Read Western Dani Wakkagagerak 25 Bible Online

Wakkagagerak 25 - Western Dani bible

Wakkagagerak 25

¹Ti'nuk peebi at Abarakam nogo kwe ambi endage Ketura waganeegerak.

²Wagangge mbareegi, at kwe Ketura nogo nen Abarakam obaane'me aagalogwe inendage Timaran, Yokatan, Meran, Miriyan, Itibak, Tuwa, aret ndaganabeegerak.

³At Yokatan nen apuri Tiyeba Nderan imbirak ndaganabeegerak me, at Nderan nen wiganak inanebunu ti, Atiyut mendek, Letuti mendek, Lewum mendek, aret wiganogo piyareegerak.

⁴Ndi, aap Miriyan apuri ndaganabeegerak nogo ti, Epa, Epet, Kenok, Abira, Elara. It ndarak yi abok aret kwe Ketura nen aret wiganogo piyareegerak.

⁵At Abarakam apuri wiganak ineebe ambik aret wonogwe iigak, eyate amindik-amendek abok aret Itak mban wogoreegerak kwe,

⁶at kangga'lek awo eenik logonet, it kumi ando wogonabeegerak inaagalogwe aap kenok, inabuwa nen amendek ambitak tumburirage nagagerik, Itak inom lambunik wonogwe iyo nduk, o Kanan oonegen wundi wage menggim pa'nggwe o nda time nappiyareegerak.

⁷At Abarakam nogo nda'nagagerak kagak tahun seratus tujuh puluh lima eeke nagagerik,

⁸abu anggok a'nuk kenen mbanogo li a'nuk aret kambeegerak. Kangge nagagerik, ombomini kambunuk nogogwam nggwogoba wonogwe me nogome aret iya nagagerak.

⁹Ndi, at apuri Itak Itamayen imbirak nen at eebe nogo waganogo at Abarakam nen aakumi Ket mendek inanggween onggo mbaneegim aap Tokat aput Ket mendek endage Eporon o Mamere korotok eyabu yarak me ndo endage Makepela akwe Tara mambereegwam nogome aret imbirak mambereegwaarak.

¹¹Ndi, at Abarakam nogo kangge mbareegi, apuluk Itak nogo niyo nggween kabunik me endage, At Itok Menggerak Nen Enegen Liippaneegim, tooneegwam nogome aret wonage me, at Ala nen ale'nggen oba pege nagagerak.

¹²Kwe Tara ayeloman Agat awi Metit mendek nogo nen Abarakam obaane'me apuluk Itamayen ndareegerak nogo apuri wigannogogwaarak inendage yi aret.

¹³At Itamayen apuri ndarak ndak-ndak aret inendage yi o. Itamayen apuluk manggu ndareegerak endage Nebayot. Ti'nuk ambo'me Kerat, Areben, Mibatam,

¹⁴Mitiyama, Nduma, Mata,

¹⁵Karat, Tema, Yitut, Napiti, Kerama, aret ndaganabeegerak.

¹⁶Aap Itamayen apuri wiganak ti aret. Ndi, inendage toonak nogo ti, inalitak lombok inawooliya wukkologwe, inawi yaga'lelo nagakkologwe, eeppunuk, wonogo menggam endage toonak ndak-ndak inendagembogut 12 aret ogogwaarak.

¹⁷At Itamayen nda'nagagerak kagak tahun seratus tiga puluh tujuh eeke nagagerik, anggok aret a'nuk kangge nagagerik,

¹⁸at ombomini kambunuk nogogwam nggwogoba wonogwe me nogome iya nagagerak. Ndi, at apuri wiganak nogo perak, o Atiyut nogo menggam o Kawila iru nakkagak, o Tiyut ogwe nakkagak, oonegen lagi wage menggim pa'nggwe o Metit koorok kagak, oolo time aret ye mbanggologogwaarak. Nogome wonogo logonet, inoreewi ando inom lambungga'lek it inalik eenggi mbanak ogoorak aret wonogogwaarak.

¹⁹At Abarakam aput Itak nogo nen eereegerak wone yi o. Abarakam nen aput Itak aret ndareegerak.

²⁰At Itak nogo ndarak kagak tahun 40 age nagagerik, aap Aram awi Paran-Aram mendek endage Mbetuwen apuluk Laban awuluk kwe Iribaka nogo aret waganeegerak.

²¹Wagangge nagagerik, akwe Iribaka nogo aagaluk ndaka'lek mbareegi, at Itak nen akweeluk ake tamban eeke mbareegi, at Aliku ALA aruk konengge kagak, kwe Iribaka nogo aret abila agagerak.

²²Abila agagerak nogo, elege kulu'mbere aret me, imbirak inagalo inikime logonet, nobogom-kobogom yogwe iinok, at Iribaka nen ari logonet, “Nonggop togon ee'nake agaarik o?” yinuk, Aliku ALA nggino yoreegerak.

²³ Nggino yoge mbareegi, at Aliku ALA nen wone onggo yoge logonet, “Aakumi inanebunu mbere aret kinikime wonage o. Inanebunu mbere nda'nogo logomenggaarik, Imbirak ogoorak logonet, anebunu ambi omaawi ambik. Ndi, ambi omaawi lek logonet, awuluk nogo nen oweeluk nogo ayeloman eeppunuk, logogin o,” yoreegerak.

²⁴Ndi, at kwe Iribaka nogo elege nda'nariyak eyom abu aret enegen pagak ari mbareegi, aap kulu'mbere aret nda'nogo logonet,

²⁵at aa'nduk nda'nagagerak nogo, omoori paga tari wu aago nda'nagagerak nogo endage Etawu tooneegwaarak.

²⁶Ndi, at peebi nda'nagagerak nogo, nda'nanok wangge logonet, at Etawu iyok unggut eenggi omaawi pugu aret nda'nagagerak paga endage Yakup aret tooneegwaarak. At Itak nogo ndarak kagak, tahun 60 eereegerak paga at apuri ti nda'nogogwaarak.

²⁷It wologwe nogo imbirak abu aret tawe ogo nogogwaarik, at Etawu nogo kulinik-kalinik eyonggaame mban nege logonet, towe-pagi eenggi tobo mban wake nagagerak kwe, at Yakup nogo perak, iniki kwi'ndak oome yabu mban eeke wonagagerak.

²⁸It inogoba Itak nogo ti, towe-pagi enggaanggum nengge inikilom me, Etawu iniki kunik eeke kagak, inagalo Iribaka nen perak, aagaluk Yakup iniki kunik eeke nagagerak.

²⁹Ne ambi paga at Yakup nogo awo kela anggen lappunuk wonage me, at Etawu nogo eyonggaame pagi warit nege nagagerik, mbi abu ambik eeke mbareegi, wage nagagerik,

³⁰at Yakup yoge logonet, “An mbi abu mondok meek ee'nake me, kela anggen laambu lakendak ti, ambi wo'niru o,” yoreegerak. Ti yoreegerak paga at endage, “Erom,” yogo nogogwaarak.

³¹Yoge mbareegi, at Yakup nen ari logonet, “Manggu ndarak kenok, wone kilirirogo menggaarak kat kilikkiriyak nogo, an kili'niruwak nduk onggo yi wokkiri o.”

³²Yoge mbareegi, at Etawu nen ari logonet, “Mbi abu nen abu kambuurak ee'nake me, wone ti paga nen an nano eekkoloorak? Lek me, kat aret kilikkiruwak nduk, mbi ti wo'niru o.”

³³ Yoge mbareegi, at Yakup nen, “Abet aret yagi o, yinuk, kumbuk mbanogo aa'nduk yo'niru o.” Yoge mbareegi, at Etawu nen, “Abet aret yagi o,” yinuk, kumbuk mbambege nagagerik, manggu ndarak kenok, wone kilirirogo menggaarak nogo aret Yakup kiliriruwak nduk, “E o,” yereegerak.

³⁴“E o,” ari mbareegi, at Yakup nen oroti worareegerak inom, kela anggen lareegerak nogo inom, waganogo Etawu wogoreegerak. Wogoge mbareegi, at Etawu nogo mbi nengge, niyo nengge, eeke nagagerik, nagagerak. Ndi, at Etawu nen manggu ndarak kenok wone at kiliririyak nogo kwe, “Yi iya lek o,” mba'nuk, awuluk wogoreegerak wone nogo ti aret.