Read Western Dani Wakkagagerak 30 Bible Online

Wakkagagerak 30 - Western Dani bible

Wakkagagerak 30

¹At Araken nogo nen ogonggelo Yakup obaane'me aagalogwe ambi abu ndaganaka'lek paga oweeluk eebi nen imbirak iniki ogoorak wonogo logonet, Yakup yoge, “An elege ambi mbet nda'niru o. Nda'nega'lek keenok, keraaket nen nggaruk togon aret kambigin o.”

²Yoge mbareegi, at Yakup nen Araken mberege logonet, “An Ala kokwak me nduk ari agandik ya? At Ala nen aret kat elege ndake keyo, non mbambagage wonage o.”

³Yoge mbareegi, at Araken nen ari logonet, “At ndaganabemenggerak paga an naagalogwe wigak yuurak me, neenggi ndoonak neegak kolaga nayeloman Mbilaka yi nen aret elege nda'niruwak nduk, kimbirak nogo yu o.”

⁴Yoge nagagerik, ayeloman kolaga Mbilaka nogo akwe kolaawak nduk Yakup wogoge mbareegi, imbirak nogo yege logonet,

⁵at Mbilaka nogo abila age nagagerik, Yakup obaane'me aagaluk wulaga ambi ndareegerak.

⁶Ndake mbareegi, at Araken nen ari logonet, “At Ala nen, Kwe yi obeelom aret o, yinuk, naana'le mbanogo punuk, an tamban eekirak nogo Ala aruk konengge nagaarik, wulaga yi aret wo'negerak me,” ari nagagerik, endage Ndan aret tooneegerak.

⁷Ti'nuk peebi, at kwe Mbilaka nogo ambinom abila age nagagerik, Yakup obaane'me aagaluk wulaga alik ambi ndareegerak.

⁸Ndake nagagerik, ari logonet, “Noweeluk nimbirak ogoorak wonage kenok, An nonggop eeri? mba'nuk, wakkagak mban eekirak paga an tiyak yagi o,” yinuk, wulaga nogo endage Natali aret tooneegerak.

⁹Ndi, at Leya nogo aagalogwe peebi ambinom ndaganaburak meek aret kage nagagerik, ayeloman kolaga Tilapa waganogo Yakup akwe kolaawak nduk, wogoge mbareegi,

¹⁰Yakup obaane'me aagaluk wulaga aret ndareegerak.

¹¹Ndake mbareegi, at Leya nen ari logonet, “Obeelom agago wo'nigi o,” yinuk, endage Nggat aret tooneegerak.

¹²Ti'nuk, peebi at Leya ayeloman kolaga Tilapa nogo ambinom abila age nagagerik, Yakup obaane'me aagaluk wulaga alik ambi ndareegerak.

¹³Ndake mbareegi, at Leya nen ari logonet, “An niniki ale'nggen ambik ee'nake kenok, it kumi abok nen, Kwe yi ale'nggen alik negen eeke kogo, yinuk, yogo logogun me, endage ti, Atet aret o,” yinuk, tooneegerak.

¹⁴Ne ambi gandum mbanggwi eyom paga at Uruben nogo nen yarak me time nage nagagerik, elege ndaganaka iri'ngga kwaakkage nagagerik, mbaninuk wonok agalo Leya wogori wage mbareegi, at Araken nen Leya yoge logonet, “Kat kaagaluk nen elege ndaganaka iri'ngga wonok kiri wagaarak nogo, an ambi wo'niru o.”

¹⁵Yoge mbareegi, at Leya nen ari logonet, “An kunduk nogonggelo aret kwe, kat mban kimbirak a'nuk wonage ti meek eeppunuk, yogondak naagaluk nen elege ndaganaka iri'ngga kwaakerak nogo inom mban wokkiriyak nduk nggino yo'negen ya?” Yoge mbareegi, at Araken nen, “Togop kenok, kaagaluk nen elege ndaganaka iri'ngga wokkiri wagaarak ti, an ambi wo'nege kenok, onggo yogondak oonikiya Yakup kimbirak nogo yenok o,”

¹⁶yinuk, wonogwe me, at Yakup kiyoma yabume nen oome wage me, at Leya nogo imbirak lambumbunuk yoge logonet, “An nimbirak nogo yuurak onggo naagaluk elege ndaganaka iri'ngga kwaakerak pigirak me, yogondak oonikiya kat nimbirak nogo yuurak o.” Yoge mbareegi, ti eyom paga aret Yakup imbirak nogo yereegwaarak.

¹⁷Ndi, at Leya tamban eereegerak nogo Ala aruk koneneegerak me, at Leya abila a'nuk, Yakup obaane'me wulaga ambi ndareegerak. Ti ndareegerak aagalogwe ineebe lambuk togon 5 aret agagerak.

¹⁸Ndake nagagerik, at Leya nen ari logonet, “An nayeloman kolaga Tilapa waganogo nogonggelo wogogirak paga at Ala nen an naagaluk yi wo'negerak me, at endage ti, Itakat o,” yinuk, tooneegerak.

¹⁹Ti'nuk, peebi at Leya nogo ambinom abila age nagagerik, aagaluk wulaga ambi aret ndareegerak. Ti ndareegerak nogo aagalogwe ineebe lambuk togon 6 aret agagerak.

²⁰Ndake nagagerik, at Leya nen ari logonet, “Ala nen onggo lek naagaluk wo'nege yi, mondok iya lombok eerogo panege mbaki, an naagalogwe wologwe 6 aret Yakup obaane'me ndakirak yi paga nen perak, yogondak nogonggelo nen waganogo enaame panigin kagi o,” ari nagagerik, “Wulaga yi endage ti, Tebulon aret o,” yinuk, tooneegerak.

²¹Ti'nuk peebi logonuk negen kolaga ambi ndake nagagerik, endage Ndina aret tooneegerak.

²²Ndi, Ala nen Araken oba abeppege nagagerik, at Araken tamban eereegerak nogo Ala aruk konembunuk, “Araken yogondak elege ambi wogorikit,” mbareegerak.

²³Ndi, at Araken nogo abila aret age nagagerik, aagaluk wulaga aret ndappunuk, ari logonet, “An nenggali mbakak nege nogo Ala nen lek eerogo naagaluk yi aret wo'negerak o,”

²⁴yinuk, “At Aliku ALA nen naagaluk wulaga alik ambinom wo'niruwak o,” ari nagagerik, at endage Yutup aret tooneegerak.

²⁵At kwe Araken nogo Yutup aret ndake mbareegi, at Yakup nen Laban nogo yoge logonet, “An name nda'nagagim naakit nduk, Nak, yo'niru o.”

²⁶Yoge nagagerik, “It kumi yi wogonabikit nduk keyabu nomaawi-nomaawa alik negen eeppagage nagarak keenu aret me, yogondak nakuwi inom, napurilogwe ndarak inom, enaani aret wogoren naakit nduk, Nak, yo'niru o, nami.”

²⁷Yoge mbareegi, at Laban nen ari logonet, “Kat nimbirak wonogwe paga at Aliku ALA ale'nggen noba panege logonet, ena koonogo wo'nege neenu me, kat nabuwa mba'nuk ninom ya'i logowok o, namboko!

²⁸Ndi, yabu eeke nagandak onggo mban wokkirikit nen yo'niru o.”

²⁹Yoge mbareegi, at Yakup nen wone onggo yoge logonet, “Nami o. Keyabu eeke logonet, nomaawi alik negen tit eeke, ndi, kaanggumi ndegeninake paga nonggop age, eeke nagarak nogo keenu aret o.

³⁰An keya waga'lek neegak, kaanggumi ti, we mbuuluk mban aret wonogogwaarak kwe, yogondak ambik lombok wigak yegerak ti, an yime wonage paga Aliku ALA ale'nggen koba pagage logonet eekerak op kwe, an nakwe-napuri perak, ngge eyom paga yeenggwaarobok aga o?”

³¹Yoge mbareegi, at Laban nen, “Togop kenok, an nano mendek wokkiri?” Yoge mbareegi, at Yakup wone onggo ari logonet, “Nami o. Kat nen yi wo'negak ndi wo'negak eeriyak paga yokkege ti lek o. Ata, wone an yokkege yi iluk ti, Op o, yo'nege kenok, kaanggumi arum logonet ndegeninake logogin aret o.

³²An kaanggumi wonogwe me nage logominggirik, ndomba aagalogwe ineeruwak mili kenok, kambin-ndomba ineeruwak mili-yanggwi yabuk-ndabuk eerak ndarak kenok, kambin aagalogwe mili pegak miya pegak eerak ndarak kenok, an yabu eeke nagarak onggo ti aret koloorak me, leenogo piya na o.

³³Ndi, peebi kat nage logomenggendik, onggo wo'negendak nogo pekkage logonet, kambin-ndomba ineeruwak mili-yanggwi yabuk-ndabuk eerak inom, mili pegak miya pegak inom, ndomba aagalogwe ineeruwak mili inom, an naanggumi inenggela'me togoti eerak lek ambi wonage kenok ti, kat nen, Naanggo aret kiraakerak, nombariyak kwe, togop wonage lek kenok perak, wone yogoorak ndak-ndak abet aret eekerak kagi, nomba'nok o.”

³⁴Yoge mbareegi, at Laban nen wone onggo yoge logonet, “Op aret o. Yagandak nogo ndak-ndak aret eeko logowok o.”

³⁵Yoge nagagerik, ne ti paga aret at Laban nen kambin ngguunok eeruwak tikarik-tikarok eerak kenok, mili pegak miya pegak eerak kenok, leenogo piige, ndi, kambin kooli eeruwak mili-yanggwi yabuk-ndabuk eerak inom, mili pegak miya pegak eerak inom, togop eerak kwe, ineebe paga ineeruwak yanggwi nggwok kunik kenok mban alik leenogo piige, ndi, ndomba aagalogwe ineeruwak mili kenok leenogo piige, eeke nagagerik, leenogo piyareegerak nogo apurilogwe nen ndegeneren nawak nduk, yorage mbareegi,

³⁶at apuri nogo nen Yakup enegen mari wuppunuk, kambin-ndomba nogo wogoren tu paga nogo kenagan yit tayorogon time piya nogogwaarak iigak, Laban aanggumi ando piinok nogogwaarak nogo at Yakup nen ndegeninake nagagerak.

³⁷At Yakup nogo alik nogome ndegeninake logonet, eyo nggun negen eno'mbak mbangge, eyo tiimo negen eno'mbak mbangge, eyo pit-pit negen eno'mbak mbangge, eerogo pege nagagerik, tikarik-tikarok yanggwi negen eerogo punuk,

³⁸it kambin-ndomba niyo na wogo logonet, eyo eno'mbak tikarik-tikarok eerak nogo kambin-ndomba niyo nonggo menggam inageyo ndoonak paga inanobak puwam ndak-ndak taa'nogo pit nagagerak.

³⁹Pit nage mbareegi, kambin-ndomba egokot agan niyo na wogo logonet, eyo eno'mbak mbanak tikarik-tikarok aago nogo enaame nen wali wurinaketak me, ineeruwak tikarik-tikarok eerak inom, mili-laambu yabuk-ndabuk eerak inom, mili pegak miya pegak aago inom, togop mban ndaganabit nogo nogogwaarak.

⁴⁰Ti'nuk, at Yakup nen ndomba aagalogwe nogo leenogo wogonake nagagerik, wali ineeruwak mili inom, tikarik-tikarok eerak inom, waganogo Laban aanggumi iyagalo wonogwe me nogome inanobak koonogo piige nagagerak. Togop eereegerak paga Laban aanggumi paga at Yakup koloorak mbareegerak nogo mendek mban ambik wigak yereegerak me, Laban aanggumi inom lambunogo piyoolik, at aanggumi kenok alik me aret piirogo wonagagerak.

⁴¹Ndi, at Yakup nen at aanggumi kambin-ndomba inobatengga inomaawi ambik kero wali noorak eekwi iinok, eyo eno'mbak tikarok eerak enaame nen wurinako logowak nduk, niyo nonggo menggam eyo eno'mbak tikarok eereegerak nogo pit nage,

⁴²ndi, kambin-ndomba we inowak wonoongge inomaawi lek negen wonogwe me nogome eyo eno'mbak nogo puulik mbo pege, eeke mbareegi, ineebe inanobakwelogwe ndarak nogo ti, Laban unde eeppege, ndi, ineebe inobatengga ndarak kenok ti, at Yakup unde eekkolage, eereegerak.

⁴³Ti eereegerak paga at Yakup nogo aap nggwok eenggi warak age nagagerik, aanggumi kambin-ndomba inom, keledai-unta inom, apit aret unde a'nuk, ayeloman mini kumi-aap apit aret wonagagerak.