Read West-Central Limba Matɔŋinɔkɔ mȧŋ 17 Bible Online

Matɔŋinɔkɔ mȧŋ 17 - West-Central Limba bible

Matɔŋinɔkɔ mȧŋ 17

¹Kɛna see maleka wunthe kiyaŋ ŋaye ka malekɛŋ bisɔŋ-biye bi nde iŋ thasomba thasɔŋ-thaye thaŋ e ndɛ dɔma, na “Saa, yaŋ kɔŋ yina toŋine na yɛrɛmɛ wo taititoko namo nama woŋ si gbasiŋito na; wundɛ na mɛti bamandiŋ ba thoyo ka mankɔiŋ mabɔyɛ maŋ.

²Gbakuiŋ bi kafay woŋ beŋ ni nde ŋabɛini ŋahakuwande iŋ wundɛ, awa biya bi kafay woŋ beŋ yilɔy nde ŋaye ka thiiye mampa ma ka ŋabɛini nama ŋaŋ maŋ.”

³Yina wo ka Masaala woŋ bohe yama, awa e maleka woŋ yama kata ka wula ka. Kɛna key yaŋ kute wɔ yɛrɛmɛ doŋe ka thinthi ka maama wobaŋɔy wopothɛ wo ŋakeŋ ŋa yakɛ Masaala na ŋa gbaluwo ka kɔtɔ nama koŋ fooma; awa maama woŋ kiŋ nde iŋ thankaha thasɔŋ-thaye mɛnɛ ŋaasɛ kɔhi.

⁴Wɔ yɛrɛmɛ woŋ baŋ wogbɛkitɔkɔy na nde wundɛ wuyɔhɔy iŋ muthɔɔ mu niyɛ maŋ potha, awa e wundɛ pututiyo iŋ munki mu yehinuwo ŋaye ka boy, tharaka thakahɛ mɔlɔŋ thahakuwande. Wundɛ boheŋ nde kɔɔpu huboy hu thiŋo munki munɛnɔy-nɛnɔy mu ŋaye ka ŋabɛi nama ŋaŋ.

⁵Ka yethi nama haŋ ka thinthi ka bunihiŋ buŋ, keŋ gbalo kɛndɛ ku iŋ thalintando hugbundu. Gbundu babɛina bɛna: “Mɛti ba ka Babilɔŋ bamandiŋ, nanda ka yɛrɛmɛŋ bi taititoko namo nama beŋ fooma, mɛnɛ nanda ka biya bi ni ŋabɛini ŋahakuwande ŋanɛnɔy-nɛnɔy beŋ fooma kafay woŋ.”

⁶Awa yaŋ kute ba dɔma na woyɛrɛmɛ woŋ woyilɔy na nde iŋ wasi ba ka biya bi ka Masaala beŋ baŋ mɛnɛ wasi ba ka bi koro nde beŋ saathɛ ba na dunkunɔkɔy nde bindɛ ka Yisɔs. Naa kute yaŋ hati woyɛrɛmɛ woŋ, yaŋ ni thakaba wumandiŋ-mandiŋ.

⁷Huna thonthiŋine yama maleka woŋ ba dɔma, na “Mbɛ hu yi niye thakaba? Yaŋ kɔŋ yina tepe gbundu wo ka wɔ yɛrɛmɛ woŋ baŋ mɛnɛ wo ka maama wobaŋɔy wo iŋ thankaha thasɔŋ-thaye thaŋ mɛnɛ ŋaasɛ kɔhi ŋaŋ.

⁸Maama woŋ baŋ wopethɔy na nde, kɛrɛ wundɛ ka iŋ hɛma ka tete; wundɛ kiŋ ba fuŋa ŋaye ka tha kuyɛkɛŋ koŋ mankande kɛ, awa wundɛ kɔŋ key ba ka teetuwo. Biya bi kafay woŋ beŋ bi ŋakeŋ namɛŋ ŋa be gbalɔ ŋaŋ saanuŋ kafay woŋ ba yehinuwo ka buku wo ka bi kutɛ sii baŋ beŋ, bi kɔŋ ni thakaba wumandiŋ naa bindɛ dethi maama wobaŋɔy woŋ. Wopethɔy na nde wundɛ; ka tete wundɛ ka iŋ nda iŋ sii, kɛrɛ ndɛ kɔŋ duu ka saa.

⁹“Wuŋ baŋ thɔnthɔŋɔŋ kele iŋ makɔthɔ. Thankaha thasɔŋ-thaye thaŋ kooye ba ŋasɛri ŋasɔŋ-ŋaye ŋaŋ, ŋasɛri ŋa ka doŋe wo yɛrɛmɛ woŋ kɛ ŋaŋ. Thɛŋ kooye hɛlɛŋ ba gbakuiŋ bisɔŋ-biye beŋ.

¹⁰Bisɔhi ka bindɛ ka nda gbakuiŋ, kɛrɛ haaŋ hɛ wunthe kɔŋ kɛrɛŋ, awa wo wuntheŋ woŋ seeta hɛ ka kɛriŋa; naa wundɛ see, yɔkɔŋ wundɛ be si niyɔ ba malɔkɔ mathurɔy.

¹¹Awa maama wobaŋɔy wo nde wopethɔy woŋ, kɛrɛ wundɛ ka nda, wundɛ na tɛŋinɛ gbaku wosɔŋ-bitaati wo ka kiki ba ka gbakuiŋ bisɔŋ-biye bimayoŋ beŋ baŋ, awa wundɛ kɔɔyɛ nda ba teetuwo.

¹²“Awa ŋaasɛ kɔhi ŋaŋ kooye ba gbakuiŋ kɔhi bi be hɛ kutu sɛmbɛ beŋ, kɛrɛ bi kɔŋ dunkuno mayoho ba kɛriŋa nɔŋ gbakuiŋ ba wakathi wunthe ka nanthe iŋ maama wobaŋɔy woŋ.

¹³Gbakuiŋ bikɔhi beŋ beŋ bi kiŋ iŋ masiyi manthe awa bi kɔŋ dunkuŋ sɛmbɛ namɛŋ baŋ mɛnɛ mayoho namɛŋ maŋ ka maama wobaŋɔy woŋ.

¹⁴Bi kɔŋ dekeyi ma sɔkinɔkɔ Taka Wohatiyɛ woŋ; kɛrɛ Taka Wohatiyɛ woŋ, ka nanthe iŋ bi thanki ndɛ thiya kaŋ yɛtha beŋ bi kaayɛ ka kɔtɔkɔy ka niya niŋ lanɛya haŋ beŋ, wundɛ kɔŋ bindɛ punku, baa wundɛ na Mariki ka thinthi ka marikiŋ fooma, mɛnɛ Gbaku ka thinthi ka gbakuiŋ fooma.”

¹⁵Maleka woŋ dome hɛlɛŋ yama, na “Mandiŋ ma kute yi maŋ ka doŋe wɔ yɛrɛmɛ wo taititoko namo nama woŋ mɛŋ kooye ba biya bi ka siyani bahakuwande, bi ka kikiŋ babɔyɛ-bɔyɛ, bi ka ŋakuyɛkɛŋ ŋahakuwande, mɛnɛ bi ka thayuni thahakuwande.

¹⁶Ŋaasɛ kɔhi ŋa kute yi ŋaŋ mɛnɛ maama wobaŋɔy woŋ, mu kɔŋ thambo wɔ yɛrɛmɛ wo taititoko namo nama woŋ; bi kɔŋ niŋ kanati ntha yo ntha kiŋ iŋ wundɛ e bindɛ niŋ kiya bunthu: bi kɔŋ thɔŋ kɔtɔ nama koŋ e bindɛ niŋ tɔɔnuwa iŋ buu.

¹⁷Ba Masaala thiye wuŋ ka thathukuma namɛŋ thaŋ ba kata madɛɛnki nama maŋ ka kɔtɔkɔy, ba wuŋ niya iŋ masiyi manthe e dunkune maama wobaŋɔy woŋ sɛmbɛ ba kɛriŋa, haaŋ yɔkɔŋ thampɛŋ tha ka Masaala thaŋ thiŋe.

¹⁸“Wɔ yɛrɛmɛ wo kute yi woŋ wundɛ kooye ba mɛti bamandiŋ ba kɛriŋiyɛ gbakuiŋ bi kafay woŋ beŋ.”