Read West-Central Limba Matɔŋinɔkɔ mȧŋ 8 Bible Online

Matɔŋinɔkɔ mȧŋ 8 - West-Central Limba bible

Matɔŋinɔkɔ mȧŋ 8

¹Naa kane Taka Wohatiyɛ woŋ mayinki maŋ e ndɛ kubuna kukahataŋ kusɔŋ-ŋaye koŋ, kɛna niyɔy wuŋ nayeŋ ka ariana bɛrɛ ba wakathi mateete.

²Kɛna kute yaŋ malekɛŋ bisɔŋ-biye bi kɔɔyɛ ka kɔtɔkɔy ka Masaala ka beŋ, e bindɛ dunkuno ŋathuthu ŋasɔŋ-ŋaye.

³Awa maleka wohɛna wo bɔhɛ mutoonuwe gbomgbo muboy fuŋ e ka kɔɔ ka bindɛ fuŋune saraka baŋ kɛ ka Masaala. Wundɛ dunkuno gbomgbo babɔyɛ-bɔyɛ ba ndinta ka ŋaraminɛ ŋa ka biya bi ka Masaala beŋ fooma, ba muŋ dunkuna nɔŋ munkii ka thebulu woboy wo fuŋune saraka ka Masaala woŋ ka kɔtɔkɔy ka yensi haŋ.

⁴Hiti hu ka gbomgbo ba tɔɔnuwa baŋ haŋ muna ŋati ka thinthi iŋ ŋaraminɛ ŋa ka biya bi ka Masaala beŋ ŋaŋ ŋaye ka yɔnkɔ hu ka maleka wo kɔɔyɛ ka kɔtɔkɔy ka Masaala ka woŋ.

⁵Kɛna sekithe maleka woŋ mutoonuwe gbomgbo baŋ muŋ, e ndɛ muŋ thiŋina buu bu sekithe ndɛ ka bindɛ fuŋune saraka baŋ kɛ ka Masaala e wundɛ muŋ yɛla ka pothi ka fai woŋ. Kɛna fuŋ ŋatɔŋa mɛnɛ nthankɛŋ, ŋawali-waliŋ, awa e kuyɛkɛŋ koŋ thɛnina.

⁶Kɛna kɔsinɔkɔy malekɛŋ bisɔŋ-biye beŋ ba hɔŋa ŋathuthu namɛŋ ŋa ŋasɔŋ-ŋaye ŋaŋ.

⁷Maleka womayoŋ woŋ hoŋe kuthuthu nama koŋ. Kɛna fuŋ thoo mɛnɛ buu mu tikitande iŋ wasi e muŋ kɔ sasɔ kafay woŋ; kufɛŋ kunthe ka ŋafɛŋ ŋa ŋataati ŋa kafay woŋ ŋaŋ toonuwo, kufɛŋ kunthe ka ŋafɛŋ ŋa ŋataati ŋa ka ŋayeŋ ŋaŋ toonuwo, hande huthɔnɛ haŋ tɔɔki natharaŋ.

⁸Maleka wobiye woŋ hoŋe kuthuthu nama koŋ. Kɛna tɔŋinɔkɔy ntha nɔŋ kusɛri kumandiŋ ku thiyɔy buu e wuŋ gbantɔkɔ ka mankɔ mamɛɛti maŋ. Kufɛŋ kutaati ku ka mankɔ mamɛɛti maŋ koŋ sikiyɔkɔy wasi,

⁹kufɛŋ kutaati ku ka maamiŋ bipethɔy bi ka mankɔ mamɛɛti maŋ beŋ tuukuwa, awa kufɛŋ kutaati ku ka gbeni baŋ koŋ teetuwɔy.

¹⁰Maleka wotaati woŋ hoŋe kuthuthu nama koŋ. Kɛna tɔŋinɔkɔy sosa womandiŋ e kɔ bɛnda nɔŋ mumɔɔli muna maye e muŋ kɔ yaya ŋaye ka kuthahinɛ koŋ ka kufɛŋ kutaati ku ka mankɔiŋ maŋ, mɛnɛ ka nthondiŋ ki ka mandiŋ maŋ kiŋ.

¹¹Keŋ ku ka sosa woŋ koŋ kuna dɔma “Wuŋalɔy.” Kufɛŋ kutaati ku ka mandiŋ maŋ niyɔy maŋalɔy, awa biya bibɔyɛ tuuku naa thiiye bindɛ mandi mabɛina baa mɛŋ niyɔy maŋalɔy.

¹²Maleka wobinaŋ woŋ hoŋe kuthuthu nama koŋ. Kufɛŋ kutaati ku ka kaŋ woŋ, mɛnɛ sɛnkɛ woŋ, mɛnɛ sosɛŋ beŋ haŋo e kuŋ niyɔ huntuma nagbii; awa waŋ ka nda ka kufɛŋ kutaati ku ka gbɛɛŋ woŋ koŋ mɛnɛ ku ka piri-piri woŋ koŋ.

¹³Yaŋ dethe, awa kɛna yuye yaŋ gbuŋɔ si keŋ ka thinthi ka kufenaŋ koŋ e ndɛ kɔ berina iŋ thampa tha ŋatɛ ka thinthi, na “Nkinikiniŋ, nkinikiniŋ, nkinikiniŋ ki kɔŋ niyɔ ka bi kafay woŋ beŋ fooma naa ŋathuthu ŋaŋ hoŋo iŋ malekɛŋ bitaati bibintheŋ bi kɔɔyɛ ma hoŋe beŋ.”