Read West-Central Limba Matɔŋinɔkɔ mȧŋ 18 Bible Online

Matɔŋinɔkɔ mȧŋ 18 - West-Central Limba bible

Matɔŋinɔkɔ mȧŋ 18

¹Naa daŋande wuŋ kɛndɛ, yaŋ kute maleka wohɛna si see ŋaye ka ariana. Wundɛ kiŋ nde iŋ mayoho mamandiŋ, awa waŋ nama bamaleke baŋ kuntheke kafay woŋ fooma.

²Kɛna gbonkoy ndɛ iŋ thampa tha ŋatɛ ka thinthi e dɔma, na “Wɔ yɛrɛmɛ woŋ ŋɔti! Ka Babilɔŋ ka mandiŋ ŋɔti! Mbayiŋ bi ka Sithani beŋ bina nda ni yikiya kɛnama; bɛtiŋ binɛnɔy fooma bi thambiyo bina nda ni yikiya kɛnama.

³Biya bi ka siyani baŋ fooma thanki thiiye mampa nama maŋ, mampa nama makahɛ-kahɛ ma ni ba wɔ niyɔ kufiyo ba niya ŋabɛy ŋaŋ. Gbakuiŋ bi kafay woŋ beŋ fooma thanki niya ŋabɛini ŋahakuwande iŋ wɔ yɛrɛmɛ woŋ baŋ, awa bi kɔɔyɛ ba deethuwa nanhulu kafay woŋ beŋ kute nde nanhulu ŋaye ka kufiyo nama ku sa thanki koŋ.”

⁴Kɛna yuye yaŋ thampa thahɛna ŋaye ka ariana tha tɛpɛ ba dɔma, na “Fuŋaŋ kɛnama, bendo biyaŋ beŋ! Fuŋaŋ kɛnama, wuna sa beŋ niyɔ iŋ kufɛŋ ka hakɛ nama baŋ, wuna sa beŋ niyɔ iŋ kufɛŋ ka kasarɛŋ ba nɔŋ niŋ pɛnki baŋ.

⁵Ba hakɛŋ bakɛnama baŋ kɔmande nda nagbiroŋ e bɛŋ ŋata ka thinthi nɔŋ ka ariana, awa Masaala siyi gboŋɛŋ nama banɛnɔy baŋ.

⁶Diŋeŋ niŋ nɔŋ na diŋe wundɛ bena na; tɛnkiniyaŋ niŋ kaye-kaye ba ba thanki wundɛ niya baŋ. Thiŋinaŋ kɔɔpu nama haŋ mampa makahɛ-kahɛ kaye-kaye e wuŋ yama mampa ma tikitiniyande nde wundɛ bena maŋ.

⁷Dunkuneŋ niŋ nambara bamandiŋ mɛnɛ nkinikiniŋ nɔŋ na yiki bamandiŋ mɛnɛ nanhulu bamandiŋ ba nkɔɔkɔy ndɛ baŋ. Ba ndɛ dɔmɔkɔy ka yɛthɛ nama; na ‘Yaŋ doŋeŋ dondo baŋ nɔŋ gbaku woyɛrɛmɛ! Yaŋ ka bagbokora, Yaŋ ka iŋ nkinikiniŋ!’

⁸Saathɛ ba wuŋ baŋ, ndɛ kɔŋ pɛnka kasara lɔkɔ banthe, nhuruiŋ, nkinikiniŋ, mɛnɛ kɔnthɔ. Awa ndɛ kɔŋ tɔɔnuwa iŋ buu, baa Mariki woŋ Masaala wo niŋ kɔnsɔŋɔŋ woŋ, wundɛ abukuyi.”

⁹Gbakuiŋ bi kafay woŋ bi sɛkithɛ kufɛŋ ka ŋabɛini nama ŋaŋ mɛnɛ ŋafiyoiŋ nama ŋaŋ, bi kɔŋ nɔŋ bereŋ e bindɛ bokita mɛti bamandiŋ baŋ naa bindɛ kute hiti hu fuŋ ka ŋalampitha ŋa niŋ tɔɔni ŋaŋ.

¹⁰Bindɛ kɔɔyɛ wuthokiye, baa bindɛ payɔy ba kuta kufɛŋ ka nambara nama baŋ. Bindɛ tepe ba dɔma, na “Nkinikiniŋ! Nkinikiniŋ kimandiŋ ka mɛti bamandiŋ ba ka Babilɔŋ baŋ! Ka wakathi wunthe woŋ baŋ seeye na kugbasaŋati kukɛnda koŋ.”

¹¹Bi kɔɔyɛ ba deethuwa nanhulu baŋ kafay woŋ beŋ bereŋ hɛlɛŋ e bindɛ dɔŋɔ hugbokora ba wundɛ, baa wɔ sa nda bindɛ boyte munki namɛŋ muŋ.

¹²Wɔ sa nda bindɛ boyte boy namɛŋ buŋ, siliba, tharaka thakahɛ mɔlɔŋ thahakuwande; thikɛŋ namɛŋ bahuhɛ, thikɛŋ ba niyɛ maŋ pothita, thikɛŋ badelimɔy, maa thikɛŋ bapothɛ; ŋayeŋ ŋa thimɔy huru ŋa kahɛ mɔlɔŋ, mɛnɛ munki fooma mu yehinuwo ŋaye ka thathithi tha ka kampɛŋ beŋ thaŋ maa ka ŋayeŋ ŋa kahɛ mɔlɔŋ, ka birasi, ka thawɛ, mɛnɛ ka tharaka tha kahɛ mɔlɔŋ,

¹³munki mu fuŋ huru thimɔy mu dɔma muŋ na sinamɔŋ, sepe, gbomgbo, mari, mɛnɛ fankinsɛnsi, mampa, mɛnɛ mayɔ, kutoŋ mɛnɛ paka, ndansiŋ mɛnɛ takɛŋ, sooni mɛnɛ muthare, mbaayiŋ, mɛnɛ siini bagbeeŋ ba ka biyamɛti baŋ.

¹⁴Biya bi kɔɔyɛ ba deethuwa nanhulu beŋ dome kɛnama, na “Munki muyɔhɔy mu yi kufiyo muŋ fooma thanki piriŋa, awa hudinhaŋiya nda haŋ mɛnɛ maleke nda haŋ thanki natharaŋ awa yi sa nɔŋ nda muŋ kutu!”

¹⁵Biya bi deethi nanhulu beŋ, bindɛ niyɔy bananhuluiŋ ŋaye ka deethuwa nanhulu ka mɛti bamandiŋ babɛina, bi kɔŋ kɔɔ wuthokiye baa bindɛ payɔy ba kuta kufɛŋ ka nambara ba ka wɔ yɛrɛmɛ woŋ baŋ. Bi kɔŋ bereŋ e bindɛ dɔŋɔ hugbokora,

¹⁶e bindɛ dɔma, na “Nkinikiniŋ! Nkinikiniŋ kimandiŋ ki kɔŋ niyɔ ka mɛti bamandiŋ baŋ! Wɔ yɛrɛmɛ woŋ baŋ bareŋ nde kɔ gbɛkitɔkɔ iŋ mupithi muhuhɛ, mu niyɛ maŋ pothita, mɛnɛ mupothɛ, e ndɛ mankitɔkɔ boy bu kahɛ mɔlɔŋ, mɛnɛ tharaka tha kahɛ mɔlɔŋ thahakuwande!

¹⁷Ka wakathi wunthe napethi wundɛ thanko nanhulu nama baŋ!” Kɛbiniŋ bi katitɔkɔ gbeni babukuyuwɛ baŋ beŋ fooma mɛnɛ biya bi bindɛ kati beŋ, bi ni wali ka gbeni baŋ beŋ mɛnɛ nda biya bihɛna fooma bi kute muthɔma namɛŋ ŋaye ka niya wali ka mankɔ mamɛɛti maŋ, kɔɔyɛ nde wuthokiye,

¹⁸e bindɛ berina naa kute bindɛ hiti hu fuŋ ŋaye ka ŋalampitha ŋa tɔɔni wɔ yɛrɛmɛ woŋ ŋaŋ. Bindɛ tepe ba dɔma, na “Mɛti yo ka hɛ nɛŋ bamandiŋ nɔŋ mɛti bamandiŋ baŋ baŋ!”

¹⁹Bindɛ koŋeke kuligbi ka thankaha namɛŋ thaŋ ba tɔŋina ba wuŋ bindɛ niyɔ gbɛki. Bindɛ bereŋ, bindɛ dɔŋɔy hugbokora e bindɛ dɔma, na “Nkinikiniŋ! Nkinikiniŋ kimandiŋ ka mɛti bamandiŋ baŋ! Wɔ yɛrɛmɛ woŋ na mɛti bamandiŋ ba ka biya bi iŋ gbeni babukuyuwɛ baŋ beŋ bi kaandiyande ka mankɔ mamɛɛti maŋ e bindɛ niyɔ bananhuluiŋ ŋaye ka nanhulu nama baŋ! Ka wakathi wunthe napethi, ntha yo ntha thanki!”

²⁰Huna, ariana, yehitɔkɔ saathɛ ba teetuwɔ nama haŋ! Yehitɔkɔŋ bendo biya bi ka Masaala beŋ, bendo baseriŋ bithɔɔkɔ beŋ, mɛnɛ banabiŋ beŋ, baa Masaala thonkine wɔ yɛrɛmɛ woŋ ba ba thanki wundɛ bena niya baŋ!

²¹Kɛna sekithe maleka wunthe wo basɛmbɛ raka hu ti raka hugbokile hubukuyɛ nɔŋ haŋ e huŋ yɛla ka mankɔ mamɛɛti masuŋɔy maŋ e ndɛ dɔma, na “Nanaŋ baŋ nɛna nɔŋ mɛti bamandiŋ ba ka Babilɔŋ baŋ yɛla ka sɛmbɛ, awa bɛŋ sa nɔŋ nda kuta hali.

²²Bayakaliŋ bi iŋ ŋatuteŋ mɛnɛ basɔnkiŋ, bahɔni thooriyɛŋ, mɛnɛ bahɔni ŋathuthu, yi sa nɔŋ nda bindɛ yuuta hali! Yi sa nɔŋ nda kututa basani bi ni ŋasani namɛŋ ŋahakuwande beŋ! Thadinthi tha ka yɔŋa sa nɔŋ nda yuya!

²³Yi sa nɔŋ nda kututa waŋ ba ka mumɔɔli. Yi sa nɔŋ na yuuta poro ba ka kuyɛntande. Biya bi kɔɔyɛ nde ba yina deethiyɛ nanhulu beŋ bindɛ bina yamɛ nthɔŋ nda niyɔ iŋ sɛmbɛ kafay woŋ fooma. Awa thakanka thakɛnda thahothi thaŋ thɛna yi thokine biya bi kafay woŋ beŋ fooma.”

²⁴Babilɔŋ gbasiŋito baa wasi ba ka banabiŋ beŋ mɛnɛ ba ka biya bi ka Masaala beŋ baŋ kuto kɛndɛ; nɛna huŋ yaathi, wasi ba ka bi koro nde kafay woŋ beŋ fooma.