Read Western Dani Wakkagagerak 27 Bible Online

Wakkagagerak 27 - Western Dani bible

Wakkagagerak 27

¹At Itak nogo abu aret anggok age nagagerik, enegen ogut agagerak logonet, at aput manggu Etawu nogo wiireegerak wage mbareegi, yoge logonet, “Naput Etawu wae.” Yoge mbareegi, “Yu o, nogoba.”

²Yoge mbareegi, at Itak nen yoge logonet, “An yogondak abu aret nanggok agarak o. Ndi, Ndiyom paga kambuurak, an neenggo'lek aret me,

³kangga'lek awo neenik wonage logonet, nawone kilirogo koba pagarak me, an noorak ninikilom mbake ndak-ndak keenggi amburu ndik-ndik larogo wo'niri woraanok nduk, kat towe-pagi wake menggendak keegin-komaale yogondak li'luk eekko'nok, eyonggaame an nake ambi mbet wari nak o,” yoreegerak.

⁴

⁵Yoge mbareegi, at Etawu towe-pagi wa'nuk wogori woraawak nduk, eyonggaame kwaari nage kagak, at Itak nen Etawu yoge nogo kwe Iribaka aruk konengge nagagerik,

⁶at aagaluk Yakup nogo wiireegerak wage mbareegi, yoge logonet, “At Itak nen koweeluk Etawu yoge logonet, An kangga'lek awo neenik wonage logonet, at Aliku ALA enggaanom paga nawone kilirogo koba pagarak nduk, an noorak towe-pagi ambi keenggi amburu ndik-ndik larogo an wo'niri woro, yoge yogondak iluk naruk konenggirak me,

⁷

⁸naagaluk o. An kagalo mbakirak ambi yokkege neenok ti aret eeru o.”

⁹Yoge nagagerik, “Kat kogoba noorak inikilom mbake nogo ndak-ndak neenggi amburu lake neenok, kat kaa'nduk kogoba wogori namenggendak nengge logomenggerik, at awo kangga'lek eenik wonage logonet, awone inikime wonage nogo kilikkiruwak nduk, kat nen ninaanggumi kambin-ndomba wonogwe me, nage logomenggendik, kambin aagalogwe mbere'ndak, Amok tigiluk yi kagi, mba'nuk, imbirak wogoren wo'niri mok o.”

¹⁰

¹¹Yoreegerak kwe, at Yakup nen ari logonet, “Nagalo, ti yo'negendak op aret kwe, at noweeluk Etawu ti, omoori wu aago kagak, an nomoori lek me,

¹²nogoba owagam nage neenok, eenggi pi'nake logomenggerik, nomoori lek kenok, Nambokan lagangge o, mba'nuk, awone kili'nirigin lek pulunogo aret panigin kagi.”

¹³Yoge mbareegi, at agalo nen yoge logonet, “Naagaluk o. Kat pulunogo pagage kenok ti, an kagalo nobaalombok nen kaagin me, kambin yokkigirak nogo aret wa nak o.”

¹⁴Yoge mbareegi, Yakup nogo nage nagagerik, kambin nogo aret wonok agalo wogori wage mbareegi, at Iribaka nen ogoba noorak inikilom mbake nogo ndak-ndak eenggi amburu agago lareegerak.

¹⁵Larogo pege nagagerik, oweeluk Etawu ambogoyum obeelom mendek nggerenogo oome pereegerak nogo waganogo awuluk Yakup nogo yippege,

¹⁶kambin agabolo mbelanak nogo obaak paga nggerembege, enggaanok me amoori lek kenok nabembege,

¹⁷eerogo pege nagagerik, oroti worareegerak inom, kambin eenggi amburu lareegerak inom, “Kogoba wogori nak o,” yinuk, wogoreegerak.

¹⁸Wogoge mbareegi, wonok at ogoba wonage me owagam taati panggo yi nage nagagerik, yoge logonet, “Koba wae.” Yoge mbareegi, at ogoba nen, “Napuluk o. Kat ta nen yagan o?”

¹⁹Yoge mbareegi, at Yakup nen ari logonet, “An kat kaput aa'nduk ndarak Etawu nogo aret o. Kat nen yo'negendak nogo kawone kili'nenok nduk, mi'nage logomenggendik, pagi la'nuk wagarak yi, namen o.”

²⁰Yoge mbareegi, at Itak nen ari logonet, “Naput wae. Kat nonggoti eerogo mbet-mbet aret warogo la'nuk wagan o?” Yoge mbareegi, at Yakup nen, “At Aliku kogoba Ala nen wo'nege mbaki, mbet-mbet aret wonok wagi o.”

²¹Yoge mbareegi, at Itak nen Yakup yoge logonet, “Kat abet Etawu aret keyaamun ilik? Liippagage logonet, neenggi koba piganet naakit nduk, ya'i panggo yi mok o, napuluk.”

²²Yoge mbareegi, at Yakup nogo ogoba owagam panggo yi nage mbareegi, at Itak nen eenggi pigagangge nagagerik, ya nduk nda nduk eerit nage logonet, “Koone ti, Yakup oone negen aret kwe, komoori nen perak, Etawu omoori aret kagi o.”

²³Yoge nagagerik, at Yakup eebe liippuulik. At obaak paga oweeluk Etawu omoori kokwak mbareegi, awone kiliririkit nduk eereegerak mendek,

²⁴ambinom kin wakkage logonet, “Kat abet Etawu aret ilik?” yoge mbareegi, at Yakup nen, “Ebi, an aret o.”

²⁵Yoge mbareegi, at Itak nen, “Napuluk. An nengge logominggirik, nawone kilikkirikit nduk, la'nuk wagandak ti, wo'niri omok o.” Yoge mbareegi, at Yakup nen kambin larak inom, anggur amburu toolak inom, wogoge mbareegi,

²⁶nengge nagagerik, at Itak nen, “Naput o. Nimbirak ninagandin lambun-lambun yuwok nduk, nowagam ya'i panggo yi mok o.”

²⁷Yoge mbareegi, at Yakup nogo ogoba owagam panggo yi nage nagagerik, inagandin imbirak lambun-lambun yogo logonet, at Itak nen Yakup ayum obari wunggage nagagerik, awone kilirege logonet, “Napuluk o. Kayum obari ti, yabu yarak ambi at Aliku ALA nen Obeelom eeppegetak obari obeelom kogo mengga kwak Aret keegi o.

²⁸Kogoba Ala nen miin anggen mbogut paga nen wokkege, O nggween mili lubuk eerogo pagage, Kombato inom, anggur amburu inom, Alik negen kalo logonogo wokkege, Eerigin o.

²⁹ Ndi, yi aakumi ndi aakumi inanebunu lombok abok aret kayeloman ogwe, Yi aap ndi aap nen kat kabu'me mban tebe yinuk, kayuk wukwi, Kowe-kawot inenggela'me inowe aret mi'nage, Ndi, kagalo iriwi nen kat kabu'me mban tebe yogwe, Eekwi iigak, It aakumi nen kat pulunogo pagagwi iinok, it kunduk pulunik aret ogwe, Ndi, it aakumi nen inale'nggen koba pagagwi iinok, it togon inale'nggen inoba aret wonogwe, Eeke logogin o,” yinuk, yoreegerak.

³⁰At Itak nen awone kilirogo Yakup wogoge mbareegi, ko'nok awo wungge kagak, oweeluk Etawu nogo eyonggaame pagi warit nege nagagerik, wagagerak.

³¹Ndi, at togon togop aret pagi eenggi amburu eerogo lake nagagerik, wonok at ogoba iri wage logonet, “Koba wae. Kawone kinikime wonage nogo kili'nenok nduk, an pagi kake la'nuk wonok wagarak yi, mi'nage logomenggendik, waganogo namen o.”

³²Yoge mbareegi, at Itak nen, “Wulaga! Kat ta nen yo'negen o?” Yoge mbareegi, at Etawu nen, “An kat kapuluk aa'nduk ndarak Etawu nogo nen aret yokkigi o.”

³³Yoge mbareegi, at Itak nogo ogut na'nuk, aganak apit nugege logonet, “Wulaga. At aa'nduk an nake pagi warogo la'nuk wonok niri wagaarak yi, ta nen wo'niri wagaarak o? Kat awo waga'lek keegak, at aa'nduk la'nuk wonok wo'niri wage mbaki, nengge nagarik, nawone ninikime wonage nogo abok aret kilirege mbaki, at mban patogo logorak nduk, ko'nok nagaarak o.”

³⁴At Etawu nen ogoba yoreegerak nogo aruk konembege nagagerik, at iniki aagi ambik a'nuk, le kwa kunik ari logonet, “Koba wae! An togon ambi kili'niru o.”

³⁵Yoreegerak kwe, at Itak nen ari logonet, “Kat kawuluk nen nambokan lagangge nagaarik, wone an kilikkiriyak mbakirak nogo abok ko'nok wunggerak o.”

³⁶ Yoge mbareegi, at Etawu nen, “At endage Yakup ti, mondok obam paga aret toonak kagi o. Ne mbere paga nambokan lagangge nagagerik, manggu ndarak wogorogo menggaarak nogo an wo'niriyak kwe, wonok wungge, ndi, yogondak kunduk, kawone kili'niriyak nogo at aret ko'nok nage, eekerak me, wone aligilogwe ambi wonage kero, kili'niru o, nogoba.”

³⁷Yoge mbareegi, at Itak nen, “At mondok kat kowe nagawan aret logowak nduk, mippege, at owe-awot inom, iriwi inom, abu'me piinok ayeloman logowak nduk, koonogo pege, ndi, mbato inom, anggur amburu inom, kalo logonogo wogoge, eekirak me, kat kake nano wone kwaarogo kilikkiri o, naput.”

³⁸ Yoreegerak kwe, at Etawu nogo nen ogoba yoge logonet, “Kat kawone ambit ti aret me, at mban kilirege nagandik, ari agandik ya? An togon ambiriluk ambi kili'niru ubi, nogoba!” yinuk, le nggwok yereegerak.

³⁹ Le yege mbareegi, at Itak nen yoge logonet, “O nggween paga kat menggenom yime nggween mili lubunogo pege, Mbogut paga nen miin anggen yumbunogo wuppagi wage, Eerigin lek o.

⁴⁰ Ata, keegin nogo paga aret nuurogo nengge, Ndi, kawot ayeloman aret wonage, Eeke logonet kwe, Ne ambi paga nggik-palek yemenggendak kenok perak, Aaninggin koba wonage nogo lek eerogo aret patumunggun o,” yoreegerak.

⁴¹Yoge mbareegi, at ogoba awone awuluk mban kiligereegerak paga, Etawu anini alik negen eeke nagagerik, inikime nen koongge logonet, “An nogoba yi, abu kambuurak aret eekerak me, kangge kenok, abuwa eerogo ale yippunuk nen nawuluk Yakup warikit,” mbareegerak.

⁴²At Etawu nen Yakup wariyak abok mbangge nogo Iribaka konengge nagagerik, at aagaluk peebi ndarak Yakup nogo wiireegerak wage mbareegi, yoge logonet, “Kat koweeluk Etawu ambo'me laganggendak nogo paga, anini nen, Kooriyak, ari konenggirak me,

⁴³an yokkege yi aret konembunuk eeru o, naagaluk.” Ari nagagerik, “Kat yogondak aret an noweeluk Laban o Karan wonage me time aret mbet-mbet nak o.

⁴⁴Ka namenggendak kimbirak wonage keegak, at kowe Etawu anini mbake nogo tayo ari kenok, woraanok o.

⁴⁵At anini kombake nogo lek age, ndi, eeppegendak nogo ami age, eeke kenok, woraanok nduk, wologwe ambi nappiya wage neyaamunggun o.” Ari nagagerik, ambinom yoge logonet, “Ne ambit paga naagalogwe kimbirak kinenggaawak lek ariyak ti neebi o,” yinuk, yoreegerak.

⁴⁶Yoge nagagerik, ti'nuk peebi at Iribaka nen Itak yoge logonet, “It kumi Ket mendek ti, inenggaawak paga pegiyoorak abu neebi ee'nake me, at Yakup togon togop mban kumi Ket mendek wogonabigin kenok, an neenik logorak neebi me, ineraaket nen kambigin aret o,” yoreegerak.