Read Western Dani Wakkagagerak 16 Bible Online

Wakkagagerak 16 - Western Dani bible

Wakkagagerak 16

¹At Abaram nogo, o Kanan ari nanuk, tahun 10 ari nage kagak, at akwe Tarayi nogo aagalogwe Abaram obaane'me ndaganaka'lek wubili aret wonagagerak. Ndi, at ayeloman ambi o Metit mendek kolaga endage Agat aret wonagagerak me, at Tarayi nogo nen Abaram yoge logonet, “At Aliku ALA nen an naagaluk ndariyak nduk eeppanega'lek me, nayeloman kolaga Agat yi nen aret an nake naagalogwe nda'niruwak nduk kat kimbirak nogo yu o.” Yoge mbareegi, at Abaram nogo Tarayi nen yoreegerak op mbake mbareegi, akwe Tarayi nen ayeloman o Metit mendek Agat nogo, Abaram akwe kolaawak nduk wogoreegerak.

⁴Wogoge mbareegi, at Abaram nogo kolaga Agat imbirak nogo yege logonet, abila aret agagerak. At kwe Agat nogo nen, “Nabila agaarak kagi,” mbake nagagerik, kwe Tarayi nogo miyuk-meya eerogo pereegerak.

⁵Miyuk-meya eerogo pege mbareegi, at Tarayi nen Abaram yoge logonet, “Nayeloman kwe Agat yi, an nen aret wokkigirak kwe, at nen, Nabila agaarak kagi, mbake nagaarik, miyuk-meya eerogo panege paga niniki abu wakkolage yi, alom kat aret eekendak me, at Aliku ALA nen mban ninawone mbangge logowak o.”

⁶Yoge mbareegi, at Abaram nen akwe Tarayi yoge logonet, “Kayeloman ti, kat kabu'me aret wonage me, kat nen eeppuurak mbakendak nogo ti aret eeppu o,” yoge mbareegi, at Tarayi nogo nen oone andiigwi mban yogak eeke mbareegi, at Agat nogo kole mbaganeegerak.

⁷Kole mbaganit niyo eneeri wungge menggim o Tut nogo menggam tu paga karume time ari wagagerak wonage me, at Aliku ALA ayonggo malayikat ka wage nagagerik,

⁸yoge logonet, “Tarayi ayeloman kwe Agat yi, wae. Kat ngga nen wagandak o? Ndi, nggeeme naakit nduk nage agandik?” Yoge mbareegi, at Agat nen ari logonet, “Lek o. Nagalo Tarayi nimbirak wonagarak kwe, mbo punuk kole nage agarik o.”

⁹Yoge mbareegi, at Aliku ALA ayonggo malayikat nogo nen at kwe Agat yoge logonet, “Kiyokan yungguninuk kagalo ka nage logomenggendik, oone andiigwi yokkege kagak at ayeloman abu'me tebenak aret logomunggun o.”

¹⁰Yoge nagagerik, at malayikat nogo nen ambinom yoge logonet, “An nen kowoowologwe ambik aakumi ineenggi lingginiyak meek lombok aret wiganogo piyaagin o.”

¹¹Yoge nagagerik, Aliku ALA ayonggo malayikat nogo nen yoge logonet, “Kabila agandak nogo ti, Wulaga ambi aret ndarumunggun o. Ndake logomenggendik, Koba aaninggin kenok le yagandak nogo ti, Aliku ALA muk aruk konenggerak me, Kaagaluk endage ti, Itamayen aret toonumunggun o.

¹²At obaabut ti, Keledai enegen mbolok kwi menggi kwak, At ndak-ndak aret logogin o. At nen aakumi eekwi nogo ineebi inombake, It aakumi nen at eeke kenok ineebi ombakwi, Eeko logonet, Inanini nen oreewi inom ogoorak aret logogun o,” yoreegerak.

¹³Yoge mbareegi, at Agat inikime nen mbake logonet, “At Liippanege Menggerak nogo ti, nenegen abet aret kagarak o,” ari nagagerik, at Aliku ALA endage, Liippanege Menggerak o, yinuk, tooneegerak.

¹⁴Ala endage togop aret tooneegerak me, o Kareti anu, o Mberet ogwe, kagak oolo niyo eneeri nggween kabunik aakumi nen, “Niyo nggween kabunik yi, at Eenik Itok Menggerak Nen Enegen Neege Menggim o,” yinuk, yogo logogun.

¹⁵ Nogo toombunuk wage nagagerik, at kwe Agat nogo aagaluk Abaram obaane'me ndarogo pege mbareegi, at Abaram nen kwe Agat aagaluk wulaga ndareegerak nogo endage Itamayen tooneegerak.

¹⁶At Abaram nogo ndarak tahun 86 ari nagagerak kagak apuluk Itamayen aret ndareegerak.