Read West-Central Limba Matɔŋinɔkɔ mȧŋ 12 Bible Online

Matɔŋinɔkɔ mȧŋ 12 - West-Central Limba bible

Matɔŋinɔkɔ mȧŋ 12

¹Kɛna tɔŋinɔkɔy bɛyi bathakaba ka kuthahinɛ koŋ. Wɔ yɛrɛmɛ na kute yaŋ wo muthɔɔ mukɛnama muna kaŋ woŋ, e sɛnkɛ woŋ niyɔ ka ŋathaki nama ŋaŋ ka pothi, awa e wundɛ tutɔkɔ nɛmu wo iŋ sosɛŋ kɔhi iŋ biye.

²Wɔ yɛrɛmɛ woŋ baŋ wo thuriye ba mpaa na, awa wuthoonɛ iŋ nambara ba ka mpaa haŋ baŋ ni ba ndɛ berina wuthoonɛ-thoonɛ.

³Kɛna kute yaŋ bɛy bathakaba bahɛna tɔŋinɔkɔ ka kuthahinɛ koŋ. Yaarɔ womandiŋ-mandiŋ wopothɛ na kute yaŋ wo iŋ thankaha thasɔŋ-thaye, ŋaasɛ kɔhi, mɛnɛ nɛmu wunthe ka yaha yo yaha ka thankaha thasɔŋ-thaye thaŋ.

⁴Kindɛŋ nama haŋ huna yose wundɛ kufɛŋ kutaati ku ka sosɛŋ beŋ koŋ ŋaye ka kuthahinɛ koŋ e ndɛ bindɛ yɛla ka pothi kafay woŋ. Wundɛ key kooye woyɛrɛmɛ woŋ ka kɔtɔkɔy haliko ba thɔma hati nama woŋ naa wundɛ mpuu niŋ.

⁵Woyɛrɛmɛ woŋ mpuu hati wathe, wo si kɛriŋiyɛ siyani baŋ fooma iŋ kugbɔkɔdi kuhuyɛ. Kɛrɛ hati woŋ kano e kato ka Masaala ka mɛnɛ ka yensi nama haŋ.

⁶Woyɛrɛmɛ woŋ kiti ka wula ka, e ka niyɔ ka tha ka thanki Masaala niŋ kɔsiniyɔkɔ kɛ. Kɛnkɛ baŋ kɛna ndɛ dethitoko ba hura wulu wunthe e kɛmɛ kaye iŋ kɔnthɔ kasɔŋ-hanthe.

⁷Kɛna ŋɔti kuyombo ka ariana. Maikɛli iŋ malekɛŋ nama beŋ bina dekeyi ma sɔkinɔkɔ yaarɔ woŋ; awa yaarɔ woŋ iŋ malekɛŋ nama beŋ dekiye nɛnɛ bindɛ.

⁸Kɛrɛ yaarɔ woŋ iŋ malekɛŋ nama beŋ punko awa bindɛ tha nda niyɔ iŋ yikiya ka ariana hali.

⁹Kɛna yelo yaarɔ womandiŋ-mandiŋ woŋ ka pothi ka fai woŋ ka. Wundɛ na wokɛkɛŋ wotiyɔ-tiyɔ wo dɔma Sithani woŋ, Wayi Womandiŋ woŋ, ba thɔkɔŋ biya bi kafay wobunthu woŋ beŋ fooma. Wundɛ yelo ka nanthe iŋ malekɛŋ nama beŋ fooma ka pothi kafay woŋ ka.

¹⁰Awa kɛna yuye yaŋ thampa thatɔɔkɛ ka ariana tha tɛpɛ ba dɔma, na “Ka tete, kisi baŋ see ŋaye ka Masaala! Ka tete, Masaala tɔŋɔŋ sɛmbɛ nama baŋ nɔŋ gbaku! Ka tete, Banikisi wo ni nde wundɛ lahiri woŋ tɔŋɔŋ mayoho nama maŋ, baa wo bare kɔɔ ka kɔtɔkɔy ka Masaala ka woŋ ba fuŋutiyɛ mbɛnda ntuŋ beŋ yelo ka pothi kafay woŋ ka; wundɛ wobɛina na bare bindɛ fuŋutiyɛ ka Masaala gbɛɛŋ iŋ piri-piri.

¹¹Kɛrɛ mbɛnda ntuŋ beŋ punke niŋ maŋaye ka wasi ba ka Taka Wohatiyɛ woŋ baŋ, mɛnɛ maŋaye ka niya namɛŋ maseri haŋ ba Masaala, awa bindɛ yɛrɔkɔy ba dunkuna siini namɛŋ baŋ kaŋ tuka.

¹²Bɛna, mayehitɔkɔ ma niyɔyŋ ka ariana! Bendo biya bi kɛndɛ beŋ fooma yehitɔkɔŋ. Kɛrɛ nkinikiniŋ ki kɔŋ niyɔ kafay woŋ mɛnɛ ka mankɔ mamɛɛti maŋ. Wayi Womandiŋ woŋ thuhe kendeŋ ka iŋ mathoŋ mamandiŋ, baa wundɛ kɔthɛ ba dɔma na malɔkɔ makɛnama maŋ athurɔ nda!”

¹³Naa kute yaarɔ woŋ ba ndɛ yelo ka pothi kafay woŋ, ndɛ bohe yenkande woyɛrɛmɛ wo mpɛɛ hati wathe woŋ.

¹⁴Kɛrɛ woyɛrɛmɛ woŋ dunkuno ŋapɛli ŋaye nɔŋ ŋa ka gbuŋɔ womandiŋ-mandiŋ haliko wundɛ be keŋ e kita wokɛkɛŋ woŋ ba kaa ka wula ka. Wundɛ key niyɔ ka tha ka ndɛ ka dethitoko ba thaninɛŋ thataati iŋ ka teete.

¹⁵Kɛna paye wokɛkɛŋ woŋ woyɛrɛmɛ woŋ mandi ma fuŋuŋ ndɛ ka hothi nama haŋ maŋ nɔŋ mankɔ.

¹⁶Kɛrɛ kuyɛkɛŋ koŋ mase woyɛrɛmɛ woŋ; kuŋ ŋakaŋ hothi nama haŋ e kuŋ ŋuna mandi maŋ ma fuŋɛ ka hothi hu ka yaarɔ woŋ haŋ.

¹⁷Awa yaarɔ woŋ thooye woyɛrɛmɛ woŋ ka mathoŋ, e wundɛ kaa kaŋ tɔŋa kuyombo ka mpati bipɛyɛ bi ka woyɛrɛmɛ woŋ beŋ, ka bi putiyɔy yamariŋ ba ka Masaala baŋ beŋ, e bindɛ niya maseri ba Yisɔs.

¹⁸Awa kɛna key yaarɔ woŋ kɔɔ ka thɛkɛyaŋ hu ka mankɔ mamɛɛti maŋ haŋ.