Read Western Dani Wakkagagerak 26 Bible Online

Wakkagagerak 26 - Western Dani bible

Wakkagagerak 26

¹Ne ambi paga o nogome mbi noogelo o maan at Abarakam wonage kagak eereegerak nogo ndak-ndak aret agagerak. Age mbareegi, at Itak nogo aap Pilitin inowe endagembogut Abimelek unde menggim o Nggerat nogome nagagerak.

²Nage nagagerik, o Metit naakit nduk eeke me, at Aliku ALA nen Itak owagam wage nagagerik, yoge logonet, “O Metit time nagun o. Ata, an nen o logorak yokkege neenok, time aret logomunggun o.

³ Nggween yi abok aret wokkirigin o, yinuk, kumbuk mbanogo kogoba Abarakam yoreegirak nogo a'me lik yuwak nduk, kat kapuri ndaganabemenggendak kinom wokkiraagin me, kat aap nggiru negen yime aret logot o. Wonage keegak, an nimbirak aret logonet, nale'nggen koba pagage logogin o.

⁴An nen kat kapuri-kombowologwe ti, laaluguragan mbogut paga ambik wonage ti pogom, ambik agago wokkege, ndi, o yime taganak abok aret it unde eeppunuk logowak nduk, wogorage, eerigin o. At Abarakam nogo nen an wone ari minggirak inom, Yogop ee'nu ndogop ee'nu, wone yugu inom, wone lengganak inom, Yogop eeriyak ndogop eeriyak mage wone yugu inom, mondok liippunuk, yanggonak mban eeke nagagerak me, kit ndak-ndak eekwi paga it yi aakumi ndi aakumi o nggween paga yime menggaarak abok aret inale'nggen mbako logogun o,” yoreegerak.

⁶Yoge mbareegi, at Itak nogo o Nggerat time aret puk agagerak.

⁷ Time wonage me, it aap o Nggerat mendek nen at Itak yogo logonet, “Kwe kimbirak wagandak ti ta o?” Yogo mbareegwa, akwe Iribaka nogo abu obeelom kigirikwe lombok me, “Eebe ndinggo logonet, an nookwi iyo,” mba'nuk, agabiti nen, “An nakwe o,” yuulik, ata, “Yi nawuluk o,” yoragagerak o.

⁸Nogo yorage nagagerik, logonuk negen ne ambi paga at aap endagembogut Abimelek nogo yendela mbanak me nen at Itak Iribaka imbirak wonogwe paga at akwe aret yelok iige nagagerik,

⁹Itak wiireegerak wage mbareegi, yoge logonet, “Kwe Iribaka yi, kat kakwe aret kagak, nonggop nduk, Nakwe lek nawuluk, yagandak?” Yoge mbareegi, at Itak nen, “Lek o. An nakwe o, ari neenok, nooko logonet, nakwe ndinukwak, mba'nuk, Nawuluk, yagarak o.”

¹⁰Yoge mbareegi, at Abimelek nen, “Kat nonggop eeppinanikit nduk, ti yagandak? Yi abet aret an nawuluk yigi, nduk, an nawuri ambi nen kat kakwe kagak waganogo imbirak nogo yenetak nen, kat nen aret nit maluk eerogo pinaninetak kagi o.”

¹¹Yoge nagagerik, at Abimelek nen awuri abok aret inaruk wake logonet, “Kit ambi nen aap Itak akwe imbirak yi, maluk ambi eeppiigwi kiinok, at mondok wariyak aret o,” yinuk, yoragagerak.

¹²Ndi, at Itak nogo it inom nogome aret wonage logonet, yi mendek ndi mendek yarit nage logonet, “Ero ambit nen anggen ambiret mbanggolaagin,” mba'nuk, yareegerak kwe, at Aliku ALA ale'nggen oba pege me, ero ambit paga anggen ambik 100 negen aret yege me,

¹³at amindik-amendek mondok iya negen wiganggo'net wundi wage logonet, aap nggwok mondok eenggi warak aret agagerak.

¹⁴At aanggumi ndomba inom, lembu inom, ayeloman mini inom, amindik-amendek alik negen unde wonage mbareegi, it aakumi Pilitin mendek nen inigen kenok, “Nit ambi wo'niraga'lek eeke yi, ao,” yinuk, inanini ombako nogogwaarak.

¹⁵It inanini ombako nogogwaarik, niyo nonggo logorak nduk, at ogoba Abarakam eenik kagak ayeloman mini nen nggween kabuneegwaarak nogo aret kagaarogo pit nogogwaarak.

¹⁶Ti eeko mbareegwa, at Abimelek nen Itak yoge logonet, “Kat komaawi ambik wonage togoti nit ndak-ndak lek me, ninom lambunik logorak lek mbo pinaninuk, o alik me nak o.”

¹⁷Yoge mbareegi, at Itak nogo o nogome teppunuk, tayorogon o Nggerat kobappaga time aret nage nagagerik, ooliya wuppunuk wonagagerak.

¹⁸Nogome wonage logonet, niyo nenggak yuurak nduk, maan aa'nduk Abarakam eenik logonet, nggween kabunit nagagerak kwe, at eebe kangge mbareegi, it Pilitin mendek nen kagaarogo pit nogogwaarak nogo, pilanogo wunake nagagerik, ogoba Abarakam nen endage tooneegerak nogo ndak-ndak aret tooneegerak.

¹⁹Toombunuk, o nogome logonet, at Itak ayeloman mini nen niyo nonggo logowok nduk, kobappaga time nggween ambi kabuneegwaarak me, niyo eneeri ambik kila-kila lagit wage logonet, nggwok aret yenggeneegerak.

²⁰Nggwok aret yenggeneegerak kwe, it aap o Nggerat kambin-ndomba ndegeninako menggaarak mendek nen at Itak ayeloman mini nogo inom wone wako logonet, “Niyo yi ti, nit ninaniyo,” yinuk, nili-kili wone wareegwaarak me, at Itak nen niyo nggween kabunik nogo endage, “Ili Wone Wareegwam o,” yinuk, tooneegerak.

²¹Ti'nuk, peebi nen at ayeloman mini nen niyo nonggo logorak nggween alik ambi kabuneegwaarak kwe, togop aret ili nen inom wone wappogo nogogwaarik, at Itak nogo nen niyo nogo endage, “Ogookkologogwam o,” yinuk, tooneegerak.

²²Toongge nagagerik, o nogome nen wo'narok o alik ambime nogo nogogwaarik time logonet, nggween alik ambi kabuneegwaarak kwe, ili wone waka'lek mbareegwa, at Itak nen, “O yime Ala nen tenak eerogo pinaneegerak me, ninapuri nggwok aret wiganugun kagi o,” yinuk, niyo kabuneegwaarak nogo endage, “Wone Lek Op Menggim o,” yinuk, tooneegerak.

²³Ti'nuk peebi nen, o nogome teppunuk, o Mberetiyeba aret nagagerak.

²⁴Nage nagagerik, oonikiya nogo yege me, at Aliku ALA at owagam wage nagagerik, yoge logonet, “Kat kogoba Abarakam ogoba Ala an aret o. An mondok-mondok karum wonage, ndi, nale'nggen koba pagage logonet, nayeloman Abarakam wone abuk nggaruk togon yoreegirak nogo ndak-ndak kat kapuri-kombowologwe ambik aret wiganogo piige, eerigin me, kagabiti mbarugun o.”

²⁵Yoge mbareegi, at Itak nen o taa'nogo at Aliku ALA ake warogo kani kunikit nduk, yugum logonogo punuk, ndomba warogo Aliku ALA endage kunogo tamban eereegerak. Ndi, o nogome inawooliya wuppatinuk wonogo logonet, at ayeloman mini nogo nen niyo nonggo logorak nduk, nggween ambi kabuneegwaarak.

²⁶At Itak nogome wonage me, ne ambi paga at Abimelek nogo awuri mbere, ambi wone eyak wappegak endage Akutat, ndi, ambi aap yigin unde inowe endage Pikon, imbirak Abimelek inom o Nggerat nen at Itak wonage me ka wogogwaarak.

²⁷Ka wogo mbareegwa, at Itak nen it yorage, “Aa'nduk nen, Ninom logorak nineebi, nomba'nuk, kiname nen mugogo wumbani wogogutak kwe, nonggop agaarak kenok, yogondak neya wogop o?”

²⁸Yorage mbareegi, it nen yogo logonet, “At Aliku ALA nen karum obeelom togon wonage nogo ninigen keego nogoorik, nit mban-mban yogo logonet, Aa'nduk taati aret, Ndogop eeko logowok o, yinuk, ninom wone abuk nggaruk togon kooneegubok eereegurak kogo, yinuk, kat ninom koonuwok nduk, keya wogoorak me, ndi, Aliku ALA kimbirak wonage logonet, yogondak ale'nggen koba pagage me, kat ninom wonogo logonet, nit nen maluk ambi eeppaga'lek obeelom aret eeppagagwi, ndi, niniki obeelom paga nappinagagwi, eereegurak nogo ndak-ndak kat nen, An kunduk maluk eeppiiga'lek obeelom eeppiige logogin o, yinuk, wone abuk nggaruk togon aret yo'niret o,” yinuk, yoreegwaarak.

³⁰Yogo nogogwaarik, at Itak nen inabugo lareegerak niyo inom, mbi inom, nonggo nogogwaarik,

³¹inom nogo yinuk, ko'lu kuubondendok nen, “Yogop aret eeko logogun o,” yinuk, it abok nen kumbuk mbambogo nogogwaarik, at Itak nen, “Noreewi, kiname nanip o,” yorage mbareegi, keyage warogo punuk, iniki abe paga aret iname nogogwaarak.

³² Ne ti eyom paga at Itak ayeloman mini nen niyo nonggo logorak nggween ambi kabumbogo nogogwaarik, “Niyo eneeri ambi maan kwaakkogoorak o,” yinuk, at Itak yori wogo mbareegwa,

³³at Itak nen niyo nggween kabunik endage Tiyeba aret tooneegerak. Ti eereegwaarak kenok, o yaga'lelo nogo endage, “Mberetiyeba,” yinuk, yogwe wonogwe o.

³⁴At Etawu nogo nda'nagagerak kagak tahun 40 eeke nagagerik, kumi mbere ambi aap Ket mendek endage Mbeeri apuluk kolaga Yurit wagangge, ndi, ambi aap Ket mendek endage Elon apuluk kolaga Mbatamat wagangge, eereegerak.

³⁵It kumi mbere ti, eekwi paga Itak Iribaka imbirak iniki wakkologo nogogwaarak.