi kuŋ thɔma; ku kɔŋ thimɔ ka hothi nda haŋ nɔŋ tɔŋɔ, kɛrɛ ku kɔŋ niyɔ nagbayiŋ ka kotho nda haŋ.”

¹⁰Yaŋ bohe kuthagba kuyete koŋ ka yɔnkɔ nama haŋ e yaŋ kuŋ thɔma, awa kuŋ niyɔy kuthimɔy ka hothi niŋ nɔŋ tɔŋɔ. Kɛrɛ naa ŋune nthɔŋ yaŋ kuŋ, kuŋ niyɔy nagbayiŋ ka kotho niŋ haŋ.

¹¹Kɛna domo yaŋ, na “Yɔkɔŋ yi be ni hunabi hɛlɛŋ ba biya bi ka siyani babɔyɛ, ŋakuyɛkɛŋ ŋabɔyɛ, mɛnɛ thayuni thabɔyɛ, mɛnɛ ba gbakuiŋ namɛŋ beŋ.”