Read West-Central Limba Matɔŋinɔkɔ mȧŋ 7 Bible Online

Matɔŋinɔkɔ mȧŋ 7 - West-Central Limba bible

Matɔŋinɔkɔ mȧŋ 7

¹Naa daŋande wuŋ kɛndɛ, yaŋ kute malekɛŋ binaŋ bi kooye ka thadoŋ thathanaŋ tha kafay woŋ thaŋ, e bindɛ kɔ pinda thahuru thathanaŋ thaŋ wuna sa huru yo huru hɔŋ kafay woŋ maa ka mankɔ mamɛɛti maŋ maa ma sɔkinɔkɔ kuyeŋ ndo kuyeŋ.

²Awa kɛna kute yaŋ maleka wohɛna si see ŋaye ka kaŋ woŋ fuŋe ka iŋ mudeŋe thɛnkɛy mu ka Masaala wopethɔy woŋ muŋ. Kɛna thiyi ndɛ malekɛŋ bibinaŋ bi dunkune Masaala sɛmbɛ beŋ ba teetuwa kafay woŋ, mɛnɛ mankɔ mamɛɛti maŋ iŋ thampa tha ŋatɛ ka thinthi

³e dɔma, na “Baŋ teeti kafay woŋ, mankɔ mamɛɛti maŋ, maa ŋayeŋ ŋaŋ, haaŋ yɔkɔŋ miŋ deŋe thɛnkɛy bawaliŋ bi ka Masaala ntuŋ woŋ beŋ ka thayethi namɛŋ thaŋ, ka thinthi ka bunihiŋ buŋ.”

⁴Awa kɛna tepo yaŋ ti bi deŋo thɛnkɛy beŋ iŋ mudeŋe thɛnkɛy mu ka Masaala muŋ ka thayethi namɛŋ thaŋ. Bi kiŋ nde wuluiŋ kɔhi iŋ biye dɔŋɔ kɔhi iŋ kaye (144,000). Ka bɔnsɔni ba ka Isirɛli bakɔhi iŋ baye baŋ kɛna ŋaye bindɛ,

⁵wuluiŋ kɔhi iŋ biye ŋaye ka bɔnsɔŋ ndo bɔnsɔŋ. Ŋakeŋ ŋa ka bɔnsɔni baŋ ŋɛna ŋaŋ ŋaŋ baŋ: Yuda Rubɛŋ Kadi Asa Nafatalay Manasa Simiɔŋ Libay Isaka Sɛbulɔŋ Yusufu Bɛnyamiŋ.

⁹Naa daŋande wuŋ kɛndɛ, yaŋ dethe, awa kumaŋ, sɛthɛ bamandiŋ-mandiŋ ba sa wɔ punku kɔnda bɛna. Bindɛ ŋaye ka siya yo siya, ka bɔnsɔni fooma, ka ŋakuyɛkɛŋ ŋa kafaydo fooma, mɛnɛ ka biya bi ka thayuni fooma e bindɛ kɔɔ ka kɔtɔkɔy ka yensi haŋ mɛnɛ ka Taka Wohatiyɛ woŋ, bi thɔɔyɛ ŋahɔli ŋahuhɛ napooŋ e bindɛ bɔha rɔnkɔiŋ ka thɛnkɔ.

¹⁰Kɛna bereŋ bindɛ iŋ thampa tha ŋatɛ ka thinthi e bindɛ dɔma, na “Kisi ntuŋ baŋ ŋaye ka Masaala ntuŋ wo dɔŋɔy ka yensi haŋ woŋ, mɛnɛ ŋaye ka Taka Wohatiyɛ woŋ!”

¹¹Malekɛŋ beŋ fooma key pɛnkande yensi haŋ, bakalani beŋ, mɛnɛ maamiŋ bipethɔy bibinaŋ beŋ. Kɛna puutuwɔy bindɛ ka kɔtɔkɔy ka yensi haŋ e bindɛ niya Masaala na kubatho,

¹²e bindɛ dɔma, na “Amiina! Haliko Masaala ntuŋ woŋ niyɔ iŋ kugbuŋunu, bukuya humandiŋ, kele, kuthiyi maamo, yiki, sɛmbɛ, mɛnɛ kaheke ba kɔy yo kɔy! Amiina!”

¹³Kɛna thɔnthɔŋɔŋ yama wunthe ka bakalani beŋ, na “E yi kɔthɛŋ ba biya beŋ beŋ baŋ bi thɔɔyɛ ŋahɔli ŋahuhɛ beŋ mɛnɛ ka ŋaye bindɛ?”

¹⁴Yaŋ ni niŋ yaabi, na “Hɛmɔŋ yaŋ kɔita, kɛrɛ yi kɔthɛŋ ba bindɛ mɛnɛ ka ŋaye bindɛ.” Huna dome ndɛ kiyaŋ, na “Biya beŋ beŋ baŋ bindɛ bina bi niyo nde nambara beŋ ka lɔkɔ ba ka thɔrɔiŋ bamandiŋ baŋ kɛrɛ bindɛ tha duu mahɛŋ. Bindɛ looyi ŋahɔli namɛŋ ŋaŋ e bindɛ ŋɛŋ mɛthina iŋ wasi ba ka Taka Wohatiyɛ woŋ baŋ.

¹⁵Wuna biyɛ bindɛ si kɔɔ ka kɔtɔkɔy ka yensi hu ka Masaala haŋ ba niŋ niyiyɛ wali gbɛɛŋ iŋ piri-piri ka banka ba wundɛ niyo kubatho baŋ. Wundɛ wo dɔŋɔy ka yensi haŋ woŋ kɔŋ bindɛ ni kantha iŋ kupɛnkintiyande nama koŋ.

¹⁶Bindɛ sa nɔŋ nda kaho kɔnthɔ maa kumbɛ; kaŋ woŋ sa bindɛ pɛnki maa ntha yo ntha ki bindɛ tɔɔni,

¹⁷baa Taka Wohatiyɛ, wo mateete ka yensi haŋ woŋ, kɔŋ niyɔ batɔli namɛŋ, awa wundɛ kɔŋ bindɛ katitɔkɔ ka nthondiŋ ki ka mandi ma dunkuŋ sii baŋ kiŋ. Masaala kɔŋ puuthu manɛɛni yo manɛɛni ka thaaya namɛŋ thaŋ.”