Read Western Dani Wakkagagerak 12 Bible Online

Wakkagagerak 12 - Western Dani bible

Wakkagagerak 12

¹O Karan nogome aret wonogwe me, at Aliku ALA nen Abaram yoge logonet, “Kanggween inom, kowe-kawot inom, koreewi kinagunu ambi'me kinom menggendak inom, mondok teppiige logomenggendik, an nen o kat logowam ambi titikkege neenok, time aret nanu o.

²Time namenggendak me, Nale'nggen koba pagage logonet, Kat paga nen kanebunu nggwok wigak yuwak nduk eeppagage, Kendage nggwok aruwak nduk tiyappagage, Eeriminggirak paga Aakumi ambik obeelom eeppiige logomunggun o.

³ It aakumi nen kat obeelom eeppagagwi iinok, An nen it obeelom eerogo piige, Ndi, it aakumi nen kat pulunogo pagagwi iinok, An nen it pulunogo piige, Eeke logogin o. Yi aakumi ndi aakumi o nggween paga yime abok aret Kat paga inale'nggen ambik kogo logogun o,” yinuk, yoreegerak.

⁴Yoge mbareegi, Abaram nogo ndarak kagak tahun 75 eeke nagagerik, Aliku ALA nen at yoreegerak nogo ndak-ndak o Karan wonagagim nogome teppunuk, at akwe Tarayi inom, at awuluk aput Lot nogo inom, o Karan logonet, amindik-amendek kuwak eereegerak nogo inom, ayeloman mini inom, abok aret wogoren o Kanan Ala nen, “Nak o,” yoreegim nogome aret wogogwaarak.

⁶O Kanan nogome aret unggwi wogo nogogwaarik, o ti eyom paga aakumi Kanan mendek time wonogwe iigak mban, nok-nok, o Tikem eyo teno alome o More nogome aret wogogwaarak.

⁷ Wogo mbareegwa, at Aliku ALA nen Abaram owagam wage nagagerik, yoge logonet, “An nen o yi kat paga wiganak nen unde eeppunuk logowak nduk, wogorigin o,” yoge mbareegi, at Abaram nen, “Aliku ALA nowagam pe'neya wagaarak o,” yinuk, Aliku ALA ake warogo kani kunggo logorak yugum logonogo pereegerak.

⁸Logonogo pege nagagerik, at Abaram nogo o nogome teppunuk, puut tiyak-tebek o Mbeten oonegen lagi wage menggim pa'nggwe nogome puk ari wage nagagerik, o Mbeten nogo oonegen kilu yi nage menggim pa'nggwe agi nikkagak, ndi, o Ayi oonegen lagi wage menggim pa'nggwe ogu wukkagak, oolo time ooliya wuppunuk logonet, yugum logonogo punuk, Aliku ALA ake pege logonet, at Aliku ALA endage kunogo alut eereegerak.

⁹Ti eeke nagagerik, peebi nen, o nogome teppunuk o ambime nen ambime unggwagak eerit o Kanan, o ame pa'nggwe karume nggwok time aret ari nagagerak.

¹⁰At Abaram o Kanan nogome wonage me, ne ambi paga mbi noogelo aret agagerak. Mbi noogelo abu nggwok aret age mbareegi, o Metit time aap nggiru negen logonuk woraawok nduk nogogwaarak.

¹¹ Nogo nogogwaarik, o Metit unggwi nawok nduk eeko logonet, Abaram nen akwe Tarayi yoge, “Kat kwe abu kigirikwe lombok me, it aap Metit mendek inigen keego logomenggaarik, Yi at akwe aret o, yinuk, kat ndinggako logonet, an noorukwak me, kat nen, Yi an noweeluk aret, yoraamunggun o. Togop yorage keenok, an nooka'lek teppanemenggaarak paga nimbirak op aret logogun o,” yinuk, yoreegerak.

¹⁴Wone ti nogo abu mbambunuk, o Metit unggwi nogo mbareegwa, it aakumi Metit mendek nen kwe Tarayi nogo abu amuni mbanak kigirikwe lombok kogogwaarak.

¹⁵Ndi, at aap endagembogut Metit mendek inom yabu eeko menggaarak nogo nen kwe Tarayi nogo amuni mbanak kigirikwe inigen kogo nogogwaarik, “Kwe kigirikwe yogop kogoorak o,” yinuk, aap inowe endagembogut nogo yori nogo mbareegwa, “Wa nanip o,” yorage mbareegi, kwe nogo wonok at awi o nggwok abe wurik me pi nogogwaarak.

¹⁶Wonok pi nogo mbareegwa, at aap endagembogut nogo nen kwe Tarayi nogo, “Koloorak,” mbake logonet, iniki obeelom paga Abaram imbirak lambungge nagagerik, kambin-ndomba inom, lembu-tapi inom, keledai ngguunok-kooli inom, ayeloman kumi-aap inom, unta inom, abok kuwak eerogo Abaram wogoreegerak.

¹⁷At aap endagembogut nogo nen Abaram akwe Tarayi nogo koloorak mbareegerak paga at Aliku ALA nen andi etenggen alitik-alitak mondok iya inagabiti warak mendek aap endagembogut nogo oba inom, awuri at ame wonogwe nogo inoba inom, nappi wagagerak.

¹⁸Nappi wagagerak andi eeginabit nage mbareegi, at aap endagembogut nogo nen Abaram wiireegerak wage mbareegi, yoge logonet, “Kat nen, Nakweeluk, yagambok, Nawuluk, yagandak paga, An kolaakit, mba'nuk, name pi wagarak me, kat nonggop nduk, An nakwe aret o, yuulik eekendak ti paga an maluk eeppanegendak o. Kat kakwe aret me, ko'nok nak o.”

²⁰Yoge nagagerik, at awuri nogo yorage logonet, “At Abaram ti, ame nawak nduk, nappi nanip o,” yorage mbareegi, at awuri nogo nen at Abaram akwe inom, amindik-amendek inom, abok aret wogoren nappiya wogogwaarak.