Read Western Dani Wakkagagerak 23 Bible Online

Wakkagagerak 23 - Western Dani bible

Wakkagagerak 23

¹At kwe Tara eenik wonage kagak, tahun seratus dua puluh tujuh eeke nagagerik,

²o Kanan yaga'lelo Kiriyat-Araba, endage ambi Keboron, nogome nen aret kambeegerak. Kangge mbareegi, at Abarakam nogo, “Nakwe kanggerak o,” yinuk, iniki puru agan ale yereegerak.

³Le ari nagagerik, at akwe kambeegerak nogo owak wurik porogo iigak at Abarakam nogo it aakumi Ket mendek yorage logonet,

⁴ “An aap alik mendek nggiru wagarak kinenggela'me ninom wonage neegak, nakwe kanggerak me, an nakwe pege, ndi, an mendek kanggwi iinok piigwi, eeko logorak me, kinanggween ambi onggo mbanikit nduk, yo'ninip o.”

⁵Yorage mbareegi, it aakumi Ket mendek nen at yogo logonet,

⁶“Ninogoba wae. Nit wone ambi yokkugwi niigak, kat konengge logot o. Kat ti, aap kendagembogut ninenggela'me wonage menggendak me, kakwe kanggerak ndoome puurak nogo ti, nit ninando nendaarak ambi abe kenok miiru o. Kat kakwe mambuurak nogo nit ambi nen ninando nendaarak ili yugun abu lek aret o, ninogoba.”

⁷Ti yogo mbareegwa, at Abarakam nen mi'nage nagagerik, it aakumi Ket mendek o time menggaarak nogo inabu'me tebe yinuk,

⁸yorage logonet, “An nakwe kanggerak ti, o yime ndo nendaarak me mambuurak op mbakotak kenok, ari neegak, konenggo logonip o. Aap Eporon Tokat aput nogo,

⁹at yabu eeke menggim irip me at ando nendaarak endage Makepela nogo aret an wo'niriyak nduk, nake nen at yo'nip o. Kit kinenggela'me it an mendek kanggwi iinok, piigak yuurak unde arikit nduk, wo'nugwi kiinok, onggo ndak-ndak aret wogorikit nen yo'nip o,” yoragagerak.

¹⁰At aap Ket mendek endage Eporon nogo, oreewi inom kwi'ndak wonage me, Abarakam yoragagerak nogo konengge nagagerik, it aakumi Ket mendek o tinime tu unggwogo menggam kuwak ogogwaarak nogo abok konenggwi iigak, Abarakam yoge logonet,

¹¹“Lek o, nogoba. An noone ambi yokkege yi, konengge logot o. Nowe-nawot yi kuwak eekaarak abok aret inenggaanom paga nen kakwe kanggerak ndoome mambenok nduk, neyabu eeke minggim irip me nando nendaarak yagandak nogo inom abok aret wokkigi o.”

¹²Yoge mbareegi, at Abarakam nen it aakumi o time menggaarak kuwak eereegwaarak nogo inabu'me tebe yinuk, keyage waganake nagagerik,

¹³inaruk konenggwi iigak, aap Eporon nogo yoge logonet, “Nore o. Wo'niriyak mbakendak kenok, an wone ambi yokkege me, karuk konenu o. Nggween onggo punuk nen nakwe kanggerak ndoome mambuurak mbakirak me, onggo wokkege yi wamen o.”

¹⁴Yoge mbareegi, at Eporon nen Abarakam yoge logonet,

¹⁵“Nogoba o. An yokkege yi konenu o. Nggween yi onggo ti, wu mbuti perak empat ratus negen pogo menggaarak kwe, ti paga nen nit ambi eekkoloorak lek me, kakwe kanggerak ti we aret ndoome pu o.”

¹⁶Yoge mbareegi, onggo puurak yereegerak nogo ti, at Abarakam nen, “Op aret,” mbake nagagerik, wu mbuti perak empat ratus yereegerak nogo, yi mendek ndi mendek kuniyak nduk, aaninggin wakkogo mengga kwak, aaninggin liirogon wakkage nagagerik, aakumi apit kuwak ogogwaarak inenggaanom paga at Eporon nogo wogoreegerak.

¹⁷At Eporon yabu eeke menggim o Makepela o Mamere oonegen lagi wage menggim pa'nggwe wonage nogo nggween inom, ndo nendaarak inom, eyo kale yabu eeke menggim kuli paga wonage nogo inom, abok aret

¹⁸at Abarakam unde logowak nduk, it aakumi Ket mendek wone mbanggo menggam kuwak eereegwaarak nogo inenggaanom paga onggo pege mbareegi, nggween nogo apit aret wogoreegwaarak.

¹⁹Wogogo mbareegwa, nggween Kanan o Keboron oonegen wundi wage menggim o Mamere pa'nggwe ndo nendaarak Makepela nogome aret Abarakam nen akwe Tara nogo mambereegerak.

²⁰It aakumi Ket mendek nogo nen yabu yarak inom, ndo nendaarak irip paga wonage nogo inom, Abarakam wogogo mbareegwa, aakumi at mendek kanggwi iinok, piigo logorak nduk, Abarakam unde eekkolagagerak wone nogo ti aret.