Read Western Dani Wakkagagerak 2 Bible Online

Wakkagagerak 2 - Western Dani bible

Wakkagagerak 2

¹Ti eeppege nagagerik, mbogut inom, nggween inom, yi mendek ndi mendek abu tigitogon aret wakkagagerak nogo ti aret.

² Wakkage nagagerik, at Ala nen, “Yi mendek ndi mendek abu aret wakkagarak me,” yinuk, ne ambi 7 paga tat yonggonggolage puk aret wonagagerak.

³At Ala nen yi mendek ndi mendek abok aret wakkage nagagerik, ne ambi 7 paga tat yonggonggolage puk wonagagerak me, ne ti nogo at ale'nggen mbake logonet, ake leenogo pateegerak.

⁴At Ala nen yi mendek ndi mendek abok tigitogon wakkagagerak wone nogo ti aret o. At Aliku Ala nen mbogut-nggween wakkagagerak ti eyom paga

⁵o nggween paga igale inagarip lagit nage, iri'ngga-kale'ngga awo mbilangge, ndi, aakumi kunduk ineebe wonogwe lek me, yabu waganggwi, eeka'lek aret wonogogwaarak. Ndi, ti eyom paga at Aliku Ala nen mayu wurabi waga'lek kagak kwe,

⁶nggween aagi lagangge logonet, ti paga nggween abok aret miin arit nage nagagerak.

⁷Ti'nuk, peebi at Aliku Ala nen nggween mbuuluk ambi nggalenogo wagangge nagagerik, aap aret ogobakkigirogo punuk, at eenik nogo ogobak me pu eerogo mambege mbareegi, aap nogo eenik a'nuk oone warak aret agagerak.

⁸Nogo eeppege nagagerik, at Aliku Ala nen o Eren oonegen wundi wage menggim pa'nggwe time yi mendek ndi mendek abok aret yarogo punuk, aap ogobakkigireegerak nogo waganogo time aret pereegerak.

⁹ Pege nagagerik, at Aliku Ala nen, “Yi eyo ndi eyo abu obeelom eyoonggen-kalenggen ombat abe yit nage kenok, nonggo logowak o,” yinuk, igale awi abok aret mbilanogo wundit nawak nduk, eereegerak. Ndi, igale wundit nagagerak enggela'me oolo time eyo ambi ineenik aganaka inom, eyo ambi maluk-obeelom ineenu agak inom, laganeegerak.

¹⁰Ndi, o Eren yabume nggween amburu warak arit nage logowak nduk, niyo eneeri ambit time nen wundeegerak me, o Eren niyo nogo elaganggen alitik-alitak 4 kuli kinogo nagabit nagagerak.

¹¹Niyo elaganggen aa'nduk kinogo nappereegerak endage Pitom aret. Niyo Pitom nogo o Kawila pa'nggwe time abok aret aanunggut yelok-nggolok nage menggerak. Ndi, nage menggim o Kawila nogome mbuti emas wonage.

¹²Ndi, mbuti emas nogo ti, abu obeelom mendek aret. Kundali amburu negen obari warak mendek inom, yugum kiritoperat etenggen lombok eraabin pera ari inom, time wonage.

¹³Ndi, niyo elaganggen ambi kinogo nappereegerak nogo ti, endage Nggikon aret. Niyo Nggikon nogo o Kuti time abok aret yelok-nggolok nage menggerak.

¹⁴Ndi, niyo elaganggen ambi kinogo nappereegerak nogo endage Tigirit aret. Niyo Tigirit nogo ti, o Atiyut ambo'me oonegen wundi wage menggim pa'nggwe time aret nage menggerak. Ndi, niyo elaganggen ambi kinogo nappereegerak nogo endage Eparat aret.

¹⁵Ti'nuk, at Aliku Ala nen aap nogo awi yarak arum logonet, yabu eerit nage logowak nduk, o Eren nogome aret pereegerak.

¹⁶Pege nagagerik, at Aliku Ala nen aap nogo yoge logonet, “Eyoonggen-kalenggen yabume yime yarak wonage nogo ti, abok aret kat nen mbanogo nenet nage logorak op aret kwe,

¹⁷eyo maluk-obeelom ineenu agak anggen yugu ti perak, kat nen ambi noorak abu mage o. Mbanogo namunggun kenok, awo nengge ti eyom paga aret kambumunggun o,” yoreegerak.

¹⁸Yoge nagagerik, at Aliku Ala nen ari logonet, “At aap yi, alik mban logorak ti, meek aret me, ore yeenggwaage logorak at ndak-ndak kero ambi ogobakkigirikit o,” yereegerak.

¹⁹Ari nagagerik, at Aliku Ala nen nggween ambi nggalenogo wagangge nagagerik, yi mendek ndi mendek nggween paga nugu menggaarak inigen mbolok kwi inigen mbolok lek inom, yirowe-ndirowe wiga agan nugu menggaarak inom, abok aret ogobakkigirogo pereegerak nogo, “At ari kenok, inendage ti aret ariyak me, inendage ngge toongge kaamun?” yinuk, wogoren aap Aram nogo owagam piya wagagerak.

²⁰Piya wage mbareegi, aap Aram nogo nen yi mendek ndi mendek inigen mbolok lek anebunu lombok inom, yirowe-ndirowe wiga agan nugu menggaarak inom, yi mendek ndi mendek inigen mbolok kwi anebunu lombok inom, abok aret inendage inalitak lombok toonogo piyareegerak. Toonogo piinet nagagerak op aret wonogogwaarak kwe, aap Aram perak, ore yeenggwaage logorak at ndak-ndak ambi lek aret kagagerak.

²¹Kage nagagerik, at Aliku Ala nen aap Aram nogo, nogo yippereegerak nogo nggaruk yereegerak kagak, eebenowak ambi nggiginogo wumbi wage nagagerik, obaane'me enggaanggum paga kagaarogo pereegerak.

²²Kagaarogo pege nagagerik, eebenowak nggigineegerak nogo paga kwe aret ogobakkigirogo punuk, wonok aap nogo wogoreegerak.

²³Wogoge mbareegi, at aap Aram nogo nen ari logonet, “At eebe ti, aap eebenowak mendek aret me, At eebenowak ti, an neebenowak aret. Ndi, at enggaanggum ti, an nenggaanggum aret. Togop me, at endage ti, Kwe, yogo logorak o,” yinuk, yereegerak.

²⁴ Kwe nogo ti aap paga wogo me, aap nen agalo-ogoba mbo piinok, akweeluk imbirak ambit a'nuk, it imbirak ineebe mbere kwe, ambit aret logogun o.

²⁵Ndi, kwe inom, aap inom, it imbirak tali lek kebeewak lek logonet kwe, inenggali lek aret wonogogwaarak.