Read Western Dani Wakkagagerak 17 Bible Online

Wakkagagerak 17 - Western Dani bible

Wakkagagerak 17

¹Ti'nuk, at Abaram nogo ndarak kagak tahun 99 eeke nagagerik wonage me, at Aliku ALA nogo at owagam wage nagagerik, yoge logonet, “Nomaawi Lombok Minggirak an Ala aret me, an nenggaanom paga maluk eeka'lek obeelom mban eerit nage logot o.”

²Yoge nagagerik, “Wone nimbirak abuk nggaruk togon mbaneegurak nogo yogondak yi paga aret kombowologwe ambik lombok agago piyaagin o.”

³Yoge mbareegi, Abaram nogo nen nggween paga enete wanduk wangge mbareegi, at Ala nen Abaram yoge logonet,

⁴“An perak, ninom wone abuk nggaruk togon mbaneegurak nogo aret yokkiri o. Kat keebe nogo ti, yi aakumi ndi aakumi inanebunu lombok inombo aret arumunggun me,

⁵kat kendage aa'nduk nen ti, Abaram aret yokkogo nogogwaarak kwe, yi aakumi ndi aakumi inombo, Kat aret o, yinuk, mippagagirak me, yogondak nen ti, kendage, Abarakam o, yinuk, yokkogo logowak o.

⁶Kat kombowologwe ambik eerogo wokkege, yi aakumi ndi aakumi inanebunu lombok inombo agago pagage, kat paga wiganak nen yi aap ndi aap inendagembogut eerogo piige, eerigin o, yinuk, wone abuk nggaruk togon mbaneegurak nogo aret yokkigi o.”

⁷Yoge nagagerik, “Kat inom, kapurilogwe wigannaremenggaarak inom, kinogoba Ala an aret logogin o,” yinuk, “Kat nimbirak wone abuk nggaruk togon mbaneegurak nogo ti, kat kombowologwe ninom mbaneegurak negen aret me, lek arigin lek mondok-mondok aret logogin o.

⁸ Kat aap nggiru negen menggenom o Kanan nggwok yi abok aret, kat inom, kombowologwe wigannaremenggaarak nogo inom, mondok-mondok unde logomunggup nduk wokkiraagin o. Ndi, kombowologwe wigannaremenggaarak nogo inogoba Ala an mondok aret logogin o.”

⁹Yoge nagagerik, Ala nen Abarakam ambinom yoge logonet, “Ndi, kat inom, kombowologwe nda'narit namenggaarak nogo inom, abok aret wone abuk nggaruk togon yokkereegirak nogo taganogo mbo pega'lek liirogon aret eerit nogo logomunggup o.

¹⁰Kat inom, kat kombowologwe ndaganabemenggaarak inom, mondok-mondok eeko logorak wone ambi abuk nggaruk togon yokkiri o. Kinapuri wologwe nda'nogwe iinok, tigitogon aret inagabolo mbanggo logonu o.

¹¹Kat nimbirak wone abuk nggaruk togon mbaneegurak nogo yelok kogo logowak nduk, it kapuri-kombowologwe kinenggela'me kiname logonet, ndaganabit nogwe nogo inom, kat kapuri lek it aakumi endekem mendek nen wonok wogonok onggo kuninakwi inom, wologwe abok aret ndarak iigak nogo 7 yinuk, ko'lu inagabolo mbaninako logonu o.

¹³It inagabolo mbanak ti paga, Wone yugu nogo lek aga'lek mondok aret logogin kagi, yinuk, aberak logowak nduk, kame nen ndarak inom, kawu paga kunik inom, ambi teppiiga'lek abok aret inagabolo mbanggo logonu o.

¹⁴Aap ambi agabolo mbangga'lek, we teppuurak kenok, an noone yugu nogo taganogo pege me, at aap ti, at owe-awot enggela'me nen endekem wumbogo logonu o,” yoreegerak.

¹⁵Yoge nagagerik, ti'nuk Ala nen Abarakam ambinom yoge logonet, “Ndi, kat kakwe Tarayi nogo perak, yogondak yi kuli nen endage Tarayi yoge logogun o. Ata, endage Tara aret yogo logonu o.

¹⁶At Tara ti, niniki ale'nggen oba piminggirak paga aagaluk wulaga ambi ndakkirigin o. Niniki ale'nggen at Tara oba piminggirak paga yi aakumi ndi aakumi inowogolo aret age, at aagalogwe wiganak inenggela'me nen aap inoweewi inendagembogut nda'nogwe, eeko logogun o,” yoreegerak.

¹⁷Yoge mbareegi, at Abarakam nogo enete wanduk nggween paga wambunuk, inikime nen ari logonet, “Aap ambit-ambi tahun 100 eekerak kagak apuluk ndariyak op mbakop? Ndi, at Tara kunduk, ndarak kagak tahun 90 eekerak me, aagaluk ambi ndariyak op mbakop?” yinuk, i'ndok kambeegerak.

¹⁸I'ndok kangge nagagerik, at Abarakam nen Ala yoge logonet, “Nogoba o. Napuluk Itamayen ti aret kale'nggen oba pege logorak o.”

¹⁹Yoge mbareegi, at Ala nen Abarakam yoge logonet, “Ti yagandak kwe, lek o. Kat kakwe Tara nen kobaane'me wulaga ambi ndarigin me, endage ti, Itak aret toonenu o. Wone abuk nggaruk togon yokkereegirak nogo, at ombowologwe wiganak nen mondok-mondok porogo logonet, eeko logowak nduk, at kunduk wone abuk nggaruk togon yorigin o.

²⁰Ndi, at Itamayen nogo perak, kat eeriyak yagandak nogo ti, muk naruk konenggirak me, at togon an mbo pigin lek o. Nale'nggen at oba pege logonet, ombowologwe nggwok aret wiganogo piige, aap inendagembogut ineebe 12 aret ndaganake, at anebunu nggwok aret wiganogo pege, eerigin kwe,

²¹wone abuk nggaruk togon mbaneegurak nogo ti, aap Itamayen nimbirak mbanigin lek o. Ata, tahun ambi eeppunuk, ne yogondak yi ndak-ndak kwe Tara nogo nen kaput Itak kobaane'me ndarogo pigin nogo perak, yorigin o,” yoreegerak.

²²Wone nogo abok aret yoge nagagerik, at Ala nogo Abarakam teppunuk nagagerak.

²³Nage kagak, at Abarakam nogo nen Ala yoreegerak nogo ndak-ndak at aput Itamayen inom, it aap at ame ndarak inom, inawu paga kunik inom, wologwe at ame wonogwe nogo abok aret kuwak eeppiinok, inagabolo mbaninabit nagagerak.

²⁴At Abarakam nogo ndarak kagak tahun 99 eereegerak paga at agabolo mbangge,

²⁵ndi, at Itamayen nogo ti, ndarak kagak tahun 13 eereegerak paga agabolo mbangge,

²⁶eereegwaarak nogo ti, ne ambit ti eyom paga aret eeko logonet,

²⁷it aap at ame ndarak inom, inawu paga kunik inom, ambugwi aret inagabolo mbaneegwaarak.