Read Western Dani Wakkagagerak 28 Bible Online

Wakkagagerak 28 - Western Dani bible

Wakkagagerak 28

¹Togop ari mbareegi, at Itak nen Yakup, “Omok o,” yoreegerak wage mbareegi, at Itak nen Yakup keyage wappunuk yoge logonet, “Naput. Kwe Kanan mendek ambi woorak mondok mage o,” yinuk, aruk wappege nagagerik,

² “Kat kamindik-kamendek pipuk ee'nuk, o Paran-Aram kat kagalo ogoba kombo Mbetuwen ame time nage logomenggendik, kagalo iriluk kami Laban apurilogwe mendek kenok ambi kolanu o.

³Ndi, at Omaawi Lombok Menggerak Ala nogo nen ale'nggen koba pagamenggerak paga kapuri ambik aret ndaganake, kombowologwe ambik aret wigak yogwe, eerit namenggaarak paga kat keebe ti, yi aakumi ndi aakumi inanebunu lombok wiganogo piyaamunggun o.

⁴Ala nen Abarakam wogoreegim aap nggiru negen wonage menggenom o yi, yogondak kat unde eekkolaanok nduk, at Ala nen Abarakam ale'nggen oba pege nagagerak pogom kat kombowologwe kinom kinoba pinagage logogin o,” yinuk,

⁵aruk wappege nagagerik, at Yakup nogo o Paran-Aram oweeluk Etawu imbirak inagalo Iribaka oweeluk Laban ogoba Mbetuwen aap Aram mendek ame nogome aret nappereegerak.

⁶“At Itak nen Yakup ale'nggen oba pege nagaarik, Kwe Kanan mendek ambi woorak mondok mage o. Ata, kwe o Paran-Aram mendek ambi kolanu o,” yinuk, aruk warogo nappege mbareegi, at Yakup nen agalo-ogoba inoone liirogon konembunuk o Paran-Aram nagagerak nogo at Etawu nen aruk konengge nagagerik,

⁷“At Yakup perak, agalo-ogoba inoone liirogon aret konembege nagaarik, o Paran-Aram nagaarak kagi o.”

⁸Mbake nagagerik, “Kumi Kanan mendek ti, nogoba Itak mondok eebi aret kagi,” yinuk,

⁹Itamayen wonage me nage nagagerik, Abarakam aput Itamayen apuluk endage Nebayot awuluk kolaga endage Makalat aret waganeegerak. At akuwi aa'nduk wogo iigak, peebi waganeegerak ti aret.

¹⁰At Yakup nogo o Mberetiyeba teppege nagagerik, o Karan naakit nduk aret nagagerak.

¹¹Nage logonet, o oolo taati oonegen kilu ari mbareegi, taati aret nogo yikit nduk, yugum ambi waganogo anep mbambunuk, winnagagerak.

¹²Winna'nuk nogo yege me, oonikiya abi kage logonet, ya'na ambi nggorek abo ogu nggween paga nen nok, irip agi mbogut imbirak kunik wurik wonage me, Ala ayonggo malayikat mendek ya'na wurik ti paga laganggwi-wanggwi eekwi enegen iyareegerak.

¹³ Nogo eekwi iigak, at Aliku ALA eebe ya'na wurik irip paga mi'ndak wonage logonet, “Naliku kogoba Abarakam ogoba Ala inom, Itak ogoba Ala inom, ti an mban aret o. An aret me, nggween kat keebe nogo yege me yi, kat inom, kat kapuri wigannaremenggaarak inom, unde eeppunuk logobagip nduk, wokkiraagin o.

¹⁴Kat kapuri ndappiyamenggendak kinom nggween ameneno ambik lombok ti ndak-ndak wigannarit nogo logonet, o aru-ogwe, agi-ogu time abok aret ndak wa'narit nogwe kiigak, yi aakumi ndi aakumi o nggween paga wonogwe yi abok aret kat inom, kapuri wigannaremenggaarak inom, it nogo paga inale'nggen kogo logogun o.

¹⁵Kat o ambime, Na, yinuk, nage kenok, an nen enaani aret ndegenggeren nage, karum liirogon aret wonage, eeke logominggirik, ti'nuk, wokkeren o yime aret pagi woraagin o. Ndi, an nen, Yogop eerigin o, yinuk, wone abuk nggaruk togon yokkiragarak nogo abok aret a'me lik yaga'lek kagak, an teppagagin lek mondok yeenggwa kege logogin aret o,” yinuk, yoreegerak.

¹⁶Yoge mbareegi, at Yakup nogo yege nogo, eenik age nagagerik, ari logonet, “Ie! At Aliku ALA eebe o ya'i wonage kagak, kaga'lek aret wonagarak kagi o,” yinuk,

¹⁷agabiti nen, “O yi ti, Ala menggim mbogut paga unggwi nogo menggam tu yi aret kenok, aakumi inagabiti nen, Ia! yinuk, ayuk wuko menggam aret kagi o,” yereegerak.

¹⁸Ko'lu kuubondendok at Yakup nogo nen abi kagagerak nogo kobak age kero, yugum anep mbanak nogo waganogo mippege nagagerik, eyo tayitun amburu yugum nogo paga kilirogo pege logonet,

¹⁹“O yi endage, Mbeten o,” yinuk, tooneegerak. Ndi, o nogo aa'nduk nen, “Lut,” aret yogo nogogwaarak.

²⁰Nogo toombege nagagerik, at Yakup nen ari logonet, “An tu paga yime nage neegak, kat Ala nen liirogon ndegenneren nage, narum wonage, eeke logonet, nambi noorak inom, nambogoyum yikkoloorak inom,

²¹wo'nege logomenggendik, ti'nuk, niyok paga nogoba wonage me obeelom aret pani wage keenok, kat Kaliku nogo ti, an nogoba Ala aret logomunggun o.

²²Ndi, kobak age kero, yugum yi mippigirak nogo ti, Kat kawi aret, mba'nuk, Yi mendek ndi mendek abok aret wo'nege nogo, neenggi lingginogo punuk, 10 age kenok, ambi yendenogo kake pege logogin o,” yinuk, Ala endage kunogo kumbuk mbaneegerak.