Read West-Central Limba Matɔŋinɔkɔ mȧŋ 13 Bible Online

Matɔŋinɔkɔ mȧŋ 13 - West-Central Limba bible

Matɔŋinɔkɔ mȧŋ 13

¹Awa kɛna kute yaŋ maama wobaŋɔy si fuŋ ka mankɔ mamɛɛti maŋ wo iŋ ŋaasɛ kɔhi mɛnɛ thankaha thasɔŋ-thaye. Awa kɔɔsɛ o kɔɔsɛ nama ku kiŋ iŋ nɛmu, awa yaha yo yaha nama keŋ ku kiŋ kɛndɛ ku yakɛ Masaala na.

²Awa maama wo kute yaŋ woŋ athɔyande iŋ wohuyɛ. Awa ŋathaki nama ŋaŋ nɔŋ maama wo ka hee wo thɔyande iŋ yaŋa woŋ. Hothi nama haŋ nde niyɔ nɔŋ hothi hu ka yaadi. Awa kɛnama kɛna dunkuŋ nde yaarɔ woŋ sɛmbɛ nama baŋ, yensi nama haŋ, mɛnɛ mayoho nama maŋ.

³Yaha hunthe hu ka maama woŋ baŋ haŋ niyɔ nɔŋ hu yɔminɔy ma koro, kɛrɛ mathimɔ mabɛina pethɔy, awa biya bi kafay woŋ beŋ fooma yeme maama woŋ baŋ kaŋ niya ŋakabanɛ.

⁴Biyamɛti beŋ ni yaarɔ woŋ kubatho, baa ndɛ dunkuŋ mayoho nama maŋ ka maama woŋ, awa bindɛ ni maama woŋ baŋ kubatho e bindɛ dɔma, na “Nkaana iŋ sɛmbɛ nɔŋ maama woŋ baŋ, awa nkaana niŋ punku dekiya?”

⁵Kɛna dunkuno maama woŋ baŋ hɛɛra ba gbonkiya thampɛŋ tha ka bukuinɔkɔ tha yakɛ Masaala na. Awa ndɛ mekino ba niya mayoho nama maŋ ba sɛnkɛni kɔnthɔ kanaŋ iŋ biye.

⁶Kɛna sɛsi ndɛ ba yaka Masaala na, keŋ nama koŋ, mɛnɛ ka doŋe Masaala kɛ, mɛnɛ bi dɔŋɔy ka ariana beŋ.

⁷Wundɛ mekino nde hɛlɛŋ ba tɔŋa kuyombo ka biya bi ka Masaala beŋ mɛnɛ ba bindɛ punka. Awa wundɛ dunkuno nde hɛlɛŋ mayoho ka thinthi ka biya bi ka bɔnsɔni fooma, bi ka siyani fooma, bi ka thayuni fooma, mɛnɛ bi ka ŋakuyɛkɛŋ fooma.

⁸Awa biya bi kafay woŋ beŋ fooma bi kɔŋ ni maama woŋ baŋ kubatho, yɔkɔŋ bi ŋakeŋ namɛŋ ŋa gbalo saanuŋ kafay woŋ ba yehinuwo ka buku wo ka bi iŋ sii baŋ beŋ wo biiyo iŋ Taka Wohatiyɛ wo kɔrɔy woŋ, bindɛ bina sa niŋ ni kubatho.

⁹“Yindo iŋ ŋaiha ba yuyɛ, pona kuiha!

¹⁰Wɔ yo wɔ wo thankɛ domo ba dɔma na ndɛ kɔŋ bɔha ka kuyombo, yaathi wundɛ kɔŋ bɔha ka kuŋ; wɔ yo wɔ wo thankɛ domo ba dɔma na ndɛ kɔŋ kɔra ka silanhi, yaathi wundɛ kɔŋ kɔra ka bɛŋ. Muyuŋ iŋ ba niya Masaala na lanɛya muna ni ba biya bi ka Masaala beŋ thunkuteke ba niyo muŋ muŋ baŋ.”

¹¹Kɛna kute yaŋ maama wobaŋɔy wohɛna si fuŋ ka kuyɛkɛŋ koŋ. Wundɛ kiŋ nde iŋ ŋaasɛ ŋaye nɔŋ ŋa ka taka awa e wundɛ kɔ gbonkiya nɔŋ yaarɔ.

¹²Wundɛ niye nde wali mayoho ma ka maama wobaŋɔy womayoŋ woŋ yɔkɔŋ ba kɛnama. Wundɛ pithite nde kafay woŋ mɛnɛ bi kɛndɛ beŋ fooma ba niya maama womayoŋ woŋ kubatho, wo mathimɔ nama ma nde nɔŋ niŋ kɔri maŋ, kɛrɛ mɛŋ pethɔ.

¹³Maama wobiye woŋ baŋ ni bɛyiniŋ bathakaba babɔyɛ; wundɛ ni ba buu ŋɔta kafay woŋ ŋaye ka ariana ka thaaya tha ka wɔ yo wɔ.

¹⁴Awa maama woŋ baŋ thɔkɔŋ biya bi kafay woŋ beŋ fooma maŋaye ka niya bɛyiniŋ bathakaba ba mekino nde wundɛ ba niya baŋ ka thaaya tha ka maama womayoŋ woŋ. Maama wobiye woŋ baŋ tepe bindɛ ba bindɛ yehinuwa deka wo bindɛ niye yiki maama wobaŋɔy wo yomino nde iŋ silanhi baŋ kɛrɛ wundɛ tha tuku.

¹⁵Maama wobiye woŋ mekino nde ba hɛma sii ka deka wo ka maama womayoŋ woŋ, wuna deka woŋ gbonkoy e ndɛ kɔɔruwa fooma bi baŋinɛ ba niŋ niya kubatho beŋ.

¹⁶Awa maama wobiye woŋ pithite biya beŋ fooma, biya bi be dunkuno yiki beŋ mɛnɛ bi dunkuno yiki beŋ, dinhaŋiŋ mɛnɛ bamɔnɛŋ, mbaayiŋ mɛnɛ kɔɔrɔiŋ, ba niyɔ iŋ thɛnkɛy ka thɛnkɔ namɛŋ thathome thaŋ maa ka thayethi namɛŋ thaŋ ka thinthi ka bunihiŋ buŋ.

¹⁷Wɔ yo ka wo boy maa ba niya gbɔŋ yɔkɔŋ ndɛ niyɔy iŋ thɛnkɛy woŋ baŋ. Wuŋ thɔyande ba dɔma, keŋ ku ka maama woŋ koŋ maa makɔndi ma kɔɔyɛ ba keŋ koŋ maŋ.

¹⁸Wuŋ baŋ thɔnthɔŋɔŋ ba wɔ kele. Wɔ yo wɔ wo kele ndɛ kɔŋ punku ba mɛthina makɔndi ma ka maama wobaŋɔy woŋ maŋ, baa makɔndi maŋ maŋ, makɔndi ma ka wɔmɛti mɛna. Makɔndi nama maŋ mɛna kɛmɛ kasɔŋ-hanthe e kɔnthɔ kasɔŋ-hanthe iŋ kasɔŋ-hanthe (666).