Read Western Dani Wakkagagerak 19 Bible Online

Wakkagagerak 19 - Western Dani bible

Wakkagagerak 19

¹It aap Ala ayonggo malayikat mbere'ndak nogo, o kiip age kagak o Torom unggwi wogogwaarak. At Lot nogo o Torom tu unggwogo menggam kwi'ndak wonage me, it nogo unggwi wogwe enegen iige nagagerik, etenggen nggween paga wanduk wangge logonet, keyage wappiyareegerak.

²Keyage wappiige nagagerik, yorage logonet, “Nogobamini o. An kinayeloman name ninom unggunuk, kiniyok koorogo punuk, ninom nogo yogo logomonggoorik, ko'lu kuup kineenik a'nuk, noorak mbako'nom aret nabagip o.” Yorage mbareegi, it nen at yogo logonet, “Lek o. Nit oore'nggam endekem ya'i aret nogo yuwi o.”

³Yoreegwaarak kwe, at Lot nogo, oone nimi-nomoorak mban yorage mbareegi, ame inom unggwi nogo nogogwaarik, wonogo logonet, inabugo oroti piika'lek mendek we worarogo nunggugwaarak.

⁴Nonggo nogogwaarik, inom nogo yuwok nduk wonogwe me, it aap inanggok inom, tawe inom, o Torom ilin-unggut nen abok aret Lot awinggu'me wanggeko nogogwaarik,

⁵ At Lot yogo logonet, “Aap o kiip age kagak, keya wagaarak ti, ineebe ngge o? It aap ti wurinabuwok nduk wumbiya omok o.”

⁶Yogo mbareegwa, at Lot nogo tu nappunuk, endekem wundi nage nagagerik,

⁷yorage logonet, “Ai, noreewi o. It aap yi maluk eeppiyaagup o obak.

⁸Kit eeppiyoorak mbakotak nogo obaane'me an napurilogwe aap kigin waka'lek mbere tawe wonogwe yi, eeginaburak nduk, wogoren wokkira wundi woroorak op kwe, it aap neya wagaarak yi perak, name ugun obeelom nogo yuwak nduk, neya wagaarak me, maluk eeppiyoorak mage o.”

⁹Togop yoragagerak kwe, it aap Torom mendek nogo nen at Lot yogo logonet, “Keebe tayorogon nda nen agan nege a nak a!” Yogo logonet, “Kat kunduk nggiru nineya wagandak nogo nen ninowak looninaburak nduk ari agandik? It aap mbere ti, mbawok negen eeginako logonet, kat mondok nggwok lombok eekkabukwak, nda nen ari a nak a!” yinuk, inoone panggok togon yogo logonet, at Lot nogo pelegirik tungga langgunik-panggunik agago mambuwok nduk eekwi me,

¹⁰it aap mbere'ndak nogo ineenggi wumbi wogo nogogwaarik, at Lot obaak yabonogo oome mambunuk, tu nggelok togon nareegwaarak.

¹¹ Tu nggelok togon nappogo nogogwaarik, it aap endekem oonggu'me wonogwe nogo aap tawe inom, aap inanggok inom, abok tigitogon inigen mbuk eerogo piigo mbareegwa, tungga nogo inigen abu kaga'lek aret wonogogwaarak.

¹²It aap mbere'ndak nogo nen at Lot yogo logonet, “It aakumi o yime wonogwe nogo eekwi paga inanini agaket yogwe at Aliku ALA nen iige nagagerik, pup eerogo inooriyak nduk nappinani wagaarak me, kapurilogwe wologwe inom, komologwe inom, karumini inom, kat mendek abok aret yime ambi wonogwe iyo, inom pup eerogo piyookwak, kurumbi yora nak o,” yoreegwaarak.

¹⁴Yogo mbareegwa, at Lot nogo yonggo at apuri komologwe mbere koloorak nduk eekwi at arumini nogo, yora nage nagagerik, “O yime Ala nen mondok pup eerogo pigin me, mbo punuk mbet mbaganinip o,” yinuk, yoragagerak kwe, it iniki nen, “Lot ti, pilit agan nege agaarik,” mba'nuk, mbaganulik puk ogogwaarak.

¹⁵Ti'nuk, ko'lu o weerikit nduk eeke kagak, it aap Ala ayonggo mbere'ndak nogo nen Lot yogo logonet, “Kat elaambirik wonage ti mage o. Ala nen o yi, pup eerogo pikit nduk eeke me, kinom kinoorukwak, kat kakwe kunduk, kapuri komologwe mbere'ndak nogo kunduk, wogoren mbet-mbet aret wundi nak o.”

¹⁶ Yoreegwaarak kwe, at Lot nogo iniki yungguppegak eeke elaambirik mbareegi, Ala nen at Lot nogo abuwa mbareegerak me, akwe apuri komologwe mbere nogo inom Ala ayonggo malayikat nogo o Torom nen ineenggi pigiren endekem wumbiya nogogwaarak.

¹⁷Endekem wumbiya nogo nogogwaarik, Ala ayonggo malayikat ambi nogo nen it yorage logonet, “Kit kinoorukwak me, mbet-mbet nanip o. Nogo logonet, kinambo'me perak, kina yunggunogo na'nari wagak, kobappaga taati puk agak, eerugup o. Ata, kinom lek eerogo pinagukwak, nugwa puurom agi time aret lagi nanip o.”

¹⁸Yorage mbareegi, at Lot nen ari logonet, “Ai, nogoba o. Togop eeriyak yo'nirugun o.

¹⁹Kat nen an kayeloman obeelom eeppanege, nabuwa lombok mbake logonet nili agago ndegennake, eekendak kwe, Puurom agi time nanip o, yo'negendak ti, nda lombok me, awo nage neegak kat nen aakumi o Torom eeppiige nogo an ninom eeppanukwak me,

²⁰o tini mbuuluk koorok time nggare agan naakit nduk, kenegen pekket o. O ti mbuuluk aret kwe, op aret nagap ndarak logogin nogo lek a? Time aret, Nanip, yo'niru o.”

²¹Yoge mbareegi, at malayikat nogo nen, “Op aret o. O yagandak nogo ti, inom kani pigin lek me, yagandak nogo ti, op aret me,

²²kat time awo ari naga'lek keegak an eeriyak mbakirak nogo eeriyak meek me, mbet-mbet aret nak o,” yinuk, yoreegerak. O tini nogo ti, mbuuluk aret me, endage Towat, yogo nogogwaarak.

²³At Lot nogo o kuubondendok oonegen awo wundi wage kagak, o Towat nogome unggwi nagagerak.

²⁴Unggwi nagagerak kagak, at Aliku ALA mbogut paga nen mayu negen kani kunik omoonuk kwindagala agago ugun abera'lek me, o Torom Nggomora nogome aret wuppi wagagerak.

²⁵Wuppi wage mbareegi, o tini nggwok mbere inom, o Yoraran kobappaga inom, nippegak-wuppegak eeke logonet, aakumi inom, iri'ngga-kale'ngga inom, abok aret pup eerogo piyareegerak.

²⁶ At Lot akwe perak, mbaganit nage logonet, ena ambokan yunggunogo na'nari wagagerak paga, mayu logonak aret eerogo pereegerak.

²⁷Ko'lu o weege kagak Abarakam nogo nen Aliku ALA imbirak wone mbangge nagagim taa'nogo ari nanuk,

²⁸o Torom Nggomora inom, o Yoraran kobappaga nogome inom, ena wukkage nagagerik, o nggween paga nogome kani kunggaatak ka'luk apit eerogo pege menggi kwak, o nogome ka'luk mban apit eerogo pereegerak wukkagagerak.

²⁹At Ala nen o kobappaga tini Torom Nggomora imbirak pup eerogo inooreegerak nogo ti, o tini mbere Lot wonagagim nogo nippegak-wuppegak eeke logonet, wone Abarakam yoreegerak nogo abeke nagagerik, at Lot inom warukwak nduk, nggiginogo wumbereegerak.

³⁰At Lot o Towat nogome logorak agabiti nen apurilogwe komologwe mbere nogo inom o Towat teppunuk, puurom time lagi nogo nogogwaarik, ndoome ambime aret wonogogwaarak.

³¹Ndoome nogome aret logonet, ne ambi paga at apurilogwe komologwe mbere'ndak nogo oweeluk nen awuluk nogo yoge logonet, “Nit ninogoba abu aret anggok agaarak me, ndi, o nggween paga yime aap ambi akwe imbirak lambunggo mengga kwak, nit ninom lambuniyak kunduk lek mban me,

³²nit ninogoba paga nen nit ninanebunu wiganuwak nduk, anggur amburu wogoromonggoorak nengge logomenggerik, iniki lek aremenggerak paga ninom nogo yuwok o.”

³³Yogo nogogwaarik, oonikiya paga inogoba anggur amburu toologo wogoreegwaarak nengge nagagerik, iniki lek agagerak paga, apuluk manggu imbirak nogo yereegwaarak. Imbirak nogo yugu nogogwaarik, apuluk mi'na'nuk nagagerak nogo at Lot kobak aret wonagagerak.

³⁴Ndi, ko'lu oweeluk nogo nen awuluk yoge, “Nit ninogoba paga nen aret ninanebunu wiganggolaawok nduk, kii'me oonikiya an nimbirak nogo yigirak me, yogondak oonikiya kat kimbirak nogo yenok nduk, amburu nogo ambinom toologo wogoruwok o.” Yinuk,

³⁵anggur amburu ambinom aret toologo wogoreegwaarak nengge nagagerik, at Lot nogo iniki abu lek a'nuk oonikiya at apuluk peebi mendek nogo imbirak aret nogo yereegwaarak. Imbirak nogo yugu nogogwaarik, apuluk mi'na'nuk nagagerak nogo at Lot kobak aret wonagagerak.

³⁶Inogoba inom ti eereegwaarak paga at apurilogwe komologwe nogo imbirak inabila ogogwaarak.

³⁷Inabila ogo nogogwaarik, at kolaga oweeluk nogo aagaluk wulaga ndareegerak endage Mowap tooneegerak. It Mowap mendek wigannogogwaarak yogondak wonogwe nogo it inombo at Mowap aret o.

³⁸Ndi, at kolaga awuluk nogo kunduk aagaluk wulaga ndake nagagerik, endage Mben-Ami aret tooneegerak. It aakumi Amon mendek wigannogogwaarak yogondak wonogwe nogo it inombo at Mben-Ami aret o.