Read West-Central Limba Matɔŋinɔkɔ mȧŋ 9 Bible Online

Matɔŋinɔkɔ mȧŋ 9 - West-Central Limba bible

Matɔŋinɔkɔ mȧŋ 9

¹Maleka wosɔhi woŋ hoŋe kuthuthu nama koŋ. Kɛna kute yaŋ sosa ŋɔta kafay woŋ ka ŋaye ka kuthahinɛ koŋ, e ndɛ dunkuno saapa hu pɛthi biyo hu ka tha kuyɛkɛŋ koŋ mankande ka haŋ.

²Wundɛ pɛthi biyo hu ka tha kuyɛkɛŋ koŋ mankande ka, awa kɛna fuŋ hiti hu thɔyande iŋ hiti hu ka buu bumandiŋ. Huŋ fuŋ haaŋ kaŋ woŋ mɛnɛ kufenaŋ koŋ niyɔ huntuma nagbi iŋ hiti hu fuŋɛ ka pɛthi wundɛ ka haŋ.

³Awa ŋaye ka hiti haŋ haŋ baŋ, sisiŋ bohe kɛndɛ fuŋa e bindɛ kɔ ŋɔta kafay ka. Bindɛ dunkuno nde sɛmbɛ nɔŋ sɛmbɛ ba ka dempuiŋ bi kafay woŋ beŋ.

⁴Kɛrɛ bindɛ tepo ba thana niya hande haŋ ntha maa ŋayeŋ ŋaŋ maa muthuu yo muthuu muhɛna; kɛrɛ na ba bindɛ niya ntha biya bi ka iŋ thɛnkɛy wo ka Masaala woŋ ka thayethi namɛŋ thaŋ ka thinthi ka bunihiŋ namɛŋ buŋ.

⁵Sisiŋ beŋ tepo ba bindɛ niya biya beŋ muthoonɛ ba sɛnkɛni bisɔhi, kɛrɛ na ba bindɛ thana kɔra biya beŋ. Awa wuthoonɛ wu niyɔ wuŋ ka sɛnkɛni bisɔhi beŋ, wu kɔŋ niyɔ nɔŋ wuthoonɛ wu niyɔ wuŋ naa dempu thahe wɔ.

⁶Ka sɛnkɛni bisɔhi beŋ beŋ baŋ, biya beŋ bi kɔŋ deethi gboŋɛŋ na bindɛ tukɛ, kɛrɛ bindɛ sa bɛŋ kutu; bi kɔŋ thimo ba tuka, kɛrɛ tuka haŋ hu kɔŋ bindɛ kiti.

⁷Sisiŋ beŋ athɔyande iŋ sooni bi kɔɔyɛ madekiye kuyombo; bi kiŋ iŋ munki ka thankaha namɛŋ thaŋ mu thɔyande iŋ nɛmuiŋ biboy, awa thayethi namɛŋ thaŋ nɔŋ thayethi tha ka biyamɛti.

⁸Bɔɔyɛ namɛŋ buŋ buthɔɔkuwɛ nɔŋ bɔɔyɛ bu ka thankaha tha ka yɛrɛmɛŋ, awa thathithi namɛŋ thaŋ nɔŋ thathithi tha ka yaadiŋ.

⁹Bi kiŋ iŋ yabɛŋ nɔŋ thawɛ tha putoko ba pama kankɛŋ namɛŋ baŋ awa kutɔŋa ku fuŋ ka ŋapɛli namɛŋ ŋaŋ athɔyande iŋ poro ba ka muthare mubɔyɛ mu yɔsa iŋ sooni ba kaa ka kuyombo.

¹⁰Bi kiŋ iŋ ŋathindaali ŋa bindɛ thahe nɔŋ dempuiŋ, awa ka ŋathindaali namɛŋ ŋaŋ kɛna bindɛ iŋ sɛmbɛ ba niye biya thɔrɔ ba sɛnkɛni bisɔhi beŋ.

¹¹Bi kiŋ iŋ gbaku wo bindɛ kɛriŋiyɛ; wundɛ na maleka wo dethiteke ka tha kuyɛkɛŋ koŋ mankande ka. Keŋ nama koŋ ka huyuŋ hu ka biYusu beŋ haŋ kuna dɔma Abadoŋ; ka huyuŋ hu ka biKiriki beŋ haŋ na Apɔliyɔŋ, wu thalintando wuŋ ba dɔma, na “Bateeti woŋ.”

¹²Nkinikiniŋ kimayoŋ kiŋ daŋande; awa naa daŋande kiŋ na, wuŋ pɛyɛ hɛlɛŋ nkinikinini kiye ba niyɔ.

¹³Maleka wosɔŋ-wunthe woŋ hoŋe kuthuthu nama koŋ. Kɛna yuye yaŋ thampa tha si fuŋ ŋaye ka ŋaasɛ ŋaŋanaŋ ŋa ka thadoŋ tha ka thebulu woboy wo fuŋune saraka ka Masaala wo kɔɔyɛ ka kɔtɔkɔy kɛnama woŋ.

¹⁴Thampa thaŋ dome ka maleka wosɔŋ-wunthe woŋ, na “Pɛɛka malekɛŋ bibinaŋ bi yuko nde beŋ ka mankɔ mamandiŋ ma dɔma maŋ na mankɔ ma ka Yufiretisi maŋ!”

¹⁵Malekɛŋ bibinaŋ beŋ peeko; awa ba wakathi wogbeeŋ woŋ baŋ, ka gbɛɛŋ wogbeeŋ wo ka lɔkɔ baŋ baŋ ka sɛnkɛ wogbeeŋ woŋ baŋ, ka nina hugbeeŋ haŋ haŋ baŋ, huna kosino nde bindɛ ba kɔɔruwa kufɛŋ kutaati ku ka biyamɛti fooma.

¹⁶Yaŋ tepo ti sooni beŋ mɛnɛ bi tutɔy bindɛ beŋ ka fooma nama; bi kiŋ nde wuluiŋ kɔhi dɔŋɔ wuluiŋ kɔhi dɔŋɔ kaye.

¹⁷Awa ka maniyɔ mathɔɔkɔ maŋ maŋ baŋ nɔŋ mandɛ, yaŋ kute sooni beŋ mɛnɛ bi tutɔy bindɛ beŋ: bi tutɔy sooni beŋ bi kiŋ nde iŋ yabɛŋ bathawɛ ba pama kankɛŋ namɛŋ baŋ bapothɛ nɔŋ buu, babiloo nɔŋ kuthahinɛ koŋ, mɛnɛ bayɛlo nɔŋ sɔlifa. Thankaha tha ka sooni beŋ thaŋ athɔyande iŋ thankaha tha ka yaadiŋ, awa buu, hiti, mɛnɛ huru hu ka sɔlifa wotɔɔki kɔ fuŋa ka thahothi namɛŋ thaŋ.

¹⁸Kufɛŋ kutaati ku ka biyamɛti kooruwo iŋ kasarɛŋ baŋ baŋ: buu buŋ, hiti haŋ, mɛnɛ huru hu ka sɔlifa wotɔɔki mu fuŋ ka thahothi tha ka sooni beŋ thaŋ.

¹⁹Baa sɛmbɛ ba ka sooni beŋ baŋ ba kiŋ ka thahothi namɛŋ thaŋ mɛnɛ ka ŋakindeŋ namɛŋ ŋaŋ. Ŋakindeŋ namɛŋ ŋaŋ athɔyande iŋ bikɛkɛni bi iŋ thankaha, awa ŋɛna bindɛ niye biya muthoonɛ.

²⁰Awa biyamɛti bi pɛyɛ beŋ fooma, bi tha kɔra ka kasarɛŋ baŋ baŋ beŋ, bindɛ baŋaŋ ba sikina sɔkɔrɔ ŋaye ka mu thanki bindɛ yehiniyɔkɔ muŋ. Bindɛ tha pɛyi ba niya mbayiŋ kubatho, maa dekɛŋ bi yehinuwo ŋaye ka boy, siliba, birasi, tharaka, maa ŋayeŋ, bi be yuyɛ, bindɛ kuita, maa ba kaande.

²¹Bindɛ tha hintiŋ nthɔŋ sikiŋ sɔkɔrɔ kɔra hu bindɛ kɔri haŋ, thakanka namɛŋ thaŋ, ŋabɛini namɛŋ ŋaŋ, maa ŋatuwani namɛŋ ŋaŋ.