Read West-Central Limba Matɔŋinɔkɔ mȧŋ 6 Bible Online

Matɔŋinɔkɔ mȧŋ 6 - West-Central Limba bible

Matɔŋinɔkɔ mȧŋ 6

¹Kɛna kute yaŋ Taka Wohatiyɛ woŋ si kaŋ mayinki maŋ e kubuna kukahataŋ kumayoŋ koŋ ka ŋakahataŋ ŋa ŋasɔŋ-ŋaye ŋaŋ. Awa yaŋ yuye wunthe ka maamiŋ bipethɔy beŋ si thiyi wɔ iŋ thampa tha ŋatɛ ka thinthi nɔŋ nthanka, na “Fuŋa!”

²Yaŋ dethe kɛndɛ, awa kɛna kute yaŋ soo wohuhɛ. Wɔ niŋ tutɔ woŋ boheŋ nde hiyo ka yɔnkɔ e ndɛ dunkuno nɛmu. Awa kɛna fuŋ wundɛ ba kaa kaŋ dekiya ŋayombo e ŋɛŋ kɔ punka.

³Taka Wohatiyɛ woŋ kane hɛlɛŋ mayinki maŋ e kubuna kukahataŋ kuŋaye koŋ; kɛna yuye yaŋ maama wobiye woŋ ka maamiŋ bipethɔy beŋ si thiyi wɔ, na “Fuŋa!”

⁴Awa kɛna fuŋ soo wohɛna wo pothɛ nɔŋ buu. Wo niŋ tutɔ woŋ dunkuno nde sɛmbɛ ba sisa kuyombo kafaydo, haliko biyamɛti bi be kɔrande. Awa ndɛ dunkuno nde silanhi babukuyɛ.

⁵Kɛna kane hɛlɛŋ Taka Wohatiyɛ woŋ mayinki maŋ e kubuna kukahataŋ kutaati koŋ; awa kɛna yuye yaŋ maama wotaati woŋ ka maamiŋ bipethɔy beŋ si thiyi wɔ, na “Fuŋa!” Yaŋ dethe kɛndɛ, awa kɛna kute yaŋ soo wobɔlɛ. Wo niŋ tutɔ woŋ boheŋ nde muthubute ka yɔnkɔ ba thubuta ti dimbɔ hu ka ntha.

⁶Yaŋ yuye kutɔŋa nɔŋ thampa thɛna fuŋ ŋaye ka mateete ma ka maamiŋ bipethɔy bibinaŋ beŋ. Thampa thaŋ tepe, na “Niya ba kɔɔpu hanthe paka niyo gbɔŋ ba kuthunkuŋ kunthe ku ka wɔ ba gbɛɛŋ woŋ, awa kɔɔpu kataati mpende ba kuthunkuŋ kunthe ku ka wɔ ba gbɛɛŋ woŋ. Kɛrɛ baŋ teeti mayɔ maŋ maa mampa maŋ.”

⁷Taka Wohatiyɛ woŋ kane hɛlɛŋ mayinki maŋ e kubuna kukahataŋ kuŋanaŋ koŋ; awa kɛna yuye yaŋ maama wobinaŋ woŋ ka maamiŋ bipethɔy beŋ si thiyi wɔ, na “Fuŋa!”

⁸Yaŋ dethe kɛndɛ, awa kɛna kute yaŋ soo wonahaaru. Wo niŋ tutɔ woŋ na domo Tuka haŋ e ka Tiyɛ niŋ yema kahɛŋ wuthuriyande. Bindɛ dunkuno mayoho ba kɛriŋiyɛ kufɛŋ kunthe ka ŋafɛŋ ŋanaŋ ŋa kafaydo ŋaŋ, ba kɔra ka kuyombo, ka ŋakɔnthɔ, ka nhuruiŋ, mɛnɛ ka maamiŋ bibaŋɔy.

⁹Kɛna kane hɛlɛŋ Taka Wohatiyɛ woŋ mayinki maŋ e kubuna kukahataŋ kusɔhi koŋ. Yaŋ dethe kɛndɛ awa kɛna kute yaŋ ka pothi ka thebulu wo nde saraka baŋ fuŋuno ka Masaala yinɛŋ bi ka biya bi koro nde beŋ saathɛ ba na nde bindɛ koyoŋ thampa tha ka Masaala thaŋ iŋ ba na key bindɛ ka kɔtɔkɔy ka niya maseri ba wundɛ.

¹⁰Bindɛ bereŋ iŋ thampa tha ŋatɛ ka thinthi e bindɛ dɔma, na “O Mariki wo biyɛ sɛmbɛŋ fooma woŋ, yi niyɔy wɔ kathiŋɔkɔy ka hakɛ, e yi hɛlɛŋ niyɔ wɔ seŋa. Tima hɛlɛŋ nda wuŋ nambi yi ba kɔnsiŋina biya bi kafay woŋ beŋ e bindɛ gbasiŋita ba na kore bindɛ mina?”

¹¹Kɛna dunkuno womo woma ka bitukɛ beŋ beŋ baŋ kuhɔli kuhuhɛ napooŋ e bindɛ tepo ba hɛmuwa hɛlɛŋ wuyete, haaŋ yɔkɔŋ wuŋ kunthu ti mbɛndamɛŋ bi niyiyɛ Masaala na wali ka nanthe iŋ bindɛ beŋ koro, nɔŋ na koro nde bindɛ na.

¹²Naa kane Taka Wohatiyɛ woŋ mayinki maŋ e kubuna kukahataŋ kusɔŋ-kunthe koŋ, yaŋ dethe kɛndɛ, awa kumaŋ, kuyɛkɛŋ koŋ thɛnɛŋ wumandiŋ-mandiŋ, awa e kaŋ woŋ bɔlɔ natii nɔŋ thika babɔlɛ-bɔlɛ, awa e sɛnkɛ woŋ potha nagbɔŋɔyɔɔ nɔŋ wasi.

¹³Sosɛŋ bi ka kuthahinɛ koŋ beŋ yaya kɛkɛŋ nɔŋ ka mutiŋ mu be pothi yayi maŋaye ka kuyeŋ nama naa huru humandiŋ-mandiŋ ŋɛŋ kuŋ.

¹⁴Kɛna piriŋe kuthahinɛ koŋ nayeŋ nɔŋ kuthagba kumaama ku iŋ magbali ku huuyuwɔy, awa kusɛri yo kusɛri mɛnɛ thathiki thaŋ gbonino ka makooye namɛŋ maŋ.

¹⁵Kɛna kute yaŋ gbakuiŋ bi kafay woŋ beŋ, bakɛrɛni beŋ, bayahɛŋ bi ka kurugbani beŋ, bananhuluiŋ beŋ, basɛmbɛŋ beŋ, mɛnɛ biya bihɛna fooma, mbaayiŋ mɛnɛ kɔɔrɔiŋ, kɔ nunɔkɔ ka ŋathaŋ ŋaŋ mɛnɛ ka tharaka tha ka ŋasɛri ŋaŋ thaŋ ka pothi.

¹⁶Kɛna thiyi bindɛ ŋasɛri ŋaŋ mɛnɛ tharaka thaŋ, na “Ŋoteŋ mina e beŋ mina nununa haliko wo dɔŋɔy ka yensi haŋ woŋ be tha mina kutu. Awa e beŋ hɛlɛŋ niya ba miŋ niyɔ thanka mathoŋ ma ka Taka Wohatiyɛ woŋ maŋ!

¹⁷Malɔkɔ mamandiŋ ma ka mathoŋ namɛŋ maŋ tɛŋ, awa nkaana mɛŋ punku sɔkinɔkɔ?”